E maata te tangata i teianei ao te karanga ra e te aru ra ratou ia Iesu Karaiti inara te piri ra ki roto i te angaanga poritiki. Te tauta ra tetai pae i te akamaata atu i ta ratou akonoanga e te irinakianga na te turuanga i tetai au mema me kore pāti poritiki. Pera katoa te au mema poritiki, ka taangaanga ratou i tetai au akakoroanga no te oraanga kia turu mai te au akonoanga ia ratou. E mea matauia no te au orometua akonoanga kia oro no tetai taoonga poritiki. E i tetai au enua, ka mou tetai akonoanga “Kerititiano” i te taoonga kavamani e ei akonoanga no te enua.

 Eaa toou manako? Ka piri ainei te au pipi a Iesu Karaiti ki roto i te angaanga poritiki? Ka kitea te pauanga mei to Iesu akaraanga. Karanga aia: “Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou.” (Ioane 13:15) I te pae o te angaanga poritiki, eaa te akaraanga ta Iesu i akanoo?

 Kare. Kare a Iesu i piri ana ki roto i te angaanga poritiki o teianei ao.

 Kare a Iesu i kimi ana kia riro aia ei tutara poritiki. Kua patoi aia kia kore e riro ei tutara no te au kavamani a te tangata te oronga anga te Tiaporo ko Satani kiaia “te au basileia katoa o te ao nei.” (Mataio 4:8-10) a I tetai akaou atianga, kua opara te tangata iaia kia piri ki roto i te angaanga poritiki no te mea kua kite ratou i tona au tu arataki. Te akakite ra te Pipiria: “Te kite rā Iesu i to ratou manako, ka tiki mai iaia e kave e akaariki, oki akaou atura aia ki runga i te maunga, koia anake ra.” (Ioane 6:15) Kare a Iesu i āriki ana i te anoano o te tangata. Mari ra, kua patoi aia e kare aia e piri ki roto i te angaanga poritiki.

 Kare a Iesu i turu ana i tetai tua o te manamanata poritiki. Ei akaraanga, i to Iesu tuatau kua riri te au ngati Iuda te tutaki i te tero a te kavamani o Roma e kua manako i te reira ei apainga tika kore e te teiaa. Te maro anga ratou ia Iesu kia turu ia ratou, kare aia i inangaro kia piri ki roto i ta ratou taumaro anga poritiki no te tero. Akakite aia kia ratou: “Ka apai mari i ta Kaisara ra kia Kaisara; e ta te Atua ra, e apai ïa ki te Atua.” (Mareko 12:13-17) Kua vai takake ua a Iesu mei te reira manamanata poritiki inara kua akaari aia e kia tutaki pouroaia te au tero tei anoanoia e te mana tutara o Roma, ko Kaisara. I taua taime rai, kua akaari aia e kua kotingaia to ratou mana tutara ki rungao i te tangata. Kare tetai tangata e oronga ki te Kavamani tei anoanoia na te Atua anake, pera te akono anga e te akamorianga.—Mataio 4:10; 22:37, 38.

 Kua turu a Iesu i tetai kavamani i te rangi, te Patireia o te Atua. (Luka 4:43) Kare aia i piri ana ki roto i te angaanga poritiki no te mea kua kite aia e na te Patireia o te Atua, kare na te kavamani a te tangata, e akatupu i ta te Atua i anoano no te enua nei. (Mataio 6:10) Kua kite aia e kare te Patireia o te Atua e angaanga na roto i te au kavamani a te tangata inara ka takoreia te reira.—Daniela 2:44.

 Kare. Kua akarongo te au pipi a Iesu ki tana akaueanga “kare kotou i to teianei ao.” (Ioane 15:19) Kua aru ratou i tona akaraanga kia vai takake mei te angaanga poritiki o teianei ao. (Ioane 17:16; 18:36) Kare ratou e piri ana ki roto i te angaanga poritiki, kua rave ratou i te angaanga ta Iesu i akaue kia rave—te tutu aere e te apii no runga i te Patireia o te Atua.—Mataio 28:18-20; Angaanga 10:42.

 E puapinga maata no te au Kerititiano o te anere mataiti kia kauraro ki te Atua, e kua kite katoa ratou e ka akangateitei ratou i te au mana tutara. (Angaanga 5:29; 1 Petero 2:13, 17) Kua aru ratou i te au ture e kua tutaki i ta ratou tero. (Roma 13:1, 7) Noatu kare ratou i piri ana ki roto i te angaanga poritiki, kua taangaanga ratou i te paruru anga a te ture e te au tauturu a te kavamani.—Angaanga 25:10, 11; Philipi 1:7.

 Te akakite maira te Pipiria e kare a Iesu e tana au pipi i piri ana ki roto i te angaanga poritiki. No reira ei au Kerititiano, kua vai takake ua te Au Kite o Iehova i te ao katoa. Mei te au Kerititiano o te anere mataiti mua, te rave ra ratou i te angaanga ta Iesu i akaue—te tutu aere i “te evangelia o te Basileia nei.”—Mataio 24:14.