Me akamanako koe i tetai tangata apiapi, a penei ka manako koe i tetai tangata matakutaku, kare e inangaro ana i te akaruke i tona ngutuare, e ka tuatua ua aia no runga i te au manamanata e tupu nei.

 Ka akapera tetai pae me apiapi ratou. Inara kua kite mai te au taote e e tuke te tu o tetai pae—te au tane tikai—me apiapi ratou. Te karanga ra tetai ripoti e “ka taangaanga te au tane i te kava e te au apinga akakona no te akakoromaki i to ratou tu apiapi, no reira ka manako tetai pae e, e aronga konā kava ratou, inara ko te tika e manamanata to ratou no te tu apiapi. Me e tu apiapi to te au tane ka viviki ua ratou i te riri.”

 Inara te tika, kare e aiteite ana te tu o te au tane. Noatu ra, e mea papu e te kino atura te tu apiapi i teia tuatau “kino maata.” (2 Timoteo 3:1) Me te akakoromaki nei koe i te tu apiapi, ka rauka ainei i te Pipiria i te tauturu ia koe?

 E maata te au kaveinga Pipiria te ka tauturu me apiapi tatou. Ka akara tatou e toru akaraanga.

1.  1. “E teianei, auraka e apiapi i to apopo ra; na apopo e apiapi i tana uaorai. Ko te rā ko tona uaorai kino, oti ra ua ïa.”—Mataio 6:34.

    Te aiteanga: Auraka tatou e apiapi maata no te ka tupu (me kore kare e tupu) apopo. Te maataanga o te taime, kare te au mea e tupu ana mei ta tatou i manako. I tetai taime, penei ka tupu poitirere ua te au mea meitaki.

    Tamata i teia: Akamaara i tetai atianga kua papu ia koe e ka tupu tetai apinga kino—inara kare te reira i tupu ana. E oti, akamanako i te au mea taau e apiapi ra i teianei e kia akara me ka riro mai te reira ei manamanata kino tikai.

2.  2. “Na te auri i akakina i te auri; e na te tangata e akakina i te mata o tona taunga.”—Maseli 27:17.

    Te aiteanga: Ka rauka i tetai ke i te tauturu, me āriki tatou i te reira. Ka rauka ia ratou i te oronga mai i tetai au manako meitaki me kua na roto ana ratou i te turanga taau e na roto nei. Ka rauka katoa ia ratou i te tauturu ia koe kia kite i tetai au mea kare koe i manako ana.

    Tamata i teia: Akamanako i tetai tangata te ka oronga mai i te manako tau, penei ko tetai oa tei na roto ana i tetai turanga tei aite ki toou rai. E ui kiaia eaa tei tauturu iaia.

3.  3. “E uri i to kotou tumatetenga katoa ki runga iaia; koia oki te tiaki mai ia kotou.”—1 Petero 5:7.

    Te aiteanga: E tu aroa to te Atua no te aronga e mamae ra. Te pati nei aia ia tatou e pure kiaia no te au mea te akataitaia ra ia tatou.

    Tamata i teia: Tata i runga i tetai pepa i te au mea taau e apiapi ra. E oti pure ki te Atua no runga i te reira. E akamārama i toou manamanata kiaia e e pati i tana tauturu no te reira.

 Kare te Pipiria i oronga ua mai i te tauturu kia akakoromaki i te tu apiapi. Mari ra, kua taputou te reira e ka kore rava te apiapi a te tuatau ki mua. Akapeea teia e tupu ei?

 Ka takore te Patireia o te Atua i te tumu tikai o te apiapi. (Apokalupo 21:4) Te tika, i raro i te tutara a te Patireia, kare tatou e maara akaou i te au manako apiapi e te taitaia.—Isaia 65:17.

 Ko teia te manakonakoanga ta te “Atua au” i inangaro noou. (Roma 16:20) Kua akapapu mai aia kia tatou e: “Kua kite oki au i te au akakoro anga taku i akakoro ia kotou nei, . . . e akakoroanga au ïa, kare to te kino, kia oronga atu au ia kotou i te openga ta kotou i manako ra.”—Ieremia 29:11.