Kia tau ki te Pipiria, kua ora te Ariki ko Davida o Iseraela i te 11 anere mataiti M.T.N. e kua tutara tona uanga e anere ua atu mataiti. Inara kua karanga tetai aronga patoi e e pikikaa ua te tua no runga ia Davida, e e mea maani ua te reira. E tangata tika tikai ainei te Ariki ko Davida?

 I te 1993, kua kiteaia mai e tetai tangata kimikimi ko Avraham Biran e tona pupu tetai toka i Tel Dan, i te tua tokerau o Iseraela, e kua tataia ki runga i teia toka te au tuatua “Are o Davida.” Kua tataia teia au tuatua i roto i te reo Semitic, e kua kiteaia mai e kua tataia te reira i te iva anere mataiti M.T.N. No ko mai teia toka i tetai poupou akamaaraanga tei akatuia e te iti tangata Arama, no to ratou autu anga ki runga i to Iseraela.

 Karanga tetai tataanga i roto i te Bible History Daily e: “Kare tetai pae e irinaki e e tika tikai teia tataanga te ‘Are o Davida’ . . . Inara, e maata te aronga kite i te apii Pipiria e te aronga kimikimi, tei āriki e kua riro teia toka i Tel Dan ei akapapuanga mua e e tangata tika tikai te Ariki ko Davida i roto i te Pipiria, e kua riro teia e ko tetai o te au kiteanga Pipiria puapinga maata atu i roto i te BAR [Biblical Archaeology Review].”