KIA MATAKITE!
Akamatakite Maira te Aronga Poritiki no Aramagido—Eaa ta te Pipiria e Akakite Maira?
I te popongi Monite, Okotopa 10, 2022, kua takore te au pomu mei Rutia i te au oire i Ukraine ei tupau i tetai akaaruruanga e rua rā i mua ana tei takore i tetai ana mei Crimea ki Rutia. Kua akatupu teia au tupuanga i tetai akamatakite anga a te aronga poritiki e penei ka tupu vave a Aramagido.
“Kare ake tatou i na roto i tetai tupuanga o Aramagido mei te taime mai o [te U.S. President John F.] Kennedy e te Cuban Missile Crisis. . . . Toku manako kare e rauka te kopae anga mei te [taangaanga anga] i te au apinga tamaki nukiria e ka akatupu akera ia Aramagido.”—U.S. President Joe Biden, Okotopa 6, 2022.
“Ka akatika rai au e ko Aramagido teia, e tumatetenga ïa no te enua katoatoa.”—Ukraine President Volodymyr Zelensky, te ui angaia kiaia no runga i te au tupuanga kino o te au apinga tamaki nukiria, BBC News, Okotopa 8, 2022.
Ka akatupu ainei te taangaanga anga i te au apinga tamaki nukiria ia Aramagido? Eaa ta te Pipiria e akakite maira?
Ka akatupu ainei te au apinga tamaki nukiria ia Aramagido?
Kare. Te kupu “Aramagido” ka kiteaia e tai taime i roto i te Pipiria ia Apokalupo 16:16. Kare te reira i te tamaki i rotopu i te au enua mari ra e tamaki i rotopu i te Atua e “te ui ariki o te ao katoa nei.” (Apokalupo 16:14) Na roto i te tamaki o Aramagido ka takore ei te Atua i te tutaraanga a te tangata.—Daniela 2:44.
Kia kite maata atu i te aiteanga o Aramagido ki te enua katoa, e tatau i te atikara Eaa te Tamaki o Aramagido?
Ka takoreia ainei te enua e to te reira e te tamaki nukiria?
Kare. Noatu e penei ka taangaanga te au arataki o teianei ao i te au apinga tamaki nukiria a te tuatau ki mua, kare te Atua e tuku ia ratou kia takore i te enua. Te akakite maira te Pipiria e:
“Te enua nei, te vai ua nei rai ïa.”—Koheleta 1:4.
“Ka riro te enua no te aronga tuatua-tika, ka noo tamou rai ratou i reira.”—Salamo 37:29.
Inara, te akakite maira te au totou Pipiria e te au mea e tupu nei e te vaitata nei tatou ki tetai tauianga maata i roto i te oraanga o te tangata. (Mataio 24:3-7; 2 Timoteo 3:1-5) E akara i ta te Pipiria e akakite maira no te tuatau ki mua na roto i ta matou uriurianga apii Pipiria kare e tutaki.