KIA MATAKITE!
Eaa i Maata ai te Tu Makitakita?—Eaa ta te Pipiria e Akakite Maira?
Kua ki te nuti i te tuatua makitakita, te kino makitakita, te takinokino iti tangata, e te tamaki.
“No te tamaki i rotopu ia Iseraela e Gaza e kua akamaataia e te aronga rave kino, kua kino atu te tuatua makitakita i runga i te social media.”—The New York Times, Noema 15, 2023.
“Mei ia Okotopa 7, kua tupu maata te makitakita, te tuatua makitakita e te au kino makitakita.”—Dennis Francis, peretiteni o te United Nations General Assembly, Noema 3, 2023.
Kare te tuatua makitakita, te ta ua, e te tamaki i te mea ou. Kua akatutu mai te Pipiria i tetai aronga i mua ana tei “akatano i ta ratou au kakao, koia te tuatua mamae ra” e kua tamaki e kua ta ua. (Salamo 64:3; 120:7; 140:1) Te akamārama maira te Pipiria e e aiteanga puapinga to teia tu makitakita te kite nei tatou.
Tu Makitakita—E akairo no to tatou tuatau
Te akakite maira te Pipiria e rua tumu i maata ai te makitakita i teia tuatau.
1. Kua totouia tetai tuatau e “ka riro te rai o te tangata i te mea ngiti te anoano.” (Mataio 24:12) Kare e aroa, e ka akaari te tangata i te tu makitakita.—2 Timoteo 3:1-5.
2. Te akaari maira te tu makitakita o teia tuatau i te tu akakino e te kikino o te Tiaporo ko Satani. Karanga te Pipiria e “te vai ua nei rai to te ao ravarai i raro ake i taua vaerua kino ra.”—1 Ioane 5:19; Apokalupo 12:9, 12.
Te akakite katoa maira te Pipiria kare e roa atu ana ka takore te Atua i te mea e akatupu nei i te makitakita. E ka takore katoa aia i te au mamae ta te makitakita i akatupu. Kua taputou mai te Pipiria:
“E [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:4.