KIA MATAKITE!

Akamorianga Tiki—Eaa ta te Pipiria e Akakite Maira?

AKATANGI

Karanga te Catholic News Service, i te tuatau o tetai oroa i ko i te Are Pure o St. Peter tei raveia ia Mati 25, 2022, kua tu a Pope Francis ki mua i tetai tiki o Maria e kua “topiri i tona mata e kua tupou ma te pure muteki.” Kua “pati [aia] ia Maria” no te au. Akakite katoa te Nuti Vatican e kua “pure te Pope i te Pure Akatapuanga i te tangata, no Russia e Ukraine, ki mua i te tiki Immaculate Heart of Mary.”

Eaa toou manako? E tau ainei kia pure ki mua i te au tiki e kia taangaanga ia ratou ki roto i te akamorianga? Akamanako ana i teia au irava Pipiria:

“Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra: Auraka rava koe e tupou ki raro ia ratou, auraka oki e akamori atu ia ratou; e Atua vareae oki au ko te Atua noou nei ko Iehova.”—Exodo 20:4, 5. a
“Ko to ratou ra au idolo ario e te auro, e angaanga ïa na te rima tangata nei. E vaa to ratou, kare ra e tuatua; e mata to ratou, kare ra e akara; E taringa to ratou, kare ra e akarongo; e putaiu to ratou, kare ra e ongi; E rima to ratou, kare ra e rave; e vaevae to ratou, kare ra e aere; Kare rava oki to ratou karaponga e tika kia tuatua. Ko te aronga i anga ia ratou, okotai o ratou tu ma ratou ra, e te aronga katoa i irinaki ia ratou.”—Salamo 115:4-8.
“Ko au ko Iehova; ko toku ïa ingoa; kare au e oronga i toku ra kakā no tetai ke, e te akameitaki iaku ra no te au idolo akatikitikiia ra.”—Isaia 42:8.
“E rere ke atu i te araara idolo.”—1 Korinetia 10:14.
“E matakite ia kotou i te au idolo ra.”—1 Ioane 5:21.