I te tuatau o te 2024 Summer Olympics, mei te rima pirioni tangata ka akarakara atu i te aronga tarekareka tipoti tei aere mai mei te 206 tuma enua. “Akatupu nei matou i teia tarekareka anga tipoti kia taokotaiia mai teianei ao na roto i te ’au,” i karanga ai a Thomas Bach, e peretiteni no te International Olympic Committee. “E akangateitei tatou i teia tu vaerua o te Olympic kia ’au e kia taokotai te au tangata ravarai, noatu to tatou tu tukeke.”

 Ka rauka ainei i te Olympic i te akatupu i teia au akakoroanga teitei? E manakonakoanga ainei tetai no te ’au e te taokotai?

 E maata atu ta te Olympic i akaari mai i teia mataiti. Akaari maira te reira i te au manamanata ki te tangata e pera katoa i te pae o te poritiki tei akatakake i te au tangata. Kapiti mai ki teia au manamanata, te au tikaanga a te tangata kia rave i tana ikianga, te iriiri tangata, e te tu papaki tai.

 E reka ana te tangata i te akarakara i te tarekareka tipoti i te ao katoa mei te Olympic rai. Inara, te akaari katoa maira teia tarekareka anga i te au tu e te au angaanga kino, kare ra i akatupu ana i te ’au e te tu taokotai.

 Kua totou mai te Pipiria i te au tu o te tangata te ka akakino i te tu taokotai anga i teia tuatau. (2 Timoteo 3:1-5) Kia kite maata atu i teia totou Pipiria, tatau i te atikara “Did the Bible Predict the Way People Think and Act Today?”

 Tei roto i te Pipiria te manakonakoanga tika tikai te ka taokotai i te ao katoa ma te ’au. Te taputou maira te reira e ka taokotaiia te tangata ravarai ma te ’au i te enua nei, ki raro i tetai kavamani i te rangi tei kapikiia ko ‘te Basileia o te Atua.’—Luka 4:43; Mataio 6:10.

 Te Ariki o te reira Basileia, ko Iesu Karaiti, nana e akatupu i te ’au i te ao katoa. Akakite te Pipiria:

•   “E ruperupe ei te aronga tuatua-tika; e maata roa oki te au.”—Salamo 72:7.

•   “Ko tei putaua ra me kapiki maira, nana ïa e akaora . . . Ka akaora aia i to ratou vaerua i te takinga-kino e te rotoriri.”—Salamo 72:12, 14.

 I teia tuatau, kua taokotai takere te au apiianga a Iesu i te mirioni ua atu tangata i te 239 au enua. Ei au Kerititiano, kua apiiia te Au Kite o Iehova takapini i teianei ao kia akatupu i te ʼau. Kia kite akapeea, tatau i te makatini te Punanga Tiaki “Takore i te Tu Makitakita.”