“Te tupu akaou nei te kino i te pae o te moni i teianei ao,” i akamatakite mai ei te peretiteni o te World Bank Group i roto i tetai ripoti o Tiunu 2022. “Teia taime te kake viviki nei te moni no te au apinga e ma te marie o te puapinga ka rauka mai.”

 “Kua kake viviki te moni tutaki i te penitini e te kai, i te akatupu anga i te manamanata ki te au tangata e noo ra i te au enua putaua,” i akakite mai ei te International Monetary Fund.

 Te tauturu maira te Pipiria ia tatou kia mārama i te tumu i tupu ei teia au manamanata i te pae o te moni, e ka akapeea tatou me akakoromaki, e eaa te ravenga meitaki rava atu.

•   Te akakite maira te Pipiria i te tuatau e noo nei tatou e ko “taua tuatau openga ra.”—2 Timoteo 3:1.

•   Karanga a Iesu e ka tupu te au “mea rikarika,” te au tupuanga vinivini, tei akairo mai i teia tuatau. (Luka 21:11) Ka akatupu te kake anga o te moni no te au apinga i te mataku. Ka manata te tangata i to ratou oraanga a te tuatau ki mua me ka rauka rai ia ratou i te akono i to ratou ngutuare tangata.

•   Kua totou mai te puka o Apokalupo e ka kake te moni tutaki i te kai i taua tuatau ra. “Kua akarongo atu ra au i tetai reo. . . . Tei tuatua mai e, ‘E okotai arite sitona e e toru arite kerite e tai denari i te ra okotai.’”—Apokalupo 6:6, Easy-to-Read Version.

 Kia kite maata atu no runga i “taua tuatau openga ra” e te totou i roto i te puka o Apokalupo, e akara i te vitio Kua Taui Teianei Ao Mei te 1914 Mai e e tatau i te atikara “Te Akaoro Oroenua e Ā—Koai ma Ratou?”

•   “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. Kare ratou e patu, e na tetai ke e noo; kare ratou e tanu, e na tetai ke e ka.”—Isaia 65:21, 22.

•   “E manga sitona okotai rima i ki i te enua nei, i runga i te take o te au maunga ra.”—Salamo 72:16.

•   “No te takinga-kino i te aronga ao ra, no te kaku anga o te aronga akaaka, e tu ei au nei, te tuatua mairā Iehova.”—Salamo 12:5. a

 Kare e roa atu ka takore te Atua i te au turanga tau kore i te pae o te moni, kare ua i roto i tetai enua mari ra takapini i teianei ao. Kia kite akapeea, e tatau i te atikara “Ka Rauka Ainei Tetai Turanga Tau i te Pae o te Moni?”

 I teia tuatau katoa, ka rauka i te Pipiria i te tauturu ia koe i taau ka rave noatu kua kake te moni no te au apinga. Na teea mataara? Te oronga maira i te au kaveinga tau akapeea me taangaanga meitaki i taau moni. (Maseli 23:4, 5; Koheleta 7:12) Kia kite maata atu, e tatau i te au atikara “Paruru i Toou Oraanga” e te “How to Live on Less.”