KIA MATAKITE!
Te au Kerititiano e te Tamaki—Eaa ta te Pipiria e Akakite Maira?
Mei ta te tamaki i Ukraine e akaari maira, e maata te au arataki Kerititiano te turuturu ra i te tamaki. Akara akapeea te au orometua te turu anga i nga tua o te tamaki:
“Kia akangateitei e kia akameitaki maataia to tatou au tumutoa e paruru nei i to ratou ipukarea ko Ukraine mei tei tamaki maira . . . Tei te pae ua ia kotou to matou ngakau, pure akatenga, e te turuturu ia kotou.”—Metropolitan Epiphanius I of Kyiv, ripotiia The Jerusalem Post, Mati 16, 2022.
“Kua rave te arataki o te Russian Orthodox Church i tetai pure no te au vaeau Rutia i te Tapati te kapiki anga ia ratou kia paruru i to ratou enua ‘ka rauka ua i te au Rutia’ ia Moscow e rave ua atura i tana oroanga tamaki i Ukraine.”—Reuters, Aperira 3, 2022.
Ka piri ainei te au Kerititiano ki roto i te tamaki? Eaa ta te Pipiria e akakite maira.
Ta te Pipiria e akakite tikai ra
Te akaari maira te Pipiria e kare te aronga e aru tikai ra ia Iesu e piri ki roto i te tamaki.
“Ka momono ana i taau koke ki roto i te vaî; ko tei rave i te koke ra, ka mate ïa i te koke.”—Mataio 26:52.
Te akarongo ra ainei tetai tangata ki ta Iesu tuatua me turuturu aia i te tamaki e kua tamaki atura?
“E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”—Ioane 13:34, 35.
Te akaari ra ainei tetai tangata i te aroa ta Iesu i taiku e pipi ratou, e te akarongo nana, me turuturu ratou i te tamaki?
Kia kite maata atu, tatau i te atikara “Te Au ra Ainei te Tamaki ki te Akonoanga Kerititiano?”
Te au Kerititiano e te tamaki i teia tuatau
E mea meitaki ainei kare te au Kerititiano e piri ki roto i te tamaki i teia tuatau? Ae. Kua totou mai te Pipiria e i to tatou tuatau, tei kapikiia ko “te au rā openga,” te vaira tetai iti tangata mei te au pa enua katoa “kare oki ratou e apii akaou i te tamaki,” te aru anga i ta Iesu au apiianga.—Isaia 2:2, 4.
Tatau i Te Punanga Tiaki atikara “How Does God View War?” kia kite maata atu.
Kare e roa atu ana ka taangaanga a Iehova, a “te Atua au ra,” i tana kavamani i te rangi kia akaora i tona iti tangata mei “te takinga-kino e te rotoriri ra.”—Philipi 4:9; Salamo 72:14.
Kia kite akapeea, akara i te vitio Eaa te Patireia o te Atua?
a Ko Iehova to te Atua ingoa.—Salamo 83:18.