KIA MATAKITE!
6 Mirioni Tei Mate i te COVID—Eaa ta te Pipiria e Akakite Maira?
Akakite te World Health Organization (WHO), mei ia Me 23, 2022, e 6.27 mirioni tangata tei matemate mei te COVID-19. Inara, i roto i te nuti o Me 5, 2022, kua tamanako te WHO e e maata atu te aronga tei matemate. Kua akakite te reira i te 2020 e te 2021, “te tare anga tikai o te aronga tei matemate e tei tamanakoia kua mate i te maki kino COVID-19 . . . vaitata i te 14.9 mirioni.” Te akakite maira ainei te Pipiria no runga i teia au tu tumatetenga kino?
Kua totou mai te Pipiria i te au maki mate
Totou a Iesu e ka tupu te maki mate, me kore “te au maki kikino,” i te tuatau tei kapikiia ko “taua tuatau openga ra.”—Luka 21:11, Contemporary English Version; 2 Timoteo 3:1.
Te akatupuia nei ta Iesu totou i teia tuatau. Kia kite maata atu, e tatau i te atikara “Eaa te Akairo o te ‘au Rā Openga,’ me kore ‘te au Tuatau Openga’?”
Teia ta te Pipiria akapumaana anga
“Ko te Atua nona anake te pumaana; ko tei akapumaana mai ia matou i to matou au mate katoa nei.”—2 Korinetia 1:3, 4.
E maata te aronga tei takake atu to ratou au akaperepere kua kite mai i te akapumaana anga a te Pipiria. E tatau kia kite maata atu i te reira i roto i teia nga atikara “Akakoromaki i te Mii—Taau ka Rave i Teia Rā” e “Te Tauturu Meitaki Roa Atu no te Aronga Tei Mii.”
Te akakite maira te Pipiria i te rapakau anga meitaki tikai
“Kia tae toou basileia. Kia akonoia toou anoano i te enua nei, mei tei te ao katoa na.”—Mataio 6:10.
Kare e roa atu ana ka akapapu mai “te Basileia o te Atua” e “kare oki to reira e karanga e, Kua maki au.” (Mareko 1:14, 15; Isaia 33:24) Akara i te vitio Eaa te Patireia o te Atua? kia kite koe eaa teia kavamani i te rangi e eaa ta te reira ka rave.
Te pati nei matou ia koe kia apii maata atu no runga i ta te Pipiria e akakite maira kia puapingaia koe e toou ngutuare tangata mei te ako anga pakari e te au taputou manea a te Pipiria.