Ripoti na te United Nations:

•   Mei ia Okotopa 7 kia Okotopa 23, 2023, e 6,400 tuma tangata i mate no te tamaki i rotopu ia Gaza e Iseraela e e 15,200 au tangata tei kino, maataanga ia ratou e au tangata e noo ra i reira. Pera katoa, anere e tauatini ua atu au tangata kua akaruke viviki i to ratou kainga.

•   Mei ia Tepetema 24, 2023, e 9,701 tangata i mate no te tamaki i rotopu ia Rutia e Ukraine e e 17,748 tei kino i Ukraine.

 Eaa te manakonakoanga ta te Pipiria e oronga maira ki te au tangata i rokoia e te tumatetenga no te tamaki?

 Te akakite maira te Pipiria e ka “akakore te [Atua] i te tamaki e tae rava akenei ki te openga enua.” (Salamo 46:9) Ka tuku aia i te kavamani i te rangi, me kore te patireia, kia mono i te au kavamani a te tangata. (Daniela 2:44) Ka rauka i te Patireia o te Atua i te akapumaana i te au tangata ravarai.

 Akara eaa ta Iesu Karaiti, te Ariki o te Patireia o te Atua ka rave:

•   “Ko tei putaua ra me kapiki maira, nana ïa e akaora; e tei akaaka ra, e kare ona e tauturu. Ka akaperepere aia i tei apikepike ra e tei putaua, e akaora oki aia i te au vaerua o te aronga ao ra. Ka akaora aia i to ratou vaerua i te takinga-kino e te rotoriri ra.”—Salamo 72:12-14.

 Na roto i tona Patireia, ka takore takiri te Atua i te tumatetenga e te mamae ta te tamaki e te kino i akatupu.

•   “E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:4.

 Kare e roa atu ana ka akatupu te Patireia o te Atua i te au tauianga maata i te enua nei. Kua totou mai te Pipiria e ka tupu te “tuatua tamaki, e te rongo tamaki” ta tatou e kite nei i teia tuatau. (Mataio 24:6) Te akaari maira teia au mea e tei roto tatou i te “tuatau openga” no te tutara a te tangata.—2 Timoteo 3:1.