I teia au mataiti, e tai ngauru ua atu au tauatini ngaruerue enua e tupu ana. Te maata anga e au mea meangiti ua, inara te akatupu ra te au ngaruerue enua mamaata i te kino, te mamae, e te mate. Tetai taime, e akatupu ana te reira i te au tsunami tei takino i te au ngai pae tai, te tamate anga i te tangata e noo ra i reira. Kua totou mai ainei te Pipiria i teia au ngaruerue enua mamaata?

I roto i teia atikara

•  Kua totou mai ainei te Pipiria i te au ngaruerue enua?

•  Te akatupu ra ainei te au ngaruerue enua o teia tuatau i te totou Pipiria?

•  Eaa te aiteanga o te totou Pipiria no tatou no te au ngaruerue enua?

•  Te au manako tarevake no te totou Pipiria e te au ngaruerue enua

 Te taiku ra te Pipiria i te au ngaruerue enua i roto i ta Iesu totou. Kua akakiteia tana au tuatua i roto i nga puka Pipiria e toru:

 “E tu mai tetai enua e tamaki mai ki tetai enua, e tetai basileia e tamaki mai ki tetai basileia: e onge oki, e te maki-mate, e ngaruerue te enua i tera ngai, i tera ngai.”—Mataio 24:7.

 “E tu mai tetai enua e tamaki mai ki tetai enua, e tetai basileia e tamaki mai ki tetai basileia: e te ngaruerue o te enua i tera ngai, i tera ngai, te onge oki.”—Mareko 13:8.

 “E te ngaruerue maata i te enua i tera ngai i tera ngai, e te onge, e te maki-mate.”—Luka 21:11.

 Kua totou a Iesu e ka tupu te “ngaruerue maata i te enua i tera ngai i tera ngai” e ka tupu katoa te tamaki, te onge, e te maki mate. Me kapitiia, te akataka ra teia au tupuanga i tetai tuatau tei kapikiia ko “te openga o teianei ao,” e ko “taua tuatau openga” ra. (Mataio 24:3; 2 Timoteo 3:1) I roto i te akapapaanga o te Pipiria, kua akamata “taua tuatau openga” i te 1914 e kare i ope ake.

 Ae. Te tano ra ta Iesu totou, e tana i tuatua no te au ngaruerue enua, ki te au tupuanga ta tatou e kite ra i teia rā. Mei te 1914 mai, tere atu i te 1,950 au ngaruerue enua mamaata tei tupu, e e rua mirioni tuma tangata tei matemate. a Akamanako ana i tetai nga akaraanga o teia anere mataiti.

 2004—Indian Ocean. E 9.1-vaito tetai ngaruerue enua tei akatupu i te tsunami tei puke e 12 enua e e 225,000 tangata tei matemate.

 2008—China. E 7.9-vaito ngaruerue enua tei takore i te au oire tangata, e e 90,000 tangata tei matemate, e 375,000 tei kinokino, e mirioni ua atu kare e kainga.

 2010—Haiti. E 7.0-vaito ngaruerue enua aru mai te au ngaruerue enua rikiriki e 300,000 tuma tei matemate e e mirioni tuma kare e kainga.

 2011—Japan. E 9.0-vaito ngaruerue enua e te au tsunami tei tamate e 18,500 tangata e e au anere e te au tauatini ua atu tangata kare e kainga. Kua takinoia te Fukushima power plant, tei akatupu i tetai tumatetenga nukiria maata. E tai ngauru mataiti i teianei, e 40,000 tangata kare e rauka i te oki ki to ratou kainga i te pae i te power plant no te kino roa te taero anga nukiria.

 Te akamatakite maira te totou Pipiria eaa te ka tupu a te tuatau ki mua. Karanga a Iesu: “Kia akara kotou i taua au mea nei i te tupu anga, kua vaitata ïa te basileia o te Atua.”—Luka 21:31.

 Te akamārama maira te Pipiria i te Patireia o te Atua e ko tetai kavamani tikai i te rangi ma Iesu Karaiti ei Ariki. Ko te Patireia teia ta Iesu i apii i tana au pipi kia pure.—Mataio 6:10.

 Me tutara te Patireia o te Atua ki rungao i te enua, ka paruru te Atua i te tangata kia kore ratou e takinokinoia e te au tumatetenga natura, e te au ngaruerue enua. (Isaia 32:18) Ka rapakau aia i te au kino ta te au ngaruerue enua o teia tuatau i akatupu ki te tangata i te pae kopapa e te manako ngakau. (Isaia 65:17; Apokalupo 21:3, 4) Kia kite maata atu, tatau i te atikara “Eaa ta te Patireia o te Atua ka Akatupu?”