E au manamanata kino tikai tei akatupuia e te au pikikaa a te au arataki kavamani i teianei ao. a Ei akaraanga, i te tuatau o te maki kino COVID-19, kua akaapaia te au arataki i tetai au enua no tei akapuapinga ia ratou uaorai ki te au moni tei akakoroia ei tauturu i te tangata ma te maki kino. Mei teia pikikaa kare te tauturu i tae ana ki te tangata, tupu atura te tumatetenga e te mate.

 Te tupu maata nei te au pikikaa a te au kavamani i teianei ao. Karanga a David Cameron, e paraimi minita no te United Kingdom, i mua ana: “E taokotaianga pikikaa teia e te maatamaata—e kua taii te au enua katoatoa ki roto i te reira.”

 Inara, kua papu ia tatou, kare e roa ka ope te au kavamani pikikaa. Eaa te tumu? Akara i ta te Pipiria e karanga ra e ka rave te Atua.

 Kua tata te Pipiria i teia au tuatua a te Atua: “Ko au ko Iehova tei inangaro i te tuatua-tau, e mea makitakita naku te [keia] e te [tuatua tika kore].” b (Isaia 61:8) Me mamae te tangata mei te au tu pikikaa o tetai pae, kua kite te Atua i te reira. (Maseli 14:31) Te taputou maira aia: “No te takinga-kino i te aronga [akaaka] ra, . . . e tu ei au nei.”—Salamo 12:5.

 Eaa ta te Atua ka rave? Kare aia e taui i teia au kavamani e vai nei, mari ra ka takore aia i te reira e ka akanoo i tana kavamani, tei kapikiia ko “te basileia o te Atua.” (Mareko 1:14, 15; Mataio 6:10) Karanga te Pipiria: “E akatupu ei te Atua no te rangi i tetai basileia, . . . e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” (Daniela 2:44) Ka takore te Atua i te au tu pikikaa ta tatou e kite nei i teia tuatau.

 Akapeea tatou e kite ei no ta te Atua kavamani kare e pikikaa? Akamanako i teia.

1.  1. Te Mana. No ko mai te mana o teia Patireia i te Atua Mana Katoatoa.—Apokalupo 11:15.

    Te tumu: Kia akatere, ka irinaki te au kavamani a te tangata ki runga i te moni a te iti tangata. Te maata anga o te taime ka akatupu teia i te au atianga no te pikikaa, te keia, e te akavare i te tangata. Inara, na te Atua Mana Katoatoa e turu i teia Patireia, no reira ka akonoia te au anoano o te iti tangata.—Salamo 145:16.

2.  2. Te Tutara. Kua akataoonga te Atua ia Iesu Karaiti ei Tutara no te Patireia.—Daniela 7:13, 14.

    Te tumu: I tetai au taime e akavareia ana tetai au tutara meitaki. (Koheleta 7:20) Ei akatukeanga, kua akaari a Iesu e kare aia e akavareia. (Mataio 4:8-11) No tona aroa ngakau tae no tona iti tangata, te inangaro tikai ra aia i te tauturu ia ratou.—Salamo 72:12-14.

3.  3. Te au Ture. E au ture apa kore ta te Patireia o te Atua, e te maru.—Salamo 19:7, 8.

    Te tumu: E ngata, e teiaa, e e akaue tau koreia ana te au ture a te tangata, e ka tupu te pikikaa. I tetai tua, e tau tikai e te puapinga ta te Atua au ture. (Isaia 48:17, 18) Ka akara teia au ture i te au angaanga e te au akakoroanga o tetai. (Mataio 22:37, 39) E tikai, ka tatau te Atua i te ngakau e ka akapapu aia kia akaueia te reira au ture ma te tu tangi aroa.—Ieremia 17:10.

 Te pati nei matou ia koe kia apii i te au taputou a te Pipiria no tetai oraanga a te tuatau ki mua, kare e au kavamani pikikaa.

•   Tatau i te atikara “God’s Kingdom—A Government With No Corruption” kia kite e toru tumu e kare rava te Patireia o te Atua e pikikaa.

•   Akara i te vitio Eaa te Patireia o te Atua? kia apii no te kavamani a te Atua e eaa ta te reira ka rave i te enua nei.

•   Tamata i ta matou uriurianga apii Pipiria kare e tutaki akapeea koe e puapinga ai mei te au taputou a te Pipiria.