Manganui te tangata e manata ra i te kino e tupu nei ki te enua e te au mea ora i reira, ta ratou i irinaki e na te tangata rai i akatupu. Karanga te aronga kite i te pae o te reva, e kua akatupu te tangata i te kino maata ki te au mea ora ravarai e kua riro ta ratou e rave ra kia tamate i tetai o teia au mea ora.

 Ka takino ua rai te tangata i te enua? Me ka rauka ainei ia ratou i te noo ma te kore e takino i te au mea natura?

 Manganui te aronga kite tei irinaki e ka rauka i te tangata te paruru i te enua ma te kore e takino i te au mea natura. Karanga te aronga kimikimi e kia puapinga ta te tangata e rave ra, ka anoanoia te au taui anga ki teia au ngai i te taime okotai. Ka kapiti mai ki teia au taui anga te:

•   Akameitaki anga i te tu me akono i te enua, te au vao rakau, te au ngai varivari e te moana.

•   Taangaanga anga i te au ravenga tukeke no te tanutanu e te taangaanga meitaki i te au mea ka rauka mai te au energy.

•   Kai anga i te au kai tanutanu ma te akaiti mai i te kai anga i te kiko e te ika, kia akakore i te kaimoumou apinga.

•   Āriki anga kare e rauka mai te oraanga meitaki mei te maata anga o te au mea kopapa.

 Eaa toou manako? E mea tau ainei kia tapapa i te au kavamani, te au pitiniti, e tetai papaki kia akatupu i teia angaanga maata? Me kore i toou manako kare te reira e tupu no te noinoi maata, karapii, e te manako kino o tetai pae aronga?—2 Timoteo 3:1-5.

 Te akapapu maira te Pipiria kia tatou e ka vai tinamou te enua e tuatau ua atu. Te akamārama maira te reira i te tumu kare e rauka i te tangata te paruru i te enua, e te akakite maira i te au taui anga ka anoanoia. Te akaari katoa maira te reira akapeea teia au taui anga e tupu ei.

 Te tumu kare e rauka i te tangata te paruru i te enua. Kua anga te Atua ko Iehova a i te enua, e kua oronga aia i te reira ki te tangata kia akono. (Genese 1:28; 2:15) Ka puapinga ta ratou e rave ra me akara ratou ki Tei Anga no tana aratakianga e kia kauraro ki tana au ikuikuanga. (Maseli 20:24) Inara, kua patoi ratou ia Iehova e kua kimi i to ratou uaorai aerenga. (Koheleta 7:29) Me ko ratou anake, kare e rauka i te tangata i te akono i te enua, noatu me tauta pakari ratou kare te reira e manuia.—Maseli 21:30; Ieremia 10:23.

 Te au mea kia tauiia. Ka tāpu te Atua i te tangata mei te takino anga i te enua. (Apokalupo 11:18) Kare e ka vai ua te au kavamani e te au tangata te takino ra i te enua; mari ra ka mono aia i te reira. (Apokalupo 21:1) No teia tumu, karanga a Iehova: “I na, te akariro nei au i te au mea ravarai ei mea ou.”—Apokalupo 21:5.

 Akapeea teia taui anga me akatupuia. Ka mono a Iehova i te au kavamani o te tangata ki te Patireia o te Atua i te rangi. Na te reira kavamani, i raro ake i ta Iesu Karaiti aratakianga, e akono i te au mea o te enua.—Daniela 2:44; Mataio 6:10.

 Ka apii te Patireia o te Atua i te tangata kia akono i ta te Atua au kaveinga tuatua tika. Me kite te au tangata i Tei Anga ia ratou e tana aratakianga, ka rauka i reira ia ratou i te akono i teia enua ma te meitaki. (Isaia 11:9) Te akakite maira te Pipiria akapeea te kavamani o te Atua me akameitaki atu i te oraanga o te au tangata e te enua. Ka rave te reira i te ka aru mai:

•   Ka maata te kai na te katoatoa.—Salamo 72:16.

•   Ka akatupu ruperupe i te au mea natura.—Isaia 35:1, 2, 6, 7.

•   Ka ’au te tangata e te au manu.—Isaia 11:6-8; Hosea 2:18.

•   Ka akakore i te au tumatetenga i te pae o te reva.—Mareko 4:37-41.

 Kare e roa atu ka akatupu te Patireia o te Atua i teia au taui anga. No tetai au akakiteanga, e tatau i te atikara “Aea te Patireia o te Atua e Tutara ai te Enua?”