Eaa taau e manako ana me rongo koe i te tuatua “apokalupo”? Penei ka akamanako koe i tetai tumatetenga maata, penei ka ope te oraanga i te enua nei. Irinaki tetai pae e ka tupu tetai tumatetenga maata i teianei ao, me tatau ratou i te au nuti mei teia:

•   “Tamaki nukiria—me kua akamataia te reira ei mea akakoro, ma te tarevake, na roto i te tuatua oripu ua—ka tupu te reira.”—Bulletin of the Atomic Scientists.

•   “I te ngauru mataiti i topa ake nei kua tupu te au uriia maata, te au vaorakau kā, te au tuatau marō, kua teatea te au toka coral, te matangi vera, e te vaipuke takapini i te au enua.”—National Geographic.

•   “Kino tikai te au nuku tāpaki i Aperika i te au ngauru mataiti i topa.”—The Associated Press.

 Ka takoreia ainei te enua i roto i tetai apokalupo i te ao katoa? Eaa ta te Pipiria e karanga ra?

 Kare. Te akamaroiroi maira te Tuatua a te Atua, te Pipiria, e ka vai ua te enua e tuatau ua atu. (Koheleta 1:4) Kare te Atua e takore i te enua tana i anga, ka ‘takore ra aia i te aronga te takino ra i te enua.’—Apokalupo 11:18, NW.

 Kia tau ki te Pipiria, te “ao” te ka ope ko te au tangata i te ao nei tei kopae i te Atua e kua aruaru i to ratou uaorai anoano. Mei tana i rave i te tuatau o Noa, ka takore te Atua “i teianei ao akono kore i te Atua.”—2 Petero 2:5; 3:7.

 Mei ta 1 Ioane 2:17 e akakite ra, “te ngaro ke nei teianei ao, ma ta to reira katoa e anoano nei.” Te akaari maira teia irava e ka takore te Atua, kare te paraneta enua, mari ra te au tangata tei aruaru i to ratou uaorai anoano.

 Te akakite maira te Pipiria aea tikai te openga e tupu ei. (Mataio 24:36) Te akakite maira e te vaitata maira te reira. Te akakite maira te Pipiria i teia:

•   Ka tupu te au tamaki, te onge, te maki kino, e te ngaruerue enua kino “i tera ngai, i tera ngai.”—Mataio 24:3, 7, 14; Luka 21:10, 11; Apokalupo 6:1-8.

•   Ka tupu te au tu noinoi o te tangata. Ei akaraanga, ka riro ratou “ei noinoi” moni “ei mareka kore,” e te “mako kore.”—2 Timoteo 3:1-5.

 Te akatika ra te maata anga o te tangata e mei te 1914 mai, kua tano te au turanga o teianei ao ki ta te Pipiria i akakite mai e te vaitata maira te openga. Kia kite maata atu, akara i te au atikara “Eaa ta te Papaanga Pipiria e Akakite Maira no te Mataiti 1914?” e “Eaa te Akairo o te ‘au Ra Openga,’ me kore ‘te au Tuatau Openga’?”

 Te tuatua reo Ereni mua tei uriia “apokalupo” i roto i te Pipiria te aiteanga “akatueraanga” me kore “eeuanga.” E akataka putuputuia ana te reira tuatua e ko te akakiteanga i te au tuatua tei uunaia. Te tuatua katoa ra te Pipiria “kia mama mai [me kore apokalupo o] te Atu ra ko Iesu,” ka tupu te reira me akaariia a Iesu ma te mana te ka takore i te au kino katoatoa e kia tutaki i te aronga tei akamori i te Atua.—2 Tesalonia 1:6, 7; 1 Petero 1:7, 13.

 Te puka openga o te Pipiria ko A·po·kaʹly·psis, me kore Apokalupo, te akakite maira te reira i te au tupuanga no te tuatau ki mua. (Apokalupo 1:1) Tei roto te nuti meitaki e te karere manakonakoanga i te reira puka. (Apokalupo 1:3) Te akaari maira te reira e ka takore te Atua i te au tu tika kore katoatoa e ka akariro i te enua ei parataito. A te reira tuatau, kare te tangata e kite akaou i te mamae, e te mate.—Apokalupo 21:3, 4.

 Ka inangaro ainei koe kia apii maata i teia au taputou Pipiria manea? Te oronga nei te Au Kite o Iehova i tetai porokaramu apii Pipiria ei tauturu ia koe. E aravei atu ia ratou i teia rā.