Ka kino roa atu te kopapa e te manako me taitaia maata koe. Penei ka maata atu te manamanata taau e taitaia ra i to mua ana.

•  Kotinga i taau akarakara anga i te au nuti tau kore. Kare e anoanoia kia kite koe eaa ua atu te au nuti no runga i tetai tumatetenga. Me ka akara ua rai koe i te reira ka maata atu te mataku e te manata.

   Kaveinga Pipiria: “E marō ra te ivi i te ngakau taitaia.”—Maseli 17:22.

   “Mama ua i te inangaro i te akara putuputu i te au mea i runga i te initaneti no te au nuti ou e te au nuti kino, kare ïa i te mea meitaki. Kare au e manako taitaia ana me kotinga au i te akara i te au nuti.”—John.

   Akamanako ana: Ka anoanoia ainei kia kite pouroa koe i te au nuti ou?

•  Rave i te angaanga tei matauia. Tamata i te ara vave i te popongi, kaikai, rave i te angaanga, e kia aere e moe vave i te ora i akanooia. Me kua akanoo koe i tetai papaanga no te rave i te au mea meitaki, ka maru e ka iti mai te manako taitaia i roto i toou oraanga.

   Kaveinga Pipiria: “Te kimianga o te aronga maroiroi ra, tei runga ïa i te apinga maata.”—Maseli 21:5.

   “Te akamata anga te maki COVID-19, kare takiri au i aru ana i taku i akanoo kua kaimoumou au i toku taime ki te tamataoraanga. Inangaro au i te taangaanga meitaki i toku taime, no reira kua akanoo au i tetai papaanga no te au mea taku ka rave i te au rā ravarai.”—Joseph.

   Akamanako ana: E akanoonoo anga ainei taau ei tauturu ia koe kia rave i te reira i te openga o te rā.

•  Akamou i te manako ki te au mea meitaki. Me akamanako ua rai i te au mea tei tupu ana me kore ki te au mea kino te ka tupu mai, ka manamanata rai te manako. No reira, e akamanako e rua me kore e toru au mea taau e reka ana i te rave.

   Kaveinga Pipiria: “Kia mareka oki kotou.”—Kolosa 3:15.

   “Tatau anga i te Pipiria kua tauturu iaku kia kore au e akamanako i te au mea tau kore e kia akamou i te manako ki te au mea meitaki. Akaraanga ngatā ia ra, inara ka rauka te reira!”—Lisa.

   Akamanako ana: Ka akamanako ua rai ainei koe i te au mea tau kore e tupu ra i roto i toou oraanga e kua ngaropoina te au mea meitaki?

•  Kia akamanako i tetai ke. Auraka e akaatea ia koe uaorai—mama ua i te rave i te reira me manako taitaia koe—e akamanako i taau ka rave ei tauturu i te aronga te inangaro ra i te tauturu.

   Kaveinga Pipiria: “Auraka te tangata e akono i tona anake uaorai au mea, e akono katoa ra i to etai ke ra au mea.”—Philipi 2:4.

   “Mataora au me rave au i te au mea meitaki no tetai ke. Rave au i teia kia mataora ratou, e i taua taime rai, maru ua toku manata. No reira, kare oku taime kia manako taitaia.”—Maria.

   Akamanako ana: No runga i te aronga taau i kite, koai ma ia ratou te inangaro ra i te tauturu, e eaa te tauturu ka oronga koe kia ratou?

•  Kia maroiroi ua rai. Akamatutu i te kopapa e akangaroi. Kaikai meitaki. Me akono meitaki koe i toou kopapa ka meitaki mai toou oraanga e ka tauturu ia koe kia kore koe e manako taitaia.

   Kaveinga Pipiria: ‘Ko te akamātau i te kopapa nei, e puapinga to te reira.’—1 Timoteo 4:8.

   “Kare maua ko taku tamaiti e maroiroi ana i te aere ki vao i te akamatutu i te kopapa, no reira kua rave maua i te akamatutu i to maua kopapa i te kainga. Kua mataora maua i teia e kua tupu te aroa e te akakoromaki kia maua.”—Catherine.

   Akamanako ana: Ka anoanoia ainei kia kaikai meitaki koe e kia akamatutu i te kopapa kia oraora te kopapa?

 Kapiti mai kia aru i teia au tauturu ei akaiti mai i te manako taitaia, e maata te au tangata kua puapingaia te apiianga i ta te Pipiria taputou no te tuatau ki mua. Akara i te atikara “Eaa ta te Patireia o te Atua ka Akatupu?”