Ia Tiurai 2022, kua tupu te au pupui anga rikarika i teianei ao:

•   “Te pupuiia anga te tangata poritiki rongonui o Tiapani [te parai minita o mua ana ko Shinzo Abe] kua manata te enua tangata e kua poitirere te katoatoa i teianei ao, no te mea kare e tupu maata ana te au angaanga kikino i reira e e pakari te ture no te mou i te pupui.”—Tiurai 10, 2022, The Japan Times.

•   “Tumatetenga te iti tangata o Denmark e kua pupuiia e toru tangata e tetai tangata i ko i tetai are toa maatamaata.”—Tiurai 4, 2022, Reuters.

•   “I Aperika Apatonga: e 15 tei pupuiia e tetai tangata i ko i tetai are toa i Soweto.”—Tiurai 10, 2022, The Guardian.

•   “E 220 tuma tangata tei pupuiia e kua mate i Marike, no tetai pupui anga rikarika i te tuatau orote o Tiurai rā 4.”—Tiurai 5, 2022, CBS News.

 E manakonakoanga ainei tetai e ka ope teia au angaanga kikino? Eaa ta te Pipiria e akakite maira?

 Te akakite maira te Pipiria i to tatou tuatau e ko “taua tuatau openga ra,” ka rave te tangata i te au angaanga “rotoriri,” kino, e te vinivini. (2 Timoteo 3:1, 3) Kua akatupu te reira au angaanga kikino i te mataku ki te tangata. (Luka 21:11) Inara, te taputou maira te Pipiria i tetai tuatau e ka ope te au peu ta ua e ka “noo oki toku ra iti-tangata ki roto i te are au nuingangare, e te nooanga mataku kore e te ngai kanga koreia mai.” (Isaia 32:18) Akapeea te au peu ta ua e ope ei?

 Ka takore te Atua i te aronga kino e te au apinga tamaki.

•   “Ka tipu keia ra te aronga kino i te enua nei.”—Maseli 2:22.

•   Ka “akakore [te Atua] i te tamaki e tae rava akenei ki te openga enua; kua aati aia i te ana, e kua tipupu i te korare: e kua taʼuia te kariota ra i te ai.”—Salamo 46:9.

 Ka takore te Atua i te au tumu o te au angaanga kikino na te apii anga i te au tangata kia noo ’au ua.

•   “Kare ratou e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.”—Isaia 11:9.

•   I teianei, te apii ra te Atua i te tangata i teianei ao kia patoi i te au peu ta ua e te au apinga tamaki, kia “tupaki ratou i ta ratou au koke ei auri arote, e ta ratou au korare ei tipi tope ïa.”—Mika 4:3.

 Kia kite maata atu no runga i ta te Pipiria au taputou no tetai ao kare e mataku, e tatau i te atikara “Freedom From Fear—Is It Possible?”

 Kia kite maata atu e ka takoreia te au kino katoatoa, e tatau i te atikara “Peace on Earth at Last!”