I te Tapati, Noema 20, 2022, kua akamutu te COP27 United Nations Climate Change Conference. Noatu kua akatika ratou e ka orongaia tetai tuanga moni no te tauturu i te au enua te ka takinoia e te reva kino, e maata tei manako kare te reira e rapakau i te manamanata.

•   “Āriki au kia akanooia tetai moni no teia tumatetenga,” i na António Guterres ei, te secretary-general o te United Nations, ia Noema 19, 2022. “Te akara anga kare teia e rava . . . Tei roto to tatou paraneta i te tumatetenga.”

•   “Tei roto teianei ao i te tumatetenga reva kino.”—Mary Robinson, e peretiteni i mua ana no Ireland e te UN High Commissioner for Human Rights, Noema 20, 2022.

 Te manata nei te au mapu i to tatou paraneta. Ka rauka ainei i te au enua te angaanga kapiti ma te taputou kia rapakau i te tauianga o te reva kino? Eaa ta te Pipiria e akakite maira?

 Te akakite maira te Pipiria e noatu ta te tangata angaanga pakari e te tauta anga, kare e rauka ia ratou i te rapakau takiri i te manamanata o te reva kino. E rua tumu:

•   “Ko tei aupeupe ra, kare ïa e rauka i te akatika.”—Koheleta 1:15.

   Aiteanga: Kua kotingaia ta te au kavamani ka rauka i te rave no te mea kare tei te tangata kia tutara iaia uaorai. (Ieremia 10:23) Noatu me ka taokotai te au enua, kare e rauka ia ratou te rapakau i te au manamanata o teianei ao, noatu te tauta anga pakari.

•   “E riro te tangata nei ei akaperepere ia ratou uaorai, ei noinoi, . . . ei akaatikau koreromotu ra.”—2 Timoteo 3:2, 3.

   Aiteanga: Kua totou te Pipiria e manganui te tangata noinoi i teia tuatau e kare e angaanga kapiti no te akatupu i te meitaki.

 Kare tei te au kavamani a te tangata te akono i to tatou paraneta. Kua oronga mai te Atua i tetai Tutara meitaki, ko Iesu Karaiti. Akakite mai te Pipiria nona:

•   “Ei runga i tona ra pakuivi te [kavamani] vai ei: e tapaia tona ingoa ia Umere, Tumu Korero, te Atua Mana, te Metua no te Tuatau Mutu Kore, te Ariki no te Au.”—Isaia 9:6.

 Ko Iesu te Ariki o te Patireia o te Atua, e kavamani i te rangi. (Mataio 6:10) Tei iaia te mana, te pakari, e te anoano te akono i to tatou paraneta e te tangata. (Salamo 72:12, 16) I raro ake i tana tutara, ka takore teia kavamani o te rangi i te aronga e ‘takore nei i te enua’ e ka rapakau i te reva o teia paraneta.—Apokalupo 11:18; Isaia 35:1, 7.

 Kia kite maata atu i te rapakau anga no teia taui anga reva kino, e tatau i te atikara “Taui Anga Reva e to Tatou Tuatau ki Mua—Ta te Pipiria e Akakite Maira.”