Ko koe ainei tetai o te mirioni ua atu tei rokoia e te reva kino? Tukeke te au reva kino e ta te reira ka akatupu. Te matangi kino, te ua kino, te uriia, e te puaioio ka akatupu pouroa te reira i te tai ngaru, te vaipuke, e te takinokino anga. Ka akatupu te ua kino i te one enua kia neke, e ka akatupu te matangi kino i te uira, tupu atura te aʼi kā. Tupu katoa te kino mei te au ngai marō, te matangi vera, e te au uriia i te tuatau anu.

 I tetai au ngai i teianei ao, te kino ua atura te reva kino e te tupu putuputu ra te reira. “E maata katoa te tangata te takinokinoia ra e teia au tumatetenga natura,” i ripoti ei te International Federation of Red Cross e te au Red Crescent Society, “e maata ua atu te au vaipuke, te au uriia e te au ngai marō te takinokino ra i te oraanga o te tangata, e mirioni ua atu tei akaruke i to ratou kainga i teia au mataiti.”

 I muri ake i teia au tumatetenga, kua takinokinoia te tangata i te pae kopapa e te manako ngakau. Kua taitaia ratou no te mea kua takoreia ta ratou apinga, te kainga, e kua takake atu tetai tei akaperepereia.

 Me kua tupu te reva kino i toou ngai, ka riro te Pipiria ei tauturu ia koe. Te oronga maira te reira i te akapumaana anga, te manakonakoanga, e te akoanga tau, tei tauturu i te aronga tei rokoia e te tumatetenga natura. (Roma 15:4) Te pau katoa ra te reira i tetai uianga puapinga tei uiia e te tangata: Eaa te Atua i akatika ai i teia kia tupu—te akautunga maira ainei aia iaku?

 Te apii maira te Pipiria e kare na te Atua e tamamae nei i te tangata. Te akapapu maira “kare rava te Atua e vavare i te kino, kare rava oki aia e pikikaa i te tangata.” (Iakobo 1:13) Tera te aiteanga kare aia e akatupu ana i te reva kino i teia tuatau.

 Ae, kua akakite mai te Pipiria i to te Atua taangaanga anga i te au ririnui natura kia akautunga i te iti tangata kino. Inara kare mei te reva kino o teia tuatau, tei takinokino i te aronga meitaki e te aronga kino ma te kore e akamatakite anga. Te tuke, te akaari maira te au tua Pipira e kua paruru ua rai te Atua i te aronga meitaki, kua oronga aia i te akamatakiteanga i mua ake ana, e kua akamārama i te tumu no te reira. Ei akaraanga, kua akamārama te Atua eaa aia i apai mai ei i te Vaipuke ki te ao katoa i to Noa tuatau, kua oronga mai aia i te akamatakiteanga i mua ake ana, e kua paruru ia Noa e tona ngutuare tangata.—Genese 6:13; 2 Petero 2:5.

 Kia apii maata atu akapeea tatou e kite ei e kare te au tumatetenga natura o teia tuatau i te utunga na te Atua, akara i te atikara “What Does the Bible Say About Natural Disasters?”

 Te akakite maira te Pipiria ia Iehova a ei Atua akono e te tangi aroa. Akara i teia au irava akapumaana.

•   Isaia 63:9: “I to ratou katoa ra au mate” kua taitaia katoa te Atua.

   Aiteanga: Taitaia tikai a Iehova te kite i te aronga tei takinokinoia.

•   1 Petero 5:7: “Koia oki te tiaki mai ia kotou.”

   Aiteanga: Te maara maira a Iehova ia tatou.

 Na to Iehova tu tangi aroa e akakeu ana iaia. Te oronga maira Aia i te akapumaana anga na roto i te akoanga tau a te Pipiria e te manakonakoanga papu no te tuatau ki mua ma te kore e tumatetenga reva kino.—2 Korinetia 1:3, 4.

 Te akakite maira te Pipiria i ta Iehova taputou “kia oronga atu au ia kotou i te openga ta kotou i manako ra.” (Ieremia 29:11) Kua anoano aia i te tangata kia mataora te oraanga i te enua parataito, kare kia noo mataku ma te reva kino.—Genese 1:28; 2:15; Isaia 32:18.

 Ka akatupu te Atua i teia na roto i tona Patireia, e kavamani i te rangi te ka aratakiia e Iesu. (Mataio 6:10) E kite pakari to Iesu e te mana ririnui tei anoanoia kia akamutu i te au tumatetenga reva kino. Ia Iesu i te enua nei, kua akaari aia i tona ririnui kia akatere i te reva. (Mareko 4:37-41) Ka tutara aia ma te takinga meitaki e te pakari, kia apii i te tangata akapeea me akono i te ao rangi e kia noo rotai ki te reira. (Isaia 11:2) I raro ake i te aratakianga a Iesu, kare rava te tangata e takinokinoia e te reva kino.

 Penei ka manako koe, ‘Aea a Iesu e taangaanga ai i tona mana ririnui no te akatere i te reva?’ No te pauanga, akara i te atikara “Aea te Patireia o te Atua e Tutara ai te Enua?”

 Ka riro te akoanga a te Pipiria ei tauturu ia koe i mua ake, i te reira taime, e i muri ake i te reva kino.

•   I mua ake: Akapapa ma te rave viviki.

   Akakite te Pipiria: “E kite mamao te tangata pakari i te kino, e kua pipini iora; te aere ua atura te kite kore, e mate atura.”—Maseli 22:3.

   Aiteanga: Akapapa no te au tumatetenga ka tupu kia rauka ia koe te paruru viviki i toou ngutuare tangata.

   Tua: “I te rā i oro ei matou i te aʼi ka, kua papa matou. Kua papa ta matou au emergency go bag. Papa te au vairakau. Papa te kakau. Te ru ra te tangata i te pae mai, e kua ngaro te manako. Kua papa ta matou au mea tei anoanoia, e meitaki tikai te reira!”—Tamara, California, U.S.A.

•   I te reira taime: Akamanako i te au mea puapinga.

   Akakite te Pipiria: “E maata ua oki to te tangata nei apinga, kare oki tei taua apinga nona ra tona ora.”—Luka 12:15.

   Aiteanga: E puapinga atu te oraanga i te apinga.

   Tua: “Te takore anga a Typhoon Lawin b i to matou kainga, kua ngaro toku manako e eaa taku ka rave. Okotai aku mea i rave kua pure akatenga au ki te Atua ko Iehova. Akara au e apinga materia ua te reira e kare matou i mate.”—Leslie, Philippines.

•   I muri ake: Auraka e apiapi i to apopo.

   Akakite te Pipiria: “Auraka e apiapi i to apopo ra; na apopo e apiapi i tana uaorai.”—Mataio 6:34.

   Aiteanga: Auraka e manata kino i te au manamanata o te tuatau ki mua.

   Tua: “Muri ake te puke anga a Hurricane Irma i toku kainga, e maata toku au manako e kua apiapi kinoia au. Kua tauta au i te aru i te akoanga Pipiria auraka e apiapi i to apopo. Ma te tauturu a Iehova, kite mai au ka rauka iaku te akakoromaki maata atu.”—Sally, Florida, U.S.A.

 No te au tauturu tau, akara i te atikara “When Disaster Strikes—Steps That Can Save Lives.”