Me ruti koe i taau angaanga ka riro ei manamanata i te pae o te moni ki te oraanga katoa o toou ngutuare e toou uaorai oraanga kopapa e te manako ngakau. Na te aru anga i te au manako tei akanooia ki runga i te au kaveinga tau o te Pipiria e tauturu ei ia koe.

•   Tuatua ki etai ke no runga i toou manako.

   Karanga ra te Pipiria: “E aroa mairai te [taeake] i te au tuatau katoa ra.”—Maseli 17:17.

   Me ruti koe i taau angaanga, penei ka maromaroa, ka riririri, ka manamanata, me kare, ka manako puapinga kore koe ia koe uaorai. Me tuatua koe ki toou ngutuare e te au taeake no runga i toou manako, ka akamaroiroi mai ratou ia koe. Penei ka tauturu katoa ratou ia koe na te kimi anga i tetai angaanga ou naau.

•   Auraka e apiapi.

   Karanga ra te Pipiria: “Auraka e apiapi i to apopo ra; na apopo e apiapi i tana uaorai.”—Mataio 6:34.

   Te akamaroiroi maira te Pipiria ia tatou kia parani na mua. (Maseli 21:5) Inara, te akakite katoa maira te reira e auraka tatou e manamanata me kore e apiapi no te tuatau ki mua. Maata te taime manamanata ua ra tatou no runga i te au mea kare i tupu ake. E meitaki i te akamanako ua i to teia rā ua.

   Te oronga maira te Pipiria i te akoanga meitaki akapeea me akamaru mai i te taitaia. Kia kite koe e ka akapeea, e tatau i te atikara “Akapeea me Tamaru i te Taitaia.”

•   Taui i te tu e akapou ra koe i taau moni.

   Karanga ra te Pipiria: “E tika iaku . . . te taonga nui e te ngere.”—Philipi 4:12.

   E taui ki toou turanga ou. Ka o mai ki roto i teia tauianga, te tu e akapou ra koe i taau moni kia kore koe e kaimoumou i te reira. Kia matakite ra kia kore koe e ō atu ki roto i tetai āka kaiou.—Maseli 22:7.

   No tetai ua atu au manako akapeea me taui ki toou turanga ou i te pae o te moni, akara i te atikara “How to Live on Less.”

•   Taporoporo marie i toou tuatau.

   Karanga ra te Pipiria: “Ei aerenga akono meitaki to kotou . . . , ma te taporoporo oki i te tuatau.”—Kolosa 4:5.

   Noatu kare aau akanoonoo anga no te aere ki tetai ngai angaanga, e mea tau kia akapapa koe i tetai akanoonoo anga me taporoporo marie i toou tuatau. Me akapera koe, ka tauturu te reira ia koe i roto i toou oraanga e ka riro ei akamaroiroi anga ia koe.

•   Kia papa ua i te taui.

   Karanga ra te Pipiria: “E puapinga anake rai tei te au angaanga katoa ra.”—Maseli 14:23.

   Āriki ua rai i tetai angaanga ke atu kare koe i mātau ana. Penei ka rave koe i te au angaanga kare e meitaki roa ana, me kore manga ua te moni ka koi mai koe i to mua ana.

•   Auraka e tuku i te ‘au.

   Karanga ra te Pipiria: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu.”—Koheleta 11:6.

   Tauta i te kimi i tetai angaanga. Akakite ki tetai ke e te kimi ra koe i tetai angaanga. E tuatua ki toou pamiri, au oa, au oa angaanga takere, e toou tangata tupu. Akara ki roto i te au ngai akakitekite anga angaanga, te au nuti pepa, i runga i te maramarama o te are toa e te au website a te au kamupani. Kia papa ua koe i te aere ki te au uiuianga no te angaanga e te tuku anga i taau au résumé i mua ake ka rauka mai ei tetai angaanga.