“Te tupu viviki nei te tumatetenga i te pae o te reva. Kua kī te au oire maata i te vai. Maata te au matangi vera e tupu ra. Te au uriia rikarika. Kare e rava ana te vai. Matemate te au mea ora tukeke te au rakau e te au manu. Kare teia i te au tua maani ua. Te akakite mai nei te aronga taieni ka tupu teia mei ta tatou taangaanga anga i te au mea o te energy.”—Ako na António Guterres, te tekeretere tianara o te United Nations, no runga i te Intergovernmental Panel on Climate Change tei ripotiia mai ia Aperira 4, 2022.

 “Te akamatakite mai nei te aronga taieni no te au tupuanga kino ka tupu mai mei te taui anga reva ka tupu te reira ki te 423 ngai vaorakau manea [i Marike ua], tei mama ua i te tauiui i te aerenga o te reva. Ka tatauia teia au tumatetenga mei tetai irava Pipiria rai: tupu te aʼi kā e te vaipuke, taʼe te aiti, taʼi akaki e te matangi vera.”—“Flooding Chaos in Yellowstone, a Sign of Crises to Come,” The New York Times, Tiunu 15, 2022.

 Ka rauka ainei i te akatikatikaia i te au manamanata o te reva i te enua nei? Me ka rauka, naai e rave i te reira? Akamanako ana i ta te Pipiria e akakite maira.

 Akakite maira te Pipiria e na te Atua e ‘takore i te aronga e takore ra i te enua.’ (Apokalupo 11:18, NW) Te apii mai nei teia irava Pipiria e toru manako:

1.  1. Kua akatupu te tangata i te kino maata ki te enua.

2.  2. Ka ope te takino anga i te enua.

3.  3. Na te Atua, kare na te tangata, e akatikatika i te au manamanata o te reva i te enua nei.

 Karanga maira te Pipiria no te “enua nei, te vai ua nei rai ïa.” (Koheleta 1:4) Ka vai ua rai e tuatau ua atu.

•   “Ka riro te enua no te aronga tuatua-tika, ka noo tamou rai ratou i reira.”—Salamo 37:29.

 Ka akameitaki akaouia te enua.

•   “Te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.”—Isaia 35:1.