Te riro nei te tamaki i Ukraine, e te taui anga reva, ei takino i te au putunga kai i teianei ao. Te tupu nei teia i te au enua kare te kai e rava ana.

•   “Te tamanata nei te tamaki, te taui anga reva, e te oko maata i te inu no te au putunga kai.”—António Guterres, UN secretary-general, Tiurai 17, 2023.

•   “Akakite te aronga kimikimi te akamutu anga a Rutia te tuku kai kua takino te reira i te au putunga kai ki teianei ao e e oko maata te reira i te au enua e iti ua te puapinga, mei ia Aperika Apatokerau e te Middle East.”—Atalayar.com, Tiurai 23, 2023.

 Akamanako ana i ta te Pipiria i akakite no te turanga kino o te kai e te tuatau ki mua.

•   Totou a Iesu: “E tu mai tetai enua e tamaki mai ki tetai enua, e tetai basileia e tamaki mai ki tetai basileia: e onge oki.”—Mataio 24:7.

•   Te akakite ra te puka Pipiria o Apokalupo e ā au akaoro oroenua akatutu ua. E tai te akatutu ra i te tamaki. I muri ake i te reira te akatutu ra i te onge, e tuatau e iti ua te kai e te oko maata.“Kua akara atura au, e i na, e oroenua kerekere; e e arite tei te rima o tei noo ki rungao . . . Te na ko anga e, okotai arite sitona okotai denari, e e toru arite kerite okotai denari.”—Apokalupo 6:5, 6.

 Te akatupuia nei teia au totou Pipiria no te turanga kino o te kai tei karanga te Pipiria ko “taua tuatau openga.” (2 Timoteo 3:1) Kia kite maata atu i “taua tuatau openga” e te akaoro o te nga akaoro oroenua e ā o Apokalupo, akara i te vitio Kua Taui Teianei Ao Mei te 1914 Mai e oti tatau i te atikara “Te Akaoro Oroenua e Ā—Koai ma Ratou?”

•   Tei roto i te Pipiria te au tauturu meitaki kia akakoromaki tatou i te au manamanata, mei te oko maata e te rava kore o te au kai. Akara i te au akaraanga i roto i te atikara “Oraanga e Iti Ua te Moni.”

•   Te oronga maira te Pipiria i te manakonakoanga e ka meitaki akaou te oraanga. Te taputou maira “e manga sitona okotai rima i ki i te enua nei” e e maata te kai na te katoatoa. (Salamo 72:16) Kia kite maata atu i teia manakonakoanga no te tuatau ki mua e kia irinaki koe i te reira, tatau i te atikara “Manakonakoanga Meitaki no te Tuatau ki Mua.”