Neke ki te tumu manako rikiriki

Neke ki te ngai o te au tumu tuatua

Taui Anga Reva e to Tatou Tuatau ki Mua—Ta te Pipiria e Akakite Maira

Taui Anga Reva e to Tatou Tuatau ki Mua—Ta te Pipiria e Akakite Maira

 “Te tupu nei te tumatetenga no te taui anga reva. Kare e marikoanga te enua.”—The Guardian.

 Te tumatetenga nei te tangata ravarai. Āriki te maata anga o te aronga taieni e na te tangata i akatupu i te taui anga reva kino i teianei ao. Kua riro teia turanga ei taui maata i te reva e kua akatupu i te au tumatetenga natura. Ka kapiti mai teia i te ka aru mai:

  •   Tupu putuputu te au reva kino e te pakari, mei te matangi vera, te au enua maro, e te au uriia, tei akatupu i te vaipuke e te aʼi kā.

  •   Taʼe te au glacier e to te Arctic.

  •   Tupu te tai akaki.

 Kua tupu teia tumatetenga i te pae o te reva ki te enua katoa. I muri mai i te tataanga no runga i te au turanga e tupu nei ki te 193 enua, kua akakite tetai ripoti a te New York Times e: “Te kapiki tauturu SOS nei te enua.” No te au mate e te kino e tupu nei mei te taui anga reva, karanga te World Health Organization i te reira “e ko tetai mea kino roa atu ki te oraanga o te tangata.”

 Inara, e tumu meitaki ta tatou kia tapapa i te tuatau ki mua ma te papu tikai. Kua totou te Pipiria i te au mea e tupu nei i teia rā, e pera eaa ta te Atua ka rave kia paruru i to tatou oraanga a te tuatau ki mua.

Te akatupu ra ainei te taui anga reva i te au totou Pipiria?

 Ae. Te au tumatetenga natura e tupu nei no te taui anga reva kino te akatupu ra i ta te Pipiria i totou no to tatou tuatau.

 Totou: Ka ‘takore te Atua i te aronga e takore ra i te enua.’—Apokalupo 11:18, NW.

 Kua totou te Pipiria i tetai tuatau ka takino te tangata i te enua. Mei te taui anga reva i teianei ao, te takino nei te tangata ma te maata i te enua i teia rā.

 Te akaari mai nei teia totou i tetai tumu kare e rauka i te tangata i te paruru i te enua. Ka tāpu te Atua i te au tangata “e takore ra i te enua.” Noatu te au akakoroanga tau o te tangata kia akakore i te taui anga reva, kare te reira e rava no te katoa anga o te tangata e takino ra i te enua.

 Totou: “E te mea rikarika.”—Luka 21:11.

 Kua totou te Pipiria i “te mea rikarika,” te au tupuanga vinivini, i to tatou tuatau. Kua akatupu te taui anga natura i te au reva rikarika e te tuke ua akerai i teianei ao. Teia rā, te tupu nei te taitaia maata i te pae o te reva ki te tangata—e maki mataku e ka takoreia te ao rangi.

 Totou: “Ka tupu te kino maata i taua tuatau openga ra, kia kite mai koe. E riro te tangata nei ei akaperepere ia ratou uaorai, ei noinoi, . . . ei viivii, . . . ei akaatikau koreromotu ra, . . . ei pikikaa, ei māro.”—2 Timoteo 3:1-4.

 Kua totou te Pipiria i te au peu e te au tu o te tangata tei akatupu i te au tumatetenga i te pae o te reva. Kua tuku te au kavamani e te au pitiniti i to ratou au anoano o te moni na mua ake e kua pikikaa i te anoano o te au uki a muri mai. Noatu kua angaanga kapiti ratou, kare ratou e rotai ana no runga i ta ratou ka rave kia akamutu i te taui anga reva kino i teianei ao.

 Te akaari mai nei teia totou e kare te maata anga o te tangata e taui i to ratou tu e kia paruru i te enua. Mari ra, te karanga ra te Pipiria no te au tangata te akaari ra i teia au tu ka “tupu rai to ratou kino, e e maata atu.”—2 Timoteo 3:13.

Eaa tatou i papu ei ka rave te Atua i tetai angaanga

 Te akakite maira te Pipiria e kua inangaro te Atua ko Iehova a, Tei Anga ia tatou, i te paruru i to tatou enua e te aronga e noo ra ki reira. Akamanako ana e toru irava Pipiria no ta te Atua i rave.

  1.  1. ‘Kare ra te Atua i anga i te enua ei mea puapinga kore ua; kua anga ra aia kia tangataia.’—Isaia 45:18.

     Ka akatupu te Atua i tona akakoroanga no te enua. (Isaia 55:11) Kare aia e tuku i te reira kia takoreia e kia kore e tangataia.

  2.  2. “Kareka te aronga maru ra, ka noo ïa i te enua, e ka rekareka ratou i te maata o te au ra. Ka riro te enua no te aronga tuatua-tika, ka noo tamou rai ratou i reira.”—Salamo 37:11, 29.

     Taputou mai te Atua e ka noo tamou marie te tangata ki runga i te enua ma te ’au.

  3.  3. “Ka tipu keia ra te aronga kino i te enua nei.”—Maseli 2:22.

     Taputou mai te Atua i te tipu ke i te aronga kino, kapiti mai i te aronga te takino ra i te enua.

Ta te Atua ka rave no to tatou tuatau ki mua

 Akapeea te Atua me akatupu i tana au taputou no te enua? Ka rave aia i teia na roto i tetai kavamani i teianei ao, ko te Patireia o te Atua. (Mataio 6:10) Ka tutara mai te reira Patireia mei te rangi mai. Kare te reira e piri atu ki te au kavamani o te tangata no runga i te au manako o te enua e to te reva. Mari ra, ka mono te Patireia o te Atua i te au kavamani a te tangata.—Daniela 2:44.

 Te Patireia o te Atua e nuti meitaki ïa ki te tangata ravarai e te enua natura. (Salamo 96:10-13) Akamanako ana i ta te Atua ko Iehova ka rave na roto i tona Patireia.

  •   Akameitaki akaouia te au reva

     Ta te Pipiria e akakite ra: “Te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.”—Isaia 35:1.

     Te aiteanga no to tatou tuatau ki mua: Ka rapakau a Iehova i te enua, e pera te au ngai tei takinoia e te tangata.

  •   Akatere i te au reva kino

     Ta te Pipiria e akakite ra: “Kua akariro [a Iehova] i taua uriia ra ei marino; e tona au kare ra, kua akamutekiia ïa.”—Salamo 107:29.

     Te aiteanga no to tatou tuatau ki mua: Tei ia Iehova te mana no te akatere i te au reva. Kare te tangata e mamae akaou mei te au reva kino.

  •   Apii akapeea me akono meitaki i te enua

     Ta te Pipiria e akakite ra: “E apii atu au ia koe, e akakite atu ei kia koe i taau arataa kia aere ra.”—Salamo 32:8.

     Te aiteanga no to tatou tuatau ki mua: Kua oronga mai a Iehova i te apainga ki te au tangata kia akono i te enua. (Genese 1:28; 2:15) Ka apii mai aia akapeea tatou me akatupu i teia tuanga ei aronga akono i tana au mea i anga, te au mea natura.

a Ko Iehova te ingoa o te Atua. (Salamo 83:18) Akara i te atikara “Koai a Iehova?