KIA MATAKITE!
Ka Rauka Ainei i te World Cup te Taokotai i te Tangata?—Eaa ta te Pipiria e Akakite Maira?
Mei te rima pirioni tangata tei akarakara atu i te FIFA World Cup i roto ia Noema 20 kia Titema 18, 2022. E manganui tei manako e e maata atu ta te tarekareka tipoti ka akatupu i te pae i te taokotai i te tangata e akarakara atura.
“E mana to te tarekareka tipoti te taui i teianei ao. E mana to te reira kia akamaroiroi. E mana to te reira kia taokotai i te tangata.”—Nelson Mandela, te peretiteni i mua ana o South Africa.
“Tueporo . . . ka taokotai ma te manakonakoanga, ka taokotai ma te rekareka, ka taokotai ma te inangaro, ka taokotai ma te aroa, pera te iti tangata tukeke.”—Gianni Infantino, peretiteni o te FIFA. a
Ka rauka ainei i te World Cup me kore tetai ua atu tarekareka tipoti te akatupu i teia au akakoroanga teitei? E manakonakoanga ainei tetai no te tu au e te taokotai?
Ka taokotai ainei te reira i te tangata?
E maata atu ta te World Cup i akatupu i teia mataiti. Kua akatupu te reira i te au manamanata o te tangata e te poritiki pera te au tikaanga o te tangata, te iriiri tangata, e te papaki tai o te puapinga o te moni.
Ae, e reka ana te tangata i te akarakara i te tarekareka tipoti i te ao katoa mei te World Cup. Inara, noatu eaa te tu, kare e rauka i teia au tarekareka anga te akataokotai i te tangata. Mari ra, ka akaari mai te reira i te au tu e te au angaanga kino ta te Pipiria i akakite, ei akairo no te tuatau tei kapikiia ko te “tuatau openga.”—2 Timoteo 3:1-5.
Te Manakonakoanga te ka Taokotai i Teianei Ao
Tei roto i te Pipiria te manakonakoanga tika tikai te ka taokotai i te ao katoa. Te taputou maira te reira e ka taokotai te tangata ravarai i te enua nei ki raro ake i tetai kavamani i te rangi tei kapikiia ko “te Basileia o te Atua.”—Luka 4:43; Mataio 6:10.
Te Ariki o te reira Basileia, ko Iesu Karaiti, nana e akatupu i te au i te ao katoa. Akakite te Pipiria:
“E ruperupe ei te aronga tuatua-tika; e maata roa oki te au.”—Salamo 72:7.
“Ko tei putaua ra me kapiki maira, nana ïa e akaora . . . Ka akaora aia i to ratou vaerua i te takinga-kino e te rotoriri.”—Salamo 72:12, 14.
I teia tuatau, kua taokotai takere te au apiianga a Iesu e mirioni ua atu tangata i te 239 au enua. Kua apii ratou te akakore i te tu makitakita. Kia kite maata atu, tatau i te au tuanga atikara “Takore i te Tu Makitakita.”
a Fédération Internationale de Football Association, the international governing body for association football (soccer).