Ia Tiurai 2022, kua ripotiia e te vera ua atura te reva i teianei ao:

•   “Akakite maira to Tinito e te vera ua atura te reva i roto i tetai 70 oire e ko te rua taime teia i te marama te tupuanga te matangi vera.”—Tiurai 25, 2022, CNN Wire Service.

•   “Kā te ai i roto i te vao rakau i Europa no te vera i te reva tei akatupuia e te matangi vera.”—Tiurai 17, 2022, The Guardian.

•   “Kua tupu te reva vera ki te au oire i Marike i te Tapati mei te matangi vera i te tuatau maana tei tupu i te Tua Itinga ki tetai au ngai i te Apatonga e te Tua Opunga.”—Tiurai 24, 2022, The New York Times.

 Eaa te aiteanga o teia au mea pouroa? Ka riro ainei te enua ei ngai kare e tau kia nooia? Eaa ta te Pipiria e akakite maira?

 Ae. E tuanga te au matangi vera no te au tupuanga tei totouia i roto i te Pipiria no to tatou tuatau. Ei akaraanga, kua totou a Iesu e ka kite tatou i te au “mea rikarika,” me kore “te au mea tuke ua akerai e te vinivini.” (Luka 21:11; Good News Translation) Kua akakeu te kake anga o te vaito reva i te manganui kia mataku e te takino nei te tangata i te enua.

 Kare. Kua anga te Atua i te enua ei kainga tinamou no te tangata. (Salamo 115:16; Koheleta 1:4) Kare e ka tuku ua atu i te tangata kia takino i te reira, ka “takore [aia] i te aronga e takore ra i te enua,” mei tana i taputou mai.—Apokalupo 11:18, NW.

 Akara ana e rua totou te akaari maira i tetai atu au taputou a te Atua:

•   “Te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.” (Isaia 35:1) Kare te Atua e akariro i te enua ei metepara kare e tau kia nooia, mari ra ka akameitaki akaou i te au ngai kare e nooia ana.

•   “Kua atoro mai koe e kua akamauu i te enua; kua maata roa i te meitaki.” (Salamo 65:9) Ma te akameitakianga a te Atua, ka akariro akaouia te enua ei parataito.

 Kia kite maata atu akapeea te taui anga reva i te akatupu anga i te totou Pipiria, e tatau i te atikara “Taui Anga Reva e to Tatou Tuatau ki Mua—Ta te Pipiria e Akakite Maira.”

 Kia kite maata atu i te au taputou Pipiria e ka akameitaki akaouia te reva, e akara i te atikara “Naai e Paruru i te Enua?”