Ka Rongoia Ainei te Kapiki Anga no te Tu Tika?
E tupu putuputu ana te tu tika kore. Akamanako ana e rua akaraanga mei te akavaanga tuanga paruru:
Ia Tianuare 2018, kua akaue te akavanui o Marike kia tukuia tetai tangata kia aere, kua pou iaia e 38 mataiti ki roto i te areauri. Na roto i te DNA kua akakoreia tana utunga.
Ia Tepetema 1994, e toru mapu tane i tetai enua Aperika tei tiriaia ki roto i te areauri no te mea kare ratou e aere ki te tamaki. Mei ia Tepetema 2020, e 26 o ratou mataiti ki roto i te areauri e kare o ratou apa ke atu ki mua i te akavaanga.
Me kua takinokinoia koe no te tu tika kore, penei ka manako koe mei te tangata ko Iobu i te tuatau o te Pipiria, tei karanga: ‘Te kapiki nui nei au, kare ra e tu tika.’ (Iobu 19:7) Noatu eaa te tu, te taputou maira te Pipiria e te vaira te tuatau ka rongoia te kapiki anga no te tu tika. Ka riro te pakari o te Pipiria ei tauturu ia koe kia akakoromaki i te tu tika kore i teianei.
Eaa te akatupu ra i te tu tika kore?
Na te aronga tei patoi i te arataki anga a te Atua e akatupu ra i te tu tika kore. Te akaari maira te Pipiria e no ko mai te tu tika mou i te Atua. (Isaia 51:4) I roto i te Pipiria, aiteite ua teia nga tuatua tei uriia ‘tika’ e te “tuatua-tika.” (Salamo 33:5) Te au angaanga tuatua tika me kore tika e te tau ki te au turanga o te Atua, ka akatupu te reira i te tu tika. Ei akaaite anga, no roto mai te tu tika kore i te tu ara, koia oki te aati anga i te au turanga tuatua tika o te Atua. Akamanako ana i teia au akaraanga:
Manako ua ia koe uaorai. Aiteite ua te manako ia koe uaorai e te tu ara. (Iakobo 1:14, 15) Kia rauka ta ratou e inangaro ra, ka takinokino tetai pae i tetai ke. Inara, te inangaro ra te Atua ia tatou kia tuku i tetai ke na mua.—1 Korinetia 10:24.
Kopaeia. Penei ka takinokino tetai pae i tetai ke ma te kite kore, inara e au tu ara katoa te reira ki te Atua. (Roma 10:3) Te tika, kua riro te tu kopae ei akatupu i te tu tika kore nunui rava atu—te tamate angaia a Iesu Karaiti.—Angaanga 3:15, 17.
Puapinga kore te akatereanga a te tangata. Tano anga tikai, ka akatupu te au akatereanga poritiki, pae puapinga, e te akonoanga i te tu tika e ka akono i te tangata. Inara, te maata anga o te taime, na teia au akatereanga e rave ana i te au tarevake, te pikikaa, te papaki tai, te noinoi, e kua puapinga kore te turanga moni, e kua kopae i te tangata—ka akatupu teia i te tu tika kore. Kua akanooia tetai o teia au akatereanga e tetai aronga ma te manako meitaki. Inara, pouroa te au tauta anga a te tangata tei kopae i te arataki anga a te Atua kua kinokino te reira.—Koheleta 8:9; Ieremia 10:23.
Te kite maira ainei te Atua i te tu tika kore?
Ae, te makitakita ra aia i te tu tika kore e te au tu e te au angaanga te akatupu ra i te reira. (Maseli 6:16-18) Tata te peroveta tei akauruia ko Isaia e: “Ko au ko Iehova a tei inangaro i te tuatua-tau, e mea makitakita naku te [keikeia] e te takinga-kino.”—Isaia 61:8.
Te akaari maira te Ture ta te Atua i oronga ki te ngati Iseraela i taito e kua inangaro aia i te tangata kia taangaanga i te tu tika. Kua akaue aia i to ratou aronga akava auraka e āriki i te au tutaki pikikaa e tetai au angaanga pikikaa. (Deuteronomi 16:18-20) Kua akaapa aia i te au Iseraela tei akarongo kore kiaia na te takinokino anga i te putaua e te aronga akaaka, e kua kopae aia i te aronga tei kore i akono i tana au turanga tika.—Isaia 10:1-3.
Ka takore ainei te Atua i te tu tika kore?
Ae. Na roto ia Iesu Karaiti, ka takore te Atua i te ara, te tumu o te tu tika kore, e ka riro akaou te tangata ei aronga apa kore. (Ioane 1:29; Roma 6:23) Kua akanoo katoa aia i tetai Patireia te ka apai mai i te ao ou tuatua tika. (Isaia 32:1; 2 Petero 3:13) Kia apii maata atu no runga i teia Patireia i te rangi, akara i te vitio Eaa te Patireia o te Atua?
Eaa te tu o te oraanga i roto i te ao ou tuatua tika?
Me tupu te tu tika i te enua nei, ka tupu te ‘au e te tinamou. (Isaia 32:16-18) Akaperepere te Atua i te tangata katoatoa, e ka akono ia ratou. Ka kore rava te maromaroa, te aue, te mamae tei akatupuia e te tu tika kore, e ka kore katoa te au manako mamae tei tupu mai mei te reira. (Isaia 65:17; Apokalupo 21:3, 4) Kia kite maata atu, akara i te atikara “Eaa ta te Patireia o te Atua ka Akatupu?”
Ka irinaki ainei koe i ta te Atua taputou no tetai ao kare e tu tika kore?
Ae. Ka irinakiia te Pipiria no te mea kua papu e kua rotai te totou, te tuatua enua e te tuanga taieni, e ka rauka ia koe te irinaki i tana au taputou. Teia te au tauturu ei akapapu i te reira:
Akapeea te patoi anga i te tu tika kore i teia taime tikai?
Kua tauta te aronga meitaki o te tuatau Pipiria kia kore te tu tika kore e tupu kia ratou. Ei akaraanga, kua takinokinoia te apotetoro ko Paulo, ma te akavaaanga tika kore e naringa kare kua mate rai aia. Kare aia i āriki ana i te reira tu tika kore, kua taangaanga aia i te tauturu o te ture e kua pati kia Kaisara.—Angaanga 25:8-12.
Pouroa ta te tangata tauta anga kia akatikatika i te au tu tika kore katoatoa, ka puapinga kore te reira. (Koheleta 1:15) E manganui tei kite mai e na te akaketaketa anga i to ratou akarongo ki roto i ta te Atua taputou no tetai ao ou tuatua tika, kua akapumaana te reira ia ratou e kua rauka te manako ‘au noatu te tu tika kore.
a Ko Iehova to te Atua ingoa.—Salamo 83:18.