KIA MATAKITE!
E Tirioni Ua Atu Moni Tei Pou no te Tamaki—Eia Tikai Tei Pou?
E maata tei pou no te tamaki.
“Kua pou e $2.2 tirioni moni no te au tamaki i teianei ao.”—The Washington Post, Peperuare 13, 2024.
I te pae i te moni e maata te kino tei tupu. Akamanako ana i tetai akaraanga: Te tamaki i Ukraine.
Te au vaeau. Kua tamanakoia, e vaitata i te 500,000 au vaeau tei matemate e tei kinokino mei te taime i akamata ai te tamaki e rua mataiti i teianei.
Te au tangata. Tere atu i te 28,000 tei matemate e tei kinokino, i na te United Nations ei. Inara, kua akakite tetai akaaere o te UN e: “E kino tikai ta teia tamaki i akatupu ki runga i te iti tangata.” a
E kino tikai te takinokino anga ta teia tamaki i akatupu i teianei ao.
114 mirioni. Te numero o te tangata tei takinokinoia e te tamaki e te ta ua i teianei ao mei ia Tepetema 2023.
783 mirioni. Te numero o te tangata tei rokoia e te onge. “Na te tamaki e akatupu nei i te onge, e e 70 patene o te tangata i teianei ao e onge nei i te au ngai te tupu ra te tamaki e te ta ua.”—World Food Programme.
Ka ope ainei te tamaki? Ka tupu ainei te ‘au? Ka taangaangaia ainei te au tauturu maata a teianei ao no te rapakau i te onge e te putaua? Eaa ta te Pipiria e akakite maira?
E tuatau tamaki
Kua totou te Pipiria e ka tupu te tamaki i teianei ao, na te akatutu anga i tetai tangata akaoro oroenua.
“Kua aere atura tetai oroenua kutekute: e e mana tei orongaia mai no tei noo i rungao ra, kia apai ke i te au i te ao nei, e kia ta te tangata ia ratou uaorai: e e koke maata tei orongaia mai nana.”—Apokalupo 6:4.
I muri ake i teia tangata akaoro oroenua kua aru mai e rua tei akatutu i te onge e te mate no te maki e te vai atura. (Apokalupo 6:5-8) Kia kite maata atu no runga i teia totou Pipiria e eaa tatou i papu ei e te akatupuia ra teia i teia rā, e tatau i te atikara “Te Akaoro Oroenua e Ā—Koai ma Ratou?”
E tuatau ’au ki mua
Kare e roa atu ana, kare te au tauturu a teianei ao e taangaanga akaouia no te tamaki. E kare na te tangata e rave i teia. Te karanga ra te Pipiria:
Ka “akakore [te Atua] i te tamaki e tae rava akenei ki te openga enua.”—Salamo 46:9.
Ka takore te Atua i te au kino o te tamaki. “E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:4.
Ka akamoeau te Atua i te katoatoa. “E noo oki toku ra iti-tangata ki roto i te are au nuingangare, e te nooanga mataku kore e te ngai kanga koreia mai.”—Isaia 32:18.
I roto i te totou Pipiria, te akaari maira te tamaki e te kino ta tatou e kite nei i teia rā e te vaitata maira te tuatau ’au.
Akapeea te Atua me akatupu i te ’au a te tuatau ki mua? Ka rave aia i teia na roto i tana kavamani i te rangi, koia te Patireia. (Mataio 6:10) Kia kite eaa teia Patireia e tona aiteanga noou, akara i te vitio poto Eaa te Patireia o te Atua?
a Miroslav Jenca, United Nations tekeretere tauturu maata no Europe, Titema 6, 2023.