KIA MATAKITE!
Tomoia a Ukraine e Russia
I te popongi roa o Peperuare 24, 2022, kua tomo te vaeau o Russia ia Ukraine, noatu te tauta anga a te au arataki o teianei ao te tapu i te reira. Eaa ta teia tamaki ka akatupu i teianei ao? Karanga te secretary-general o te United Nations, ko António Guterres, i tetai nga rā i topa ake nei: “Te takinokino anga ka tupu ki te tangata, te takore anga i te turanga tinamou o Europe e teianei ao, e mea kino roa no te akamanako atu.”
Eaa te aiteanga o teia i roto i te Pipiria?
Kua totou a Iesu Karaiti i tetai tuatau me “tu mai tetai enua e tamaki mai ki tetai enua, e tetai basileia e tamaki mai ki tetai basileia.” (Mataio 24:7) Tatau i te atikara “Eaa te Akairo o te “au Rā Openga,” me kore “te au Tuatau Openga”?” kua akakite te Pipiria e te akatupu ra teia au tamaki i ta Iesu totou.
Kua akakite mai te puka Pipiria o Apokalupo i te tamaki no “tetai oroenua kutekute” e ka “apai ke i te au i te ao nei.” (Apokalupo 6:4) Tatau i te atikara “Te Akaoro Oroenua e Ā—Koai ma Ratou?” tei totou i teia au tamaki i teia rā.
Kua totou te puka a Daniela i tetai tauetono anga i rotopu i “te ariki no apatokerau” e “te ariki i apatonga.” (Daniela 11:25-45) Akara i te vitio Totou Akatupuia—Daniela Pene 11 e kua akatakaia a Rutia e tona au pupu ei ariki no apatokerau. a
Te akakite katoa maira a Apokalupo i “te tamaki i taua rā maata o te Atua Mana Katoatoa ra.” (Apokalupo 16:14, 16) Inara, kare teia tamaki i rotopu i te au pa enua o teianei ao mei ta tatou e kite nei. Tatau i te atikara “Eaa te Tamaki o Aramagido?” kia kite maata atu i teia.
Ka rauka te oraanga meitaki a te tuatau ki mua?
Karanga te Pipiria e ka “akakore [te Atua] i te tamaki e tae rava akenei ki te openga enua.” (Salamo 46:9) Tatau i te atikara “Oraanga Meitaki no te Tuatau ki Mua” kia kite i ta te Atua au taputou no te tuatau ki mua.
Kua apii a Iesu i tana au pipi kia pure, kia tae mai te Patireia o te Atua. (Mataio 6:9, 10) Teia Patireia, e kavamani i te rangi te ka akatupu i to te Atua anoano no te enua, e kia noo ‘au te ao katoa. Kia kite akapeea koe e puapinga ai mei teia Patireia, akara i te vitio Eaa te Patireia o te Atua?
Tere atu i te 129,000 Au Kite o Iehova i Ukraine. Mei te Au Kite i te au enua ravarai, ka aru ratou ia Iesu kia vai takake e kare e piri ki roto i te tamaki. (Ioane 18:36) I te ao katoa, te tutu aere nei te Au Kite o Iehova i te “evangelia o te basileia” ei rapakau i te manamanata o te tangata e pera te tamaki. (Mataio 24:14) Te patiia atu nei koe kia aravei mai ia matou kia apii i te manakonakoanga meitaki o te Pipiria.
a No tetai uriurianga no teia totou, akara i te atikara “‘Te Ariki no Apatokerau’ i te Tuatau Openga” e “Koai ‘te Ariki no Apatokerau’ i Teia Tuatau?”