KIA MATAKITE!
Vera Kino te Tuatau Maana 2023—Eaa ta te Pipiria e Akakite Ra?
Te akakoromaki nei te tangata i teianei ao i tetai vera kino e te au tumatetenga natura kino. Akara i teia au ripoti:
“Ko te Tiunu vera kino roa atu teia mei te taime i rekotiia ai te reira i teianei ao e 174 mataiti i topa.”—National Oceanic and Atmospheric Administration, U.S. Department of Commerce, Tiurai 13, 2023.
“Te tupu nei te vera kino i Itaria, Paniora, Varani, Tiamani e Porani e ka kino ua atu te reira mei te 48°C i te enua ko Sicily e Sardinia – ko te reva vera roa atu teia tei rekotiia i Europa.”—European Space Agency, Tiurai 13, 2023.
“I te paraneta e vera atura, ka kite tatou i te ua kino, pakari e te putuputu, e ka puke maata te vai.”—Stefan Uhlenbrook, director of hydrology, water and cryosphere at the World Meteorological Organization, Tiurai 17, 2023.
Te manata ra ainei koe i teia au ripoti reva kino? Akamanako ana i ta te Pipiria e akakite ra.
Te akatupu ra ainei te reva kino i te totou Pipiria?
Ae. Kua totou te Pipiria e ka tupu teia au mea mei te reva vera kino i teianei ao. Ei akaraanga, kua totou a Iesu e ka kite tatou i “te mea rikarika,” me kore “te au mea kino e te mataku.” (Luka 21:11; Good News Translation) No te vera kino, e maata te mataku ra e ka takino te tangata i te enua.
Ka riro ainei te enua ei ngai kare e tau no te tangata?
Kare. Kua anga te Atua i te enua ei kainga tinamou no tatou; kare aia e akatika i te tangata kia takore i te reira. (Salamo 115:16; Koheleta 1:4) Kua taputou mai aia ‘e mate iaia te aronga i mate ei te ao ra.’—Apokalupo 11:18.
Te akaari maira te Pipiria e ka rauka i te Atua te paruru i te enua mei tetai tumatetenga natura.
“Akariro [te Atua] i taua uriia ra ei marino; e tona au kare ra, kua akamutekiia ïa.” (Salamo 107:29) Ka rauka i te Atua te akatere i te au mea natura ririnui. Ka rauka iaia te rapakau i te au manamanata o te mareva te takinokino ra i te tangata.
“Kua atoro mai koe e kua akamauu i te enua; kua maata roa i te meitaki ia koe.” (Salamo 65:9) Ka akameitaki te Atua i te enua e ka akariro i te reira ei paratatito.
Kia kite maata atu i te taputou a te Pipiria me akaouia te mareva, akara i te atikara “Naai e Paruru i te Enua?”