•   “I Tinito kua ripotiia mai ko teia te mataiti ‘vera roa atu’ e ko te toru o te tuatau marō tikai.”—The Guardian, Tepetema 7, 2022.

•   “E rima mataiti i teianei, ka tupu ua atu te tuatau marō i te au enua o Aperika.”—UN News, Aukute 26, 2022.

•   “Kua tae te akamatakiteanga ki te maataanga o te au enua i Europa e ka tupu ua atu te tuatau marō, penei ko teia tetai tuatau marō roa atu i roto i te 500 mataiti i topa.”—BBC News, Aukute 23, 2022.

 Kua totou te aronga kite e ka vai ua e ka kino roa atu te au tuatau marō. E manakonakoanga ainei tetai e ka meitaki atu te turanga? Eaa ta te Pipiria e akakite maira?

 Kua totou te Pipiria no teia tuatau e:

•   “I tera ngai i tera ngai, e . . . onge.”—Luka 21:11.

 Ka taki atu te tuatau marō ki te onge. Ka akatupu te onge i te mamae e te mate tei totouia i roto i te Pipiria.—Apokalupo 6:6, 8.

 Te akakite maira te Pipiria i tetai tumu maata i kino atu ei te au tuatau marō. Te karanga ra:

•   “Kare tei te tangata e aere nei, i te akono i tona uaorai takainga tapuae.”—Ieremia 10:23.

 Tera te aiteanga kare e rauka i te tangata i te “akono i [to ratou] uaorai takainga tapuae,” me kore te akatere ia ratou uaorai. Na te tu mako kore o te tangata e akatupu i te au tuatau marō e te rava kore o te vai.

•   Kua āriki te aronga taieni e na te angaanga a te tangata i akatupu i te tauianga reva i te ao katoa, e pera katoa te au tuatau marō tikai.

•   Ka taki atu te tu noinoi e te au ture puapinga kore a te tangata ki te takore anga i te au vao rakau, te akataʼero i te enua, e te kaimoumou i te au apinga natura, kapiti mai te tamanamanata anga i te au ravenga no te akaputu i te vai.

 Inara, e manakonakoanga ta te Pipiria e oronga maira.

 Te taputou maira te Pipiria e ka rapakau te Atua i te au manamanata no te rava kore o te vai. Akapeea ra?

1.  1. Ka tae mai “te tuatau e mate ei [i te Atua] te aronga i mate ei to te ao ra,” me kore te aronga e takino ra i te enua. (Apokalupo 11:18) Ka akaatea aia i tetai tumu tei akatupu i te au tuatau marō tikai—te aronga kino e te noinoi tei takinokino i to tatou ao rangi.—2 Timoteo 3:1, 2.

2.  2. “E riro te vai pikikaa ua ei roto, e te enua keremarō ra ei vai pupui.” (Isaia 35:1, 6, 7) Ka rapakau te Atua i te au kino tei tupu no te tuatau marō e ka akariro i teia paraneta ei parataito e ei ngai vai taʼe marie.

3.  3. “Kua atoro mai koe e kua akamauu i te enua; kua maata roa i te meitaki ia koe.” (Salamo 65:9) Ma te akameitakianga a te Atua, ka kī rava te enua i te kai memeitaki e te vai na te katoatoa.