No tetai 30 mataiti i teianei, e maata te tangata tei manako e te meitaki ua ra e te mako maira te au mea i teianei ao. Inara, te akara anga, kare.

•    “Te manamanata nei te tangata i te tamaki i Gaza e ka akatupu te reira i te tamaki i te au enua i te pae mai, ia Israel e Hezbollah e tamaki ra i Lebanon.”—Reuters, Tianuare 6, 2024.

•    “E au pupu tamaki ta Iran e akatere ra i te au ngai ke ke, e no te viviki i te au apinga tamaki nukiria tei maani akaouia, te riro nei a Iran ei manata ki te au enua i te tua Opunga—e te turu nei a Russia e China iaia.”—The New York Times, Tianuare 7, 2024.

•    “Te akatupu nei rai ta Russia tamaki i te au kino i Ukraine.”—UN News, Tianuare 11, 2024.

•    “Te puapinga e te vaeau ririnui o China, te akaparau anga enua o Taiwan, e te pirianga kino i rotopu ia Beijing e Washington te akara anga ka tupu viviki ua tetai tamaki.”—The Japan Times, Tianuare 9, 2024.

 Mei ta tatou e kite nei, kua akakite mai ainei te Pipiria i te turanga kino o teianei ao? Ka akatupu ainei teia i te tamaki i teianei ao?

 Kare te Pipiria i totou ana i tetai tamaki tikai mei ta tatou e kite nei. Inara, kua totou mai te reira i te au tamaki te ka akairo i to tatou tuatau e te ka “apai ke i te au i te ao nei.”—Apokalupo 6:4.

 Kua totou mai te puka a Daniela e “kia tae ra ki te tuatau openga,” ka “opara” me kore ka putoto te au enua ririnui o teianei ao no te akatere. Ka akaariari ratou i to ratou vaeau ririnui e te akapou anga i te “au apinga auro,” me kore te moni maata.—Daniela 11:40, 42, 43.

 Te akakite maira te Pipiria e ka kino ua atu te turanga o teianei ao i mua ake ka meitaki mai ei te reira. Kua totou mai a Iesu e “e mate maata tei [teia] tuatau, kare ïa mei muatangana mai i teianei ao.” (Mataio 24:21) Ka taki atu teia “mate maata” ki tetai tamaki tei kapikiia ko Aramagido, koia oki ko “te tamaki i taua rā maata o te Atua mana katoatoa.”—Apokalupo 16:14, 16.

 Inara, ka akaora a Aramagido i te tangata, kare e takore ia ratou. Na roto i te reira tamaki, ka takore te Atua i te tutara a te tangata, tei akatupu i te au tamaki kino rava. Kia kite akapeea a Aramagido me akatupu i te ’au mutu kore, e tatau i teia au atikara:

•    “Eaa te Tamaki o Aramagido?”

•    “E Nuti Meitaki a Aramagido!”