Ia Peperuare 24, 2022 kua tomoia a Ukraine e te au vaeau o Russia, tupu atura te tumatetenga ki te tangata ia ratou e oro ra mei teia tamaki. a

 “Kua aruru te au pomu. Kua mataku tikai matou e e ngata i te akakite atu i te reira. Te kite anga matou e au rerue tetai e tiaki maira, oro atura matou. Kua anoanoia koe kia tuku i taau apinga pouroa ki roto i tetai kete meangiti. Te au pepa, te vairakau, te vai, e te au apinga katikati ta matou ka apai ua. Akaruke atura matou i te au mea ravarai oro atura ki te rerue, i te au pomu e aruru ra.”—Nataliia, i Kharkiv, Ukraine.

 “Kare rava matou i irinaki ana e ka tupu teia tamaki. Kua rongo matou i te aruru i tetai au ngai o te oire, e kua pururu te maramarama. Oro atura au, te apai anga i te au mea puapinga ua. Akaruke au i toku kainga i te ora 8:00 i te popongi oro atura na runga i te rerue ki Lviv e oti te bus ki Poland.”—Nadija, i Kharkiv, Ukraine.

I roto i teia atikara

•  Eaa tei akatupu i teia tumatetenga no te tangata e oro nei?

•  E manakonakoanga ainei to te tangata e oro nei?

•  Ka tauturu ainei te Pipiria i te tangata e oro nei?

 Eaa tei akatupu i teia tumatetenga o te tangata e oro nei?

 Na te au vaeau o Russia i akatupu i teia tumatetenga ki te iti tangata o Ukraine. Inara, te akakite maira te Pipiria i tetai au tumu i tupu ei teia au tumatetenga ki te tangata:

•   Kavamani a te tangata i teianei ao, kua puapinga kore te reira. Te taangaanga nei ratou i to ratou mana kavamani ei takinokino i te tangata.—Koheleta 4:1; 8:9.

•   Tiaporo ko Satani, koia ‘te tutara o teianei ao,’ te akatere nei i te tangata ma te kino e te karanga ra te Pipiria: “Te vai ua nei rai to te ao ravarai i raro ake i taua vaerua kino ra.”—Ioane 14:30; 1 Ioane 5:19.

•   I te pae i te au manamanata tei takinokino i te tangata no tetai tuatau roa, te noo nei tatou i te tuatau tei totouia e te Pipiria: “Ka tupu te kino maata i taua tuatau openga ra.” (2 Timoteo 3:1) Te kiteaia nei te au akairo i roto i te au tamaki, te au tumatetenga natura, te onge, e te maki kino—te akatupu ra i te tangata kia oro.—Luka 21:10, 11.

 E manakonakoanga ainei to te tangata e oro nei?

 Te akakite maira te Pipiria i te Atua ko Iehova, b Tei Anga ia tatou, e tu tangi aroa tona no te tangata e oro nei e te aronga kare e kainga. (Deuteronomi 10:18) Kua taputou mai aia i te rapakau i te au manamanata o te tangata e oro nei, na roto i tana kavamani i te rangi, tei kapikiia ko te Patireia o te Atua, te ka takore i te au kavamani a te tangata. (Daniela 2:44; Mataio 6:10) Ka taangaanga a Iehova i tona Patireia kia takore i te Tiaporo ko Satani. (Roma 16:20) Teia Patireia, e kavamani te reira i te ao katoa, te ka takore i te ke i rotopu i te au enua. Ka riro te au tangata ravarai ei ngutuare taokotai i te ao katoa. Kare e tangata e akaruke i tona kainga, mei ta te Pipiria i taputou mai: “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai; ko te vaa oki o Iehova Sabaota ra, tei tuatua mai.”—Mika 4:4.

 Na te Patireia o te Atua anake e rapakau i te au tumatetenga o te tangata e oro nei i teia rā. Ka taangaanga a Iehova i tona Patireia ei takore i te au manamanata te akatumatetenga nei i te tangata kia oro. Akamanako ana i teia au akaraanga:

•   Tamaki. Ka “akakore [a Iehova] i te tamaki.” (Salamo 46:9) Kia kite akapeea te Atua me akakore i te tamaki, tatau i te atikara “‘Au i te Enua Nei—Akapeea Ra?”

•   Takinokino anga e te ta ua. “Ka akaora [a Iehova] i to ratou vaerua i te takinga-kino e te rotoriri ra.” (Salamo 72:14) Kia kite akapeea te tangata me taui i to ratou tu tau kore, tatau i te au atikara “Takore i te Tu Makitakita.”

•   Putaua. “Ko tei putaua ra me kapiki maira, [na Iehova] ïa e akaora.” (Salamo 72:12) Kia kite akapeea te Atua me akakore i te putaua, tatau i te atikara “Ka Rauka Ainei Tetai Turanga Tau i te Pae o te Moni?”

•   Onge. “E manga sitona okotai rima i ki i te enua nei.” (Salamo 72:16) Kia kite akapeea te Atua me akapapu kare e tangata e matepongi, tatau i te atikara “A World Without Hunger?”

 Ka tauturu ainei te Pipiria i te tangata e oro nei?

 Ae. I te pae i te manakonakoanga meitaki a te tuatau ki mua, ka tauturu te Pipiria i to ratou manamanata i teia taime.

 Kaveinga Pipiria: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.”—Philipi 4:6, 7.

 Te aiteanga: E pati ki te Atua kia rauka te manako ngakau ‘au noatu eaa toou turanga. Akara i te atikara “Philipi 4:6, 7—‘Auraka e Apiapi i te au Mea Katoa Nei.’”