“E maata to tatou aronga tatau tei kite i tetai aronga matapo,” i akakite ei to Tiunu 1, 1912, makatini The Watch Tower. “Ka rauka ia ratou te au puka tatau . . . . Kua neneiia teia au puka na te aronga matapo ma te au topata rikiriki e ka rauka ia ratou i te tatau.” Akakite The Watch Tower e: “E manganui te aronga matapo tei āriki rekareka i te karere e te aere maira te au akameitakianga i teianei ao.”

 Te tataia anga te reira au tuatua, kare tetai akapapaanga braille reo Papaa i akamataia ake. Inara, kua rauka i te Au Kite o Iehova i te nenei i te au tuatua mou Pipiria ma te “au topata rikiriki”—koia oki, te braille. E te raveia nei rai e matou! Kua rauka te au puka braille i roto i te 50 tuma reo. Akapeea te reira me maaniia?

 Te ravenga mua me maani i tetai braille ka tauiia te reira ki roto i te au reta braille. “I mua ana ka taangaanga matou i te software tei maaniia e tetai ke no te tataanga braille, inara kare te reira e rauka kia taangaangaia ki tetai ua atu reo ke,” i akamārama mai ei a Michael Millen, e angaanga ana i te Text Processing Services i Patterson, New York. “Teianei te taangaanga nei matou i te Watchtower Translation System, ka rauka te tataanga braille ki roto i te au reo tukeke o teianei ao. Irinaki au e kare atu e porokaramu mei teia rai te tu.”

 Ka kapitiia mai ki roto i te au puka braille te au tataanga e pera katoa te au tuatua akamārama anga i te tutu. Ei akaraanga, no te tutu i te kapi mua o te puka braille Oraanga Mataora e Tuatau Ua Atu! te akamāramaia ra: “Aaere te tangata ki runga i te mataara takapiniia e te au tiare manea, te au tuaivi e te maunga.” Karanga mai a Jamshed, e tavini orometua e e painia matapo e, “E puapinga maata kiaku teia au tuatua akamārama anga i te tutu.”

 Me oti ana i te tataia, ka tukunaia te reira ki te au opati Betela no te maani ki roto i te au puka braille. I reira, ka emboss i te au puka ma te au pepa ketaketa kia kore e puta i te taime e emboss ra kare te topata e taui noatu me taangaanga putuputuia te reira. Aru mai, ka akapapaia te au kapi, ka tamouia ki te uaea, e ka akau kapitiia ma te au puka na te putuputuanga me kore ka tukunaia ki te au opati mere ei “au puka oronga ua na te aronga matapo” me e akanoonoo anga tetai no te reira. Me anoanoia, ka akau viviki atu te au opati Betela i te reira kia rauka i te au taeake matapo me kore te aronga te poiri atura te mata, i te au puka no ta ratou uipaanga putuputuanga.

 Ka anoanoia te taime e te moni no te rave i teia angaanga. Te tika, e maani ana ta tatou ngai nenei anga i Wallkill, New York, e 50,000 Pipiria e i taua taime rai ka rauka i te emboss e 2 Pipiria braille. I te Pipiria okotai o te papaanga-rua braille reo Papaa e 25 voriumu, e te moni tutaki i te au mea anoanoia no te reira voriumu e maata atu i te 123 taime kia nenei i te okotai Pipiria. a Te tutaki anga i te kapi mua o te 25 voriumu okotai e $150 (U.S.)!

 Eaa to te aronga tei nenei i te au puka braille manako no ta ratou angaanga? Karanga a Nadia, te angaanga ra i ko i te opati Betela i Aperika Apatonga: “Kare o te au taeake e te au tuaine matapo e te aronga te poiri atura te mata e oraanga meitaki, no reira kiaku e ākā akameitakianga i te maani i tetai apinga ka tauturu ia ratou. Papu rai e te akaperepere maata ra a Iehova ia ratou.”

 Akapeea ra me kare tetai tangata matapo e kite i te tatau braille? I nga mataiti i topa ake nei, kua oronga atu matou i te Learn to Read Braille, e puka tataanga braille e tei neneiia. Kua maaniia no te tangata kite mata e tei matapo kia taangaanga kapiti. Kua kapitiia mai ki teia poroutia te au apinga ka rauka i te tangata matapo i te taangaanga no te tata braille. Ka taangaanga te tangata apiipii i teia au apinga kia emboss i te reta braille tataki tai nana uaorai. Na roto i teia ravenga, ka tamou e ka maara i te tangata apii i te reta tataki tai e ka kite i te reira na roto i te aa anga i te topata.

 Akapeea te au taeake e te au tuaine matapo e te aronga te poiri atura te mata i puapinga ai mei teia au puka? Ko Ernst, e noo ana i Haiti, e aere ua ana aia ki te au uipaanga putuputuanga, kare ana puka braille. No teia tu, ka anoanoia aia kia tamou ngakau i tana ka tuatua me rave i tana tuanga o te apii e te pau pau i te tuatau no te uianga e te pauanga. “Inara i teianei,” i nana ai, “ka taaki ua au i toku rima e ka pau i tetai ua atu taime. Rotai tikai au ki toku au taeake e te au tuaine. Aiteite pouroa ta matou kai pae vaerua!”

 “Māramarama ua ta tatou au puka i te tatau i tetai atu au puka braille,” i na Jan ei, e tangata pakari e te poiri atura te mata i Austria tei akono i te Apii Punanga Tiaki e te Apii Pipiria a te Putuputuanga. “Ei akaraanga, ka ngoie ua i te kimi i te numero o te kapi, te tataanga ki raro e te ngai tikai o te au tuatua akamārama i te tutu.”

 Ko Seon-ok, e painia i South Korea, e vaine matapo e te turi katoa. I mua ana e tamou apii ana aia na roto i te tactile signing i te uipaanga, i teianei ka rauka iaia te tatau i te au puka apii Pipiria braille. “Ka ngata rai i te tatau i tetai atu au puka braille no te mea kare i tata meitakiia te au topata rikiriki, kua ipa te aerenga o te tuatua, me kore kua angi angi te pepa,” karanga ai aia. “Kareka ra te Au Kite o Iehova kua taangaanga ratou i te au pepa ketaketa e kua taka taka meitaki te au topata rikiriki, kua māmā ua iaku i te tatau.” I nana mai ei: “I mua ana, kua rauka iaku te apii i te au puka Pipiria na roto i te tauturu a tetai ke. I teianei kua rauka iaku i te apii ko au anake ua. Mataora tikai au ka rauka iaku te akapapa no te au uipaanga Kerititiano i te epetoma e kia piri katoa ki roto i te uriuri anga. Kua tatau pouroa au i ta tatou au puka braille. Ka karanga koe e kua kaki tikai au i te reira.”

 Mei ta tatou au puka neneiia, kua tataia teia aerenga manako ki roto i ta tatou au puka braille: “Kare teia [puka] e oko. I orongaia mai ei tuanga no tetai angaanga apii Pipiria i te ao katoa, turuia e te tauturu oronga ua.” Meitaki maata no te oronga ua mai na roto i teia ravenga o te donate.pr418.com. Na roto i taau oronga anga kua rauka te au kai pae vaerua na te katoatoa, e pera te aronga matapo e te aronga te poiri atura te mata.