Ia Tiurai e Aukute 2020, ko te taime mua teia ka akarakara ei te au taeake i te ao katoa i teia porokaramu uruoaanga tapere i te taime okotai. E rauka ai teia, kua rekotiia te porokaramu e kua uriia ki roto i te 500 reo. Tei matauia, ka pou rai e tai tuma mataiti no te parani e te akaoti i teia. Noatu te maki coronavirus, kua oti i te uriia te 2020 “E Rekareka”! Uruoaanga Tapere, i raro ake i te a marama.

 Na te Opati Uri Reo e te Global Purchasing o te Opati Maata o te Au Kite o Iehova i rave i teia angaanga maata. Kua kiteaia mai e te Opati Uri Reo e ka inangaro te au pupu uri reo i te au apinga no te akaoti i teia angaanga, koia oki te au high-quality microphone. Kua oko mai te Global Purchasing e 1,000 au microphone e kua tukuia atu te reira ki te 200 enua.

 Ei akarava i te moni, kua okoia e maata ua atu te au microphone, e kua tukuia na runga i te paʼi ki te ngai okotai, e oti kua akapapa akaouia te reira kia tukuia atu ki te au enua i te ao katoa. E $170 U.S. i te microphone okotai e te tutaki i te tuku anga i te reira—kua māmā i reira tona tutaki anga ki te 20 patene.

 Kua tutaki te Global Purchasing i teia e kua tuku atu i te reira ia Aperira e Me 2020—i te tuatau kare te au pitiniti e angaanga ana no te au maki kino i te ao. Noatu rai, kua tae teia au apinga ki te au opati uri reo, te au opati Betela, e tetai atu au ngai uri reo, i te openga o Me.

 “Kua angaanga taokotai te au tipatimani o Betela e te au pitiniti no teia akakoroanga,” i na Jay Swinney ei, tei akaaere i te Global Purchasing. “Na to Iehova vaerua anake i taokotai i ta matou angaanga e te akarava i te moni no te turu i te au angaanga pae vaerua.”

 Karanga a Nicholas Ahladis, o te Opati Uri Reo e: “Noatu kua kotingaia e kua akatakakeia te au taeake uri reo mei tetai e tetai, kua rauka ra ia ratou i te uri e te rekoti i te au akoanga, te au nuku, e te au imene ki roto i te 500 reo.”

 Ko teia tetai angaanga tei raveia no te au taeake i te ao katoa no te 2020 “E Rekareka”! Uruoaanga Tapere. No ta kotou moni oronga ua na roto i te donate.pr418.com e te vai atura, i rauka ai teia.