E tumu meitaki rai ta te au taeake kia ekoko me ka rave tamou au i te angaanga painia. Kare au i te tangata maroiroi i te pae vaerua. Kare au e reka ana i te rave i te angaanga tutu aere e ka pure kia ua i te Tapati kia kore au e rave i te angaanga tutu aere. Me ka aere ra au, ka oronga au i te au makatini; kare rava au i akamata i tetai tuatua ma te tatau i te Pipiria. Kua tutaki mai toku mami kia tatau au i te Pipiria i roto i te putuputuanga. Kare au i te tamaiti reka i te apii, e kare katoa aku akakoroanga i te pae vaerua ka iki i te rave.

 I te reira tuatau maana i raveia ai te akaputuputuanga tapere (teianei ko te uruoaanga takake) i Cardiff, Wales. I taui ei toku oraanga i reira. Kua ui mai tetai o te au vaa tuatua i te au uianga kia akamanako. Kua ui mai aia e: “Kua akatapu ainei koe ia koe e kua papetitoia?” ‘Ae,’ i manako ei au. “Kua tia ainei koe kia Iehova ma toou ngakau katoa, vaerua katoa, manako katoa e te maroiroi?” ‘Ae.’ “E maki ainei toou me kare e apainga taau no te akono i toou ngutuare te tāpu ra ia koe kia kore e painia?” ‘Kare.’ “E tumu ainei tetai kare e rauka ia koe i te painia?” ‘Kare.’ “Me ko taau pauanga ki te uianga openga e kare, kore i reira koe e painia?”

 Kore akerai kua taka meitaki iaku toku turanga. Manako mai au: ‘Te kaimoumou nei au i toku oraanga. Kare au i akono i taku i tia. Kare au e te tavini pu nei ia Iehova.’ Kua akamanako au me kua tapapa au ia Iehova kia rave i tana i taputou mai noku, kia akono katoa rai au i taku i tia kiaia. No reira ia Okotopa 1956, kua akamata au i te painia i te tuatau orote. E painia tauturu i teia rā.

 I tera mai mataiti, kua riro mai au ei painia tamou e kua neke atu ki tetai putuputuanga e 19 papuritia i reira. Mei toku taime i tae atu ei, i te au epetoma katoa ka oronga au i tetai ako. Ma te tauturu a te au taeake akakoromaki, kua rauka iaku i te akamaata atu i toku karape i te tata e te oronga i taku ako. E rua mataiti i muri mai, i te 1959, kua ikiia au ei painia takake e kua aere atu au ki Aberdeen, i te tai tokerau o Scotland. I nga mea mārama i muri maira, kua patiia mai au kia angaanga i ko i te opati Betela i London. Kua angaanga au i ko i te ngai neneianga puka e itu mataiti i reira.

 Reka tikai au i te oraanga i Betela inara i teianei kua anoano au i te rave i tetai atu angaanga takake. E mapu ua au, ma te matutu e te inangaro ia Iehova kia taangaanga iaku. No reira ia Aperira 1965, kua tuku atu au i taku pepa patianga kia aere ki te Apii Gileada kia tereniia ei mitinari.

 I tera mataiti kua iki maua ko toku oa i Betela i te aere ki Berlin, i Tiamani, ki te uruoaanga e kia akara i te Berlin Wall tei patuia no tetai au mataiti i mua ana.

 I tetai rā o te uruoaanga, kua rauka ia matou i te rave i te angaanga tutu aere e kua tukunaia au kia angaanga kapiti maua ko Susanne Bandrock no te angaanga tutu aere. Kua akaipoipo maua i te 1966, e rua mataiti i muri mai kua patiia atu maua kia aere ki te 47 pupu apii o Gileada. E āka akameitakianga tikai! Aere ua rai, kua akamutu te rima mārama o te apii. E kua orongaia mai ta maua angaanga ki Zaire, teianei ko Democratic Republic o Congo. Poitirere tikai maua! Kare a maua tuatua i kite no teia enua. Manga emiemi rai, inara kua āriki maua i ta maua angaanga e kua tuku ia maua na Iehova e tauturu mai.

 No tetai au ora i te ngai toanga pairere e i runga i te pairere, kua tae atu maua ki tetai oire meangiti ko apinga ko Kolwezi. Kua umere maua e kare te au taeake i aravei mai ana ia maua. Kua kite mai maua e kua tae mai te terekarama no te akakite i te au taeake i to maua tae anga e rua rā i muri ake i to maua tae anga ki reira. Kua aravei mai te opita o te pairere ia maua e kua tuatua mai i te reo Varani, e reo kare maua i mārama. Te vaine i mua ake ia maua kua uri mai e kua tuatua mai e, “Te tapekaia nei korua.”

 Kua māro te opita i tetai tangata kia apai ia matou i roto i tona motoka meangiti takere e rua ua noo anga. Kua noo opuku ua matou ko te opita, te pu o te motoka e maua ko Susanne i roto i te motoka. Mei tetai teata kata anga rai te tu ia matou e aere ra na runga i te au mataara vaarua e kua ngaa ua te ngai o te kiri kakau, akaraanga kua apukuia te reira.

 Kua aere atu matou ki te kainga no te au mitinari. Noatu kare maua i kite e teiea te ngai, kua kite ra te opita. Kare e tangata i reira, kua topiriia te aua. Kua aere te au mitinari ki te uruoaanga e te orote. Te tu ua ra maua i roto i te ra, kua manako e eaa te ka aru mai. Kua tae mai tetai taeake i reira. Tona kite anga mai ia maua, kua maru mai maua. Kua kite aia i te opita, tei anoano ra e kia tutaki maua iaia. I muri mai i te akamārama anga te taeake i te tumu kua akaruke te opita e kua aere atu matou ki roto.

 Kua kite mai maua e e aronga oaoa e te aroa ua te au taeake tei akakoromaki maata i reira. Ma te maromaroa kua akatupu te au angaanga kikino e te meameaau i te au peu takinga kino i teia enua no tetai tai ngauru mataiti. E oti i te 1971, kua akakoreia te tikaanga no te Au Kite o Iehova kia rave i ta ratou angaanga i reira. Kua manako maua ka akapeea teia angaanga me raveia.

 Kare teia i te taime kia unui ki muri, e e iti ua te au taeake e te au tuaine tei akapera, noatu te au māroanga maata kia kore e vai takake ei Kerititiano na te apai anga i te au kāti poritiki e te tamou i te pine turuturu i tetai pupu poritiki. Me kare oou pine, kare e rauka ia koe te tauturu a te kavamani e ka akatupu manamanata te au vaeau e te akava kia koe. Kua ngere i te au taeake ta ratou angaanga, e kua tuaruia te tamariki mei te apii ki te kainga. E anere tuma au taeake tei tiriia ki roto i te are auri. E tuatau manamanata anga. Noatu rai, kua tutu aere ua atu te Au Kite i te nuti meitaki ma te ngakau toa.

 I te reira au mataiti, kua akapou maua ko Susanne i te maata anga o to maua taime i te tutaka i te au ngai mamao no te angaanga kotinga e te tapere. Te oraanga i roto i te oire kua tupu mai te au turanga tuke ua ake e te ngatā. Meangiti tikai te au are kikau kare e rava ana te ngai no te moe. Kare e maara iaku e ia taime te u anga toku upoko ki runga i te ngutupa oiti. Kua pai maua i ko i te au vai taʼe e te au kauvai. I te po, ka tatau maua i te pae i tetai kanara. Ka tunu i ta maua kai ki runga i te reu ai vaie. Inara kia maua, ko teia tikai te oraanga o tetai mitinari. Ko teia ta maua i iki i te rave—kua manako maua e ko teia te oraanga o te aronga rave i te angaanga i te pae vaerua.

 Kua kite mai maua mei te noo kapiti anga ki te Au Kite i reira kia kore e manako i te au mea puapinga mei te: kai, vai, kakau, e te kapakapa. (1 Timoteo 6:8) E au akameitaki anga tetai au mea. Ko te reira rai ta maua e akono nei i teia tuatau.

 Noatu kare i aite to maua timataanga mei te apotetoro rai ko Paulo, tetai au taime kua manako maua i to maua oraanga e te timataia ra to maua akarongo e te akakoroanga. Kua teretere maua na runga i te au mataara vaarua e kore akerai kare e mataara. Ia maua e aere ra na runga i te au mataara toka toka kua oriori ua ki tetai tua e tetai tua. Tetai taime, ka ngote ia to maua pereoo e te one. I te tuatau uaua, ka piritiia matou i roto i te vari, ma te ngatā i te aere mai ki vao. I tetai rā e akaoro ra matou, kua taeria e 70 kiro mita (43 mi) to matou aere anga e ka keri mei roto i te vari i to matou pereoo e 12 taime.

 Kua piri vaitata maua kia Iehova ia maua e tavini ra iaia i raro i teia au turanga ngatā i te ngangaere. Ma te tauturu a Iehova, ka rauka ia maua i te akakoromaki ma te rekareka, noate e kare e rauka ia maua i te taui i to maua turanga. Ko tona tu rai, kare a Susanne e mātau ana i te au angaanga o vao, te tutaka aere, inara i to maua au tuatau manamanata e te ngatā, kare rava aia i kope kope ana i te reira. Kua maara ia maua i taua tuatau ei taime mataora, puapinga e kua rauka mai te apiianga.

 I to maua au mataiti i Zaire, kua tapekaia au no tetai au taime. Tetai atianga kua akaapa pikikaaia au no te oko i te au taimana kare i tau ki te ture. Tei matauia, kua tupu te manako apiapi inara kua tuatua maua kia maua me inangaro a Iehova kia akaoti maua i ta maua angaanga tutu aere, ka tauturu mai aia. E kua rave aia i te reira!

 I te 1981, kua patiia maua kia angaanga i ko i te opati Betela i Kinshasa. I te mataiti i mua ana, kua akatika akaouia ta matou angaanga i te pae o te ture. Kua rauka mai i te au taeake tetai potonga enua no te patuanga i te au are opati maata i reira. Kare i manakoia atu ana, ia Mati 1986, kua taina te peretiteni o te enua i te ture kia araiia te angaanga a te Au Kite o Iehova. Kua tapuia te angaanga, e kare i roa ana i muri mai, kua akaruke te maata anga o te au mitinari i te reira enua.

 Kua rauka ia maua i te noo mai no tetai tuatau. Kua rave maua i tei rauka kia tutu aere ua atu, noatu kua kite maua e te akara maira te aronga mana ia maua. Noatu to maua matakite, kua tapekaia au iaku e rave ra i tetai apii Pipiria. Kua tukunaia au ki roto i tetai pia vaarua maatamata ma tetai atu aronga opuia i reira. E ngai vera, aunga, poiri, e te aumani; rauka te mārama e te reva ou mei tetai puta o te paruru. Kua opu mai tetai aronga mouauri iaku e kua apai iaku ki to ratou pu. “E imene mai to matou imene enua!” nana mai ei. “Kare au e kite,” i tuatua atu au. “Imene mai i to kotou imene enua!” karanga mai ratou. “Kare rai au i kite,” i tuatua atu au. I reira kua karanga mai aia ki tu au e 45 miniti i te pae i te paruru. I te openga ra kua aere mai te au taeake i reira i te tutaki e kia tukunaia au ki vao.

 Kua kite mai maua e kare e meitaki ua atu te au mea i te enua nei, kare i roa i muri mai e kua tauiia ta maua angaanga ki Zambia. Ia maua e tikoti atura i te kena enua, kua maromaroa maua e kua maru katoa. Kua akamanako ana maua i te 18 mataiti i akapou maua i roto i ta maua angaanga ma te tavini kapiti ma te au mitinari tiratiratu e te au taeake e te au tuaine i reira. Noatu te oraanga manamanata i tetai taime, kua kitea e maua te au akameitakianga. Kua kite ana maua ia Iehova i te akono ua anga ia maua. Kua apii mai maua i te reo Swahili e te Varani, e ko Susanne, kua kite katoa aia i te reo Lingala. Mataora tikai maua i ta maua angaanga tutu aere, te tauturu anga e 130 tuma tangata kia papetitoia. Kua mareka katoa mai maua i te kite anga e kua akamata maua i tetai tumu kia tupu te angaanga a te tuatau ki mua. E kua tupu mai rai te angaanga! I te 1993, kua akakore te Akavanui i te araianga o te angaanga i te 1986. Te vai nei e 240,000 tuma papuritia Patireia i Congo.

 Ia maua i Zambia nei kua kite ana maua i te patuanga o te opati Betela ou e oti kua akamaata akaouia te reira au ngai. Te vaira i teianei e maata atu i te toru taime te au papuritia maroiroi i konei mei te taime mai i tae atu ei maua i te mataiti 1987.

 No reira, eaa ra tei tupu ki te mapu taeake tei akaraanga e kare e pou te marama i roto i te angaanga tavini tamou? Ma te akameitakianga a Iehova e te tauturu a toku akaperepere ko Susanne, kua rauka iaku i te tavini tamou e 65 mataiti, te tongi anga e te kite anga e e meitaki tikai a Iehova!—Salamo 34:8.

 Kite maua kare maua i te nga tokorua takake; kua tauta ua rai maua tei rauka ia maua kia tiratiratu i te rave i ta maua i tia e te akatapuanga. Irinaki maua e ka tauturu ua mai rai a Iehova ia maua kia kore e “unui ki muri” mari ra kia matutu te akarongo “kia rauka i te ora.”—Ebera 10:39.

 Akara i te vitio o Dayrell and Susanne Sharp: We Promised to Serve Jehovah Whole-Souled.