NOUT VI KRÉTIEN
Koman donn la min pou soutien sak la viv in katastrof
Koméla néna pluzanplus katastrof naturèl. Kan in katastrof i ariv, bann zopérasion sekour i doi èt bien organizé é bien dirijé. Pou fé sa, le Kolèj santral la mèt an plas in sèrvis bann zopérasion sekour dan tout bann buro nasional.
Ankak na in katastrof in landroi, sak i fé parti le sèrvis zopérasion sekour i kontak vitman bann zansien ke lé sur plas, pou konèt sak bann proklamateur la bezoin. Si la détrui in bonpe é ke bann proklamateur sur plas na tro zafèr pou jéré, alor le buro nasional i mèt bann frèr gabié pou dirij bann zopérasion sekour. Le bann frèr va rod bann volontèr oubien va demann bann matèryèl spésial. É osi, zot va achté bann zafèr ke nout bann konpanion la bezoin, é zot va partajé sur plas.
Kan in katastrof lé jéré komsa, sa i aport in bonpe bienfé. Sa i évit doub travay, mèt la pagay oubien gaspiyaj larjan èk matèryèl. É tousa i pouré arivé kan désèrtin i désid aji par zot mèm.
Bann frèr ke le buro nasional la anvoiyé, va kalkul kèl kantité larjan é konbien volontèr la bezoin. Zot i pe alé voir osi bann zotorité sur plas, ke souvandéfoi, i pe donn koudmin pou fé avans plu vit nout bann zopérasion sekour. Alor, okin moun i devré désid par li mèm demann larjan, anvoiy bann matèryèl sekour, oubien alé dann in landroi ousa la ariv in katastrof.
Lé vré, nou la anvi donn in koudmin (Ébr 13:16). Nou ièm nout bann frèr é seur ! Alor, kosa nou pe fé ? Sak lé plu inportan, sé pri pou nout bann konpanion ke la viv in katastrof é pou sak i port azot sekour. Nou pe osi fé zofrann pou soutien laktivité su tout la tèr. Bann buro nasional ke lé dirijé par le Kolèj santral, lé mieu plasé pou konèt kèl koté le bann zofrann sra plus util. Pou fini, si nou la anvi donn in koudmin, nou pe fé konèt kansa nou lé disponib kan nou va ranpli inn Demande d’admission comme volontaire local de développement-construction (DC-50).
GARD LE VIDÉO BANN ZINONDASION LA FÉ GRO DÉGA DANN PÉI BRÉZIL, APRÉSA RÉPONN KÉSTION LA :
Kosa i mark aou dan bann zopérasion sekour o Brézil, ke la été fé par bann Témoin Jéova apré linondasion 2020 ?
