Sé Jéova a ke la sélèb le premié maryaj. La Bib i di ke Bondieu la kré la fam, é apré li « la amèn a èl vèr lom ». Adan lété tèlman kontan ke li la di : « Tou kont fé, sadla lé le zo mon bann zo é la chèr mon chèr » (Jenèz 2:22, 23). Ojourdui osi, Jéova i ve ke bann domoun maryé lé ereu.

Kan nou maryé, défoi nou majinn ke nou nora okin problèm. Mé i fo bien regard la réalité an fas : mèm in mesieu é in madam ke i ièm a zot vréman va rankont bann problèm (1 Korintien 7:28). Dann ti liv la, ou va trouv bann prinsip biblik. Si ou mèt an pratik bann konsèy la, ou nora in maryaj é in vi d’fami ereu (Psom 19:8-11).

SÈK LA BIB I ANSÈGN : Le mari lé le chèf la fami (Éfézien 5:23).

A ou mari, Jéova i ve ke ou pran soin out madam avèk in bonpe laféksion (1 Pièr 3:7). Bondieu la utiliz la fam kom in lèd pou soutien a ou é li ve ke ou trèt a èl avèk réspé é lamour (Jenèz 2:18). Ou doi èm a èl tèlman for ke ou voudra fé pas son bann préférans avan, pluto ke sak lé vot (Éfézien 5:25-29).

A ou fam, Jéova i ve ke ou néna in gran réspé pou out mari é ke ou èd a li pou bien ranpli son rol (1 Korintien 11:3 ; Éfézien 5:33). Mont ke ou soutien bann désizion ke li pran é aport a li out lèd avèk tout out keur (Kolosien 3:18). Si ou fé komsa, ou sra ankor plu joli pou out mari é pou Jéova (1 Pièr 3:1-6).

KOSA OU PE FÈR :

• Ou pe demann out konjoin kosa i fo fé pou èt in méyeur mari oubien in méyeur madam. Ékout bien son répons é fé tout out posib pou amélior a ou.

• I fo ke ou lé pasian. I fodra in pe d’tan pou zot deu, pou aprann rann inn é lot ereu.

SÈK LA BIB I ANSÈGN : Ou doi fé pas le bezoin out konjoin an premié (Filipien 2:3, 4). Trèt out konjoin kom kèlkin néna bonpe la valeur, é rapèl a ou ke Jéova i demann ke son bann sèrviteur lé « janti avèk tout domoun » (2 Timoté 2:24). « Néna d’moun i koz san réfléchi komsi zot i donn bann kou d’ lépé, mé la lang bann domoun saj i aport la gérizon. » Sé pousa i fo bien choizi out bann parol (Provèrb 12:18). Léspri Jéova va èd a ou koz in fason dou é avèk laféksion (Galat 5:22, 23 ; Kolosien 4:6).

KOSA OU PE FÈR :

• Avan koz su bann sujé inportan avèk out konjoin, fé in priyèr. Demann Bondieu èd a ou pou pa pèrd out pasians é prann an kont bann zidé ke lé diféran lé vot.

• Kalkul bien sèk ou sar di é la fason ke ou sar dir a li.

SÈK LA BIB I ANSÈGN : Kan zot i maryè, zot i devien « in seul chèr » avèk zot konjoin (Matieu 19:5). Mé zot i rès deu pèrsonn diféran ke parfoi i voi pa lé choz parèy. Zot i doi alor aprann èt uni dan zot fason d’pansé é dan zot santiman (Filipien 2:2). Èt uni lé in nafèr inportan pou pran bann désizion. La Bib i di : « avèk in konsèy [oubien : kan i diskut ansanm ] lé sur ke bann projé i abouti » (Provèrb 20:18). Kan zot i pran ansanm bann désizion inportan, lès bann prinsip biblik gid a zot (Provèrb 8:32, 33).

KOSA OU PE FÈR :

• Kontant pa ou donn out konjoin detroi ti zinformasion oubien out lopinion : lès out keur kozé é parl de out santiman.

• Avan angaj a ou dann in nafèr, demann out konjoin kosa li pans.