Nout tout la bezoin larjan pou fé viv nout fami (Provèrb 30:8). An fin d’kont, « larjan i aport in protéksion » (Éklézias 7:12). Petèt lé difisil pou zot deu abord le sujé su larjan, mé lès pa larjan kré bann problèm ant zot (Éfézien 4:32). Mari é fam i doi fé konfians inn é lot é désid ansanm koman zot va dépans zot larjan.

SÈK LA BIB I ANSÈGN : « Kisa parmi zot i ve konstrui in tour i asiz pa avan pou kalkul la dépans é gard si li néna asé pou fini a li ? » (Luk 14:28). Konsèy inportan : désid ansanm koman zot i ve utiliz zot larjan (Amos 3:3). Regard kosa zot la bezoin é konbien larjan zot néna pou sa (Provèrb 31:16). Lé pa parske zot néna larjan pou pèy in nafèr ke zot i doi achèt a li. Évit andèt a zot. Dépans seulman larjan ke zot néna (Provèrb 21:5 ; 22:7).

KOSA OU PE FÈR :

• Si jamé i rès a zot in pe larjan an fin d’moi, désid ansanm kosa zot i sar fé avèk.

• Si zot la poin asé larjan, kalkul bien kosa i fo fé pou diminué zot dépans. Par égzanp, olèrk alé manjé an deor oubien achté bann repa déja préparé, fé kui zot mèm zot manjé.

SÈK LA BIB I ANSÈGN : « Nou sousi a nou pou sèk lé droit, pa seulman devan lé zieu Jéova, mé osi devan lé zieu bann zom » (2 Korintien 8:21). I fo ke ou lé fran avèk out konjoin su larjan ke ou gagn é larjan ke ou dépans.

Avan pran bann gran désizion ke néna in lien avèk larjan, demann a chak foi out konjoin kosa li pans (Provèrb 13:10). Bann diskusion fran su larjan va èd a zot rès an pé dan zot maryaj. I fo pa ke ou konsidèr out revnu kom out larjan a ou, mé kom larjan tout la fami (1 Timoté 5:8).

KOSA OU PE FÈR :

• Mèt a zot dakor su la kantité larjan ke chakèn i pe dépansé san rann kont inn é lot.

• Atann pa ke in problèm i ariv pou koz su larjan.