Dan tout bann relijion, néna bann domoun ke néna in keur antié. Néna in gayar nouvèl : Bondieu i voi bann domoun la, é li fé in kont avèk zot. Sak lé regrétab, sé ke bann domoun i utiliz la relijion pou fé bann mové zafèr (2 Korintien 4:3, 4 ; 11:13-15). Laktualité i mont ke désèrtin relijion lé mayé dann bann zafèr téroris, oubien zot i masak bann peup an antié, ou ankor zot i fé la gèr. Désèrtin chèf dan la relijion i maltrèt bann marmay, oubien i fé bann zagrésion séksuèl su banna. Sak i kroi vréman an Bondieu, néna le keur ki fé mal kan zot i voi tousa ! (Lir Matieu 24:3-5, 11, 12).

 Le vré relijion i donn loneur Bondieu, alor ke bann fo relijion i fé bann zafèr ki plé pa li dutou. Bann fo relijion i ansègn tout kalité zafèr ke lé pa ékri dan la Bib. Par égzanp, zot i ansègn bann zafèr manteur su Bondieu é su bann mor. Mé Jéova i ve ke bann domoun i koné la vérité su li (Lir Ézékièl 18:4 ; 1 Timoté 2:3-5).

 Ankor ereu ke Bondieu i lès pa li tronpé par bann fo relijion. Zot i fé kroir ke zot i ièm a li, mé an vré, zot i ièm le monn ke lé dirijé par Satan (Jak 4:4). Dan la Bib, tout bann fo relijion lé aplé « Gran Babilonn ». Pou kosa ? Parske le fo relijion la aparèt apré le Déluj dan in vil ke té i apèl Babilonn. I tard pa, in kou mèm, Bondieu va détrui bann fo relijion la. Li va fé sa, parske banna i tronp bann domoun é i fé souf a zot (Lir Révélasion 17:1, 2, 5, 16, 17 ; 18:8).

 Jéova i oubli pa bann domoun ke néna in keur antié, é ke lé fané parmi bann fo relijion su tout la tèr. Li lé antrèn rasanm a zot dan le vré relijion par lansègnman ke li donn a zot (Lir Miché 4:2, 5).

 Jéova i fé in kont èk bann domoun ki ièm sak lé vré é sak lé bien. Li demann a zot de larg, toutsuit, bann fo relijion. In moun ki ièm Bondieu, lé pré pou fé bann chanjman la, pou fé plézir a li (Lir Révélasion 18:4).

 Dann tan premié sièk, bann domoun ke lavé in keur antié, la montré ke zot lété kontan kan zot la antandu bann gayar nouvèl ke bann zapot té i anons. Gras Jéova, zot la dékouv in nouvo fason d’viv, ke la rann a zot ereu, la donn a zot in but dan la vi é in léspérans pou lavnir. Banna i donn a nou in bon légzanp : dèk zot la antandu bann gayar nouvèl la, zot la mèt Jéova an premié dan zot vi (Lir 1 Tésalonisien 1:8, 9 ; 2:13).

 Sak i larg bann fo relijion, Jéova i akeuy a zot dan son fami ousa néna son bann sèrviteur. Si ou di oui son linvitasion, ke lé fé avèk bon keur, ou va devnir son kamarad, ou va rant dan son fami ki ièm a zot inn é lot, é ou nora la vi pou toultan (Lir Mark 10:29, 30 ; 2 Korintien 6:17, 18).

 I tard pa, Bondieu va détrui tout bann fo relijion. Sa lé in gayar nouvèl ! Nora pu dutou bann soufrans dan le monn antié. Jamé plu, bann fo relijion va tronp bann domoun é va mèt dézord ant zot. Tout sak lé dann sièl é su la tèr, va ador le seul vré Bondieu uni ansanm (Lir Révélasion 18:20, 21 ; 21:3, 4).