Bondieu la organiz bann désandan Abraam pou ke zot i form in nasion, é li la donn a zot bann loi. Li la apèl se nasion « Israèl ». Le peup té i doi ador Bondieu kom Li li ve, é zot lavé la résponsabilité protèj le vré ladorasion é la parol Bondieu (Psom 147:19, 20). Alor, gras la nasion Israèl, bann domoun tout nasion té i pe gingn bann bénédiksion (Lir Jenèz 22:18).

 Bondieu la choizi bann Zisraélit pou èt son bann témoin. Sak la ariv a zot, i mont ke kan nou obéi bann loi Bondieu, nou gingn bann bénédiksion (Detéronom 4:6). Gras bann Zisraélit, bann domoun dot nasion té i pe aprann konèt le vré Bondieu (Lir Izai 43:10, 12).

 Avèk le tan, Israèl la pèrd la faveur Bondieu. Donk, Jéova la ranplas nasion la, par lasanblé krétien (Matieu 21:43 ; 23:37, 38). A nout lépok, sé pu bann Zisraélit ke lé son bann témoin, mé sé bann vré krétien (Lir Akt 15:14, 17).

 Jézu la organiz son bann disip pou ke zot i prèch, é ke a zot osi, zot i fé dot disip dann tout nasion (Matieu 10:7, 11 ; 24:14 ; 28:19, 20). Aleurkilé, nou viv dann dèrnié jour se monn la, é la prédikasion lé fé ankor plus par rapor avan. Pou in premié foi, Jéova i uni ansanm domoun tout nasion par milion, é sa, pou ador a li dan le vré relijion (Révélasion 7:9, 10). Bann vré krétien lé organizé pou ankouraj a zot, é pou èd a zot inn é lot. Dan le monn antié, zot i profit le mèm lansègnman biblik kan zot néna zot bann rénion (Lir Ébreu 10:24, 25).

 Dann bann zané 1870, inn ti group bann zétudian la Bib la remèt la min su bann vérité biblik oublié depui lontan. Zot la konpri ke Jézu lavé organizé lasanblé bann krétien pou préché. Alor, a zot tour, zot la prèch le Roiyom su tout la tèr. Lané 1931, zot la désid port le non Témoin Jéova (Lir Akt 1:8 ; 2:1, 4 ; 5:42).

 Dann tan premié sièk, lavé bann zasanblé krétien dan in bonpe péi. Banna lété dirijé par in kolèj santral (in group avèk bann mesieu ke lavé léspèryans) é zot té i aksèpt Jézu kom le Chèf lasanblé (Akt 16:4, 5). Koméla lé parèy, bann Témoin Jéova lé dirijé par in Kolèj santral. Bann zansien la, néna in bonpe léspèryans, é banna, i dirij bann buro nasional ousa i tradui, i inprim é i distribu bann publikasion bazé su la Bib an 800 lang é plus. Parsa, banna i aport osi bann zankourajman é in diréksion pou 120 000 lasanblé é plus su tout la tèr. Dann chak lasanblé la, néna bann mesieu ki ranpli bann kondision pou èt ansien ou résponsab. Zot i pran soin le « troupo Bondieu » avèk lamour (Lir 1 Pièr 5:2, 3).

 Bann Témoin Jéova lé organizé pou prèch la bonn nouvèl é pou fé bann disip. Nou sa va préché kaz an kaz, kom bann zapot la fé (Akt 20:20). Nou propoz in létud la Bib avèk bann domoun ki ièm vréman la vérité. Mé nou lé pa rienk in peup organizé. Nou form in fami é nou néna in Papa ki ièm a nou. Nou lé bann frèr é seur ki sousi a nou inn é lot (2 Tésalonisien 1:3). Bann sèrviteur Jéova i ve fé a li plézir, zot i ve èd lé zot, é sé pousa ke zot lé organizé. Donk, zot i form le fami le plu ereu su tout la tèr ! (Lir Psom 33:12 ; Akt 20:35).