1, 2. Kèl késtion in bonpe domoun i poz a zot ?

 IN LINONDASION i détrui in vilaj. In bonom armé i tir su bann domoun dan in légliz : li blès é li tué in bonpe d’moun. In madam i trouv la mor akoz in kansèr : son sink zanfan i pèrd zot momon.

² Kan bann katastrof oubien bann maleur i ariv, in bonpe domoun i demann a zot : « Akoz néna in bonpe la èn é la soufrans dan le monn ? » É ou, èske ou la déja poz a ou késtion la ?

3, 4. a) Kèl késtion Abakuk la pozé ? b) Kosa Jéova la réponn Abakuk ?

³ La Bib i di ke mèm bann zom ke lavé in bonpe la foi an Bondieu la poz a zot késtion la. Par égzanp, le profèt Abakuk la demann Jéova : « Akoz ou fé voir a moin linjustis ? É akoz ou lès le for ranport su le plu fèb ? Akoz néna déstruksion la é la violans la otour d’moin ? Akoz néna tout bann ralé pousé la é tout bann batay la ? » (Abakuk 1:3).

⁴ Bondieu la réponn Abakuk. Dann Abakuk 2:2 é 3, li la promèt Abakuk ke li va règ la situasion. Jéova i ièm in bonpe bann zumin. La Bib i di : « Li sousi a li in bonpe pou zot » (1 Pièr 5:7). An fin d’kont, voir bann domoun soufèr, sé in nafèr ke Bondieu i détès ankor plus ke nou (Izai 55:8, 9). Mé alor, akoz néna in bonpe la soufrans komsa ?

5. a) Kosa in bonpe zansénian relijieu i di su bann soufrans ? b) Kosa la Bib i ansègn a nou su bann soufrans ?

⁵ Souvan, kan kèlkin i souf, bann pasteur, bann prèt é dot zansénian relijieu i di : « Sé la volonté Bondieu. » Parfoi, zot i di osi ke tout sak i sar arivé dan la vi in moun la été désidé par Bondieu lontan avan, mèm son bann maleur, é ke nou pe pa konprann pou kosa. An plus, kan in gran pèrsonn ou mèm inn ti marmay i mor, zot i di ke Bondieu té i ve ke li lé dann sièl ansanm li. Mé tousa lé pa vré. Jéova lé pa loteur bann maleur. La Bib i di ke lé pa posib ke Bondieu i komèt le mal oubien ke li fé sak lé injus (Job 34:10).

6. In bonpe domoun i di ke Bondieu lé loteur tout bann soufrans dan le monn. Pou kosa zot i di sa ?

⁶ In bonpe domoun i di ke Bondieu lé résponsab tout bann soufrans. Pou kosa zot i di sa ? Parske zot i pans ke sé li ki komann tout la tèr. Mé nou la aprann dann chapit 3 ke le chèf le monn, sé Satan le Diab.

7, 8. Akoz le monn lé ranpli avèk bann soufrans ?

⁷ La Bib i di ke « le monn antié lé dirijé par le méchan » (1 Jan 5:19). Satan, le chèf le monn, lé kruèl. Li « tronp le monn antié » (Révélasion 12:9). É néna in bonpe domoun lé kom li. Sé surtou akoz de sa ke le monn lé ranpli avèk bann domoun ki ramas manteur, avèk la èn é bann mové zafèr.

⁸ Mé le monn lé ranpli avèk bann soufrans pou dot rézon ankor. Adan é Èv la rejèt la diréksion Bondieu é zot la transmèt le péché zot bann désandan. Akoz le péché, bann domoun i fé souf dot moun. Souvan zot i ve dominn lé zot. Bann domoun i batay avèk inn é  lot, zot i fé a zot le mal é zot i fé la gèr ant zot (Éklézias 4:1 ; 8:9). Pou fini, parfoi bann soufrans lé provoké par « in lévènman ke nou atann pa » (Éklézias 9:11). Kèlkin i pe fé in laksidan, oubien in maleur i pe ariv a li, parske li lé o mové landroi o mové moman.

9. Akoz nou pe èt sur ke Jéova néna vréman in bon rézon pou pèrmèt bann soufrans ?

⁹ Bann soufrans lé jamé provoké par Jéova. Lé pa akoz de li ke néna bann gèr, bann krim, oubien la violans. Li lé pa loteur non plu bann katastrof naturèl, kom bann tranbleman d’tèr, bann siklonn é bann zinondasion. Mé alor, ou demann a ou petèt : « Si Jéova lé le moun le plu puisan dann lunivèr, pou kosa li lès tout bann maleur la arivé ? » Nou koné ke Bondieu i ièm a nou. Donk, i fo li néna vréman in bon rézon pou pèrmèt bann soufrans (1 Jan 4:8).

10. Su kosa Satan la akuz Jéova ?

¹⁰ Dann jardin Lédèn, Satan le Diab la tronp Adan é Èv. Li la akuz Bondieu kan li la di ke li lé in mové dirijan. É li la di avèk Adan é Èv ke Bondieu la défann a zot profit in bon nafèr. Satan la fé kroir a zot ke li sré in méyeur dirijan é ke zot lavé pa bezoin Jéova (Jenèz 3:2-5) (regard la not n^o 27).

11. Kèl késtion nou sa réponn ?

¹¹ Adan é Èv la dézobéi Jéova é zot la rebèl a zot kont li. Zot té i pans ke zot lavé le droi désid par zot mèm sak lété bien é sak lété mal. Mé zot lavé tronp a zot. Jéova i koné sak lé mieu pou bann zumin. Kosa li té i sar fé pou prouv sa ?

12, 13. a) Akoz Jéova la pa tué Adan é Èv toutsuit ? b) Pou kosa Jéova la pèrmèt Satan èt le chèf le monn ? c) Akoz Jéova la lès bann zumin dirij a zot par zot mèm ?

 ¹² Jéova la pa tué Adan é Èv toutsuit. Li la lès a zot fé bann zanfan. É li la pèrmèt bann désandan Adan é Èv choizi kèl dirijan zot té i ve. Le projé Bondieu lété ke la tèr lé ranpli avèk bann zumin parfé. É sé sa mèm ke i sar arivé, mèm si le Diab i ve défann a li (Jenèz 1:28 ; Izai 55:10, 11).

¹³ Satan la akuz Jéova devan bann milion d’zanj (Job 38:7 ; Danièl 7:10). Sé akoz de sa ke Jéova la donn Satan le tan pou ke li prouv son bann zakuzasion. Sé pousa mèm Jéova la lès le tan bann zumin, pou ke zot i mont si zot lété kapab dirij a zot par zot mèm san son lèd. Donk, li la lès a zot mèt an plas bann gouvèrnman sou lotorité Satan.

14. Kosa le tan la prouvé ?

¹⁴ Depui bann milié d’zané, bann zumin i ésèy dirij a zot par zot mèm. Mé zot i ariv pa fé sa. Sa i prouv ke Satan lé in manteur. Bann zumin la bezoin ke Bondieu i èd a zot. Le profèt Jérémi lavé bien rézon kan li la di : « O Jéova, mi koné bien ke in moun i pe pa trouv son chemin touseul. Lom ki march la poin le droi dirij son bann pa » (Jérémi 10:23).

15, 16. a) Pou kosa Jéova i pèrmèt bann soufrans depui tèlman lontan ? b) Jéova la pa ankor règ bann problèm provoké par Satan. Akoz ?

¹⁵ Pou kosa Jéova i pèrmèt bann soufrans depui tèlman lontan ? Pou kosa li lès bann maleur arivé ? I falé lès le tan pasé, pou prouv ke la dominasion Satan lé mové. Bann zumin la ésèy tout kalité gouvèrnman,  mé la poin inn parmi zot ke la donn bann bon rézulta. Malgré bann progré siantifik é téknik, jamé nou la vu in paké linjustis komsa, domoun pov, bann krim é bann gèr. Donk, bann zumin lé pa kapab dirij a zot par zot mèm, san lèd Bondieu.

¹⁶ Jéova la pa règ bann problèm ke Satan la provoké. Si li lavé fé sa, sé komsi li noré èd Satan dirij le monn. Mé jamé li va soutien la dominasion le Diab ! An plus, bann zumin noré pu kroir ke zot lété kapab dirij a zot par zot mèm. Mé sa lé manteur. É jamé Jéova va fé in nafèr ki pouré fé kroir a zot zafèr manteur la ! Jéova i ramas jamé manteur (Ébreu 6:18).

17, 18. Kosa Jéova va fé pou ke tout bann maleur ke Satan la provoké i disparèt ?

¹⁷ Kan Satan é bann zumin la rebèl a zot, sa la provok in bonpe bann maleur. Èske Jéova i pe aranj tousa ? Oui. Tout lé posib pou Bondieu. Jéova i koné kansa i sra prouvé ke tout bann zakuzasion Satan lé fo. Alor li va chanj la tèr an paradi, kom li lavé prévu. Tout bann domoun ke lé dan bann « tonm » va reviv (Jan 5:28, 29). Jamé pu bann zumin va tonm malad é jamé pu zot va konèt la mor. Jézu va fé disparèt tout bann maleur provoké par Satan. Jéova va utiliz Jézu pou « détrui sak le Diab la fé » (1 Jan 3:8). Nou lé kontan ke an atandan, li mont son pasians anvèr nou. Li donn a nou lokazion aprann konèt a li é choizi a li kom Dirijan (lir 2 Pièr 3:9, 10). É kan nou souf, li èd a nou tienbo ansanm (Jan 4:23 ; lir 1 Korintien 10:13).

¹⁸ Jéova i oblij pa nou choizi a li kom Dirijan. Li la donn bann zumin in kado vréman gayar : la libèrté fé bann choi sétadir la libèrté pou désid sak  nou ve fé ou pa. Alon voir koman nou pe utiliz kado la.

19. Kèl kado Jéova la donn a nou ? É pou kosa nou devré aprésié kado la ?

¹⁹ Bondieu la donn a nou in kado ke néna la valeur : sé la libèrté pou choizi sak nou ve fé. Sa i rann a nou vréman diféran bann zanimo. Bann zanimo i fé bann zafèr surtou dapré zot linstin. Zot lé pa kapab désid sak lé bien é sak lé mal. Mé nou, nou pe choizi kèl vi nou ve avoir é désid kontant le keur Jéova (Provèrb 30:24-28). Nou lé pa parèy bann machinn osi. Bann machinn lé programé pou fé sak i demann a zot. Mé nou, nou néna la libèrté choizi kèl kalité d’moun nou ve èt, kisa nou nora kom kamarad é sak nou sar fé de nout vi. Jéova i ve ke nou néna in vi ereu.

20, 21. Kosa i lé le méyeur désizion ou pe prann ojourdui ?

²⁰ Jéova i ve ke nou ièm a li (Matieu 22:37, 38). Li lé kom in papa ke lé kontan kan son zanfan i di a li avèk tout son keur « Mi ièm a ou », é pa parske la fors a li pou di sa. Li lès a nou la libèrté désid si nou va sèrv a li ou non. Satan, Adan é Èv la pran la désizion de pa sèrv Bondieu. É ou, kosa ou sar fé avèk la libèrté ke Jéova la donn a ou ?

²¹ Bann domoun par milion la choizi obéi Jéova olèrk Satan. A ou osi, utiliz out libèrté pou sèrv Jéova (Provèrb 27:11). Dan le monn nouvo, li va tir in foi pou tout bann soufrans. Kosa ou pe fé pou viv dann monn nouvo la ? Le chapit i vien apré i donn la répons pou késtion la.