1, 2. Kèl késtion ou doi poz a ou ? É akoz sa lé inportan ?

GRAS out létud la Bib, ou la aprann ke in bonpe domoun i di ke zot i ador Bondieu, mé kan nou regard bien, banna i ansègn oubien i fé bann zafèr ke Bondieu i suport pa dutou (2 Korintien 6:17). Sé pousa mèm, ke Jéova la donn a nou lord kit le fo relijion, lo « Gran Babilonn » (Révélasion 18:2, 4). Kosa ou va désid fé ? Nout tout, nou doi prann in désizion. Nou doi demann a nou : « Èske mi ve ador Bondieu kom li ve oubien kom ma la toujour fé depui toultan ? »

² Si ou la déja kit le fo relijion, ou la fé in bon nafèr. Mé petèt ke néna sèrtin koutum dan le fo relijion ke ou ièm ankor. Alon voir kosa i lé detroi koutum la. Ou va konprann pou kosa lé inportan voir tousa kom Jéova i voi.

3. a) Désèrtin i trouv ke lé difisil ador Bondieu san ansèrv bann zimaj. Pou kosa ? b) Kosa la Bib i di kan i ansèrv bann zimaj pou ador Bondieu ?

³ Depui dann tan lontan, pou ador Bondieu, désèrtin i ansèrv bann zimaj, bann léstatu oubien bann ti chapèl pou fé zofrann. Èske a ou osi ou fé sa ? Si oui, petèt ou trouv ke lé bizar, ou mèm ke lé pa bon dutou ador Bondieu san ansèrv bann zafèr la. Mé oubli pa in nafèr : sé Jéova ki désid koman i fo ador a li. É la  Bib lé klèr la d’su : Bondieu i ve pa ke nou ansèrv bann zimaj pou ador a li (lir Égzod 20:4, 5 ; Psom 115:4-8 ; Izai 42:8 ; 1 Jan 5:21).

4. a) I fo pa ador bann zansèt. Akoz ? b) Jéova la donn lord son bann sèrviteur de pa ésèy koz avèk bann mor. Pou kosa ?

⁴ Désèrtin i ansèrv in bonpe zot tan, zot fors é zot larjan pou kontant zot bann zansèt. Parfoi, zot i sa va mèm juska ador banna. Mé nou la aprann ke bann mor i pe pa èd a nou ni fé souf a nou. Zot i viv pa dan in landroi kékpar. É lé danjereu ésèy rant an kontak èk zot, parske nou pouré kroir ke in mor la pou koz èk nou, alor ke sé bann démon ke lé dèryèr sa. Sé pousa ke Jéova la donn lord bann Zisraélit de pa ésèy koz avèk bann mor. Zot té i doi pa fé rien ke té i fé rant a zot an kontak avèk bann mové zéspri (Detéronom 18:10-12 ; regard bann not n^o 26 é 31).

5. Si ou ansèrv bann zimaj pou ador Bondieu, ou si ou ador out bann zansèt, kosa va èd a ou arèt fé sa ?

⁵ Si ou ansèrv bann zimaj pou ador Bondieu, ou si ou ador out bann zansèt, kosa va èd a ou arèt fé sa ? Ou doi lir la Bib é pran in tan pou kalkul èk sèryeu sak Bondieu i pans de sa : li « détès » sa, é li trouv sa dégoutan (Detéronom 27:15). Tou lé jour, pri Bondieu pou ke li èd a ou voir lé choz kom li é pou ke ou ador a li kom li ve (Izai 55:9). Ou pe èt sur ke li va donn a ou la fors pou ke ou jèt tout sak na in lien avèk bann fo relijion.

6. Bann chèf Légliz la désid fèt la nésans Jézu le 25 désanm. Pou kosa ?

⁶ Dan le monn antié, Noèl lé in fèt ke tout domoun  partou i koné. In bonpe domoun i pans ke sé la fèt la nésans Jézu. Mé, Noèl lé in fèt ke lé an lien dirèk avèk bann fo relijion. In liv éspésializé i ésplik ke bann Romin, ke lété bann payin (bann domoun ki ador in bonpe dieu), té i fèt la nésans le solèy le 25 désanm. Bann chèf Légliz té i ve ke in bonpe payin i devien krétien. Sé pousa ke zot la désid fèt la nésans Jézu le 25 désanm, mèm si li lé pa né se jour la (Luk 2:8-12). Parkont bann disip Jézu té i fèt pa Noèl. In liv éspésializé lad’su i ésplik ke su in pèryod 200 zan apré la nésans Jézu, « na poin in moun ke té i koné kan égzakteman li té né, é prèske pèrsonn té i fé in kont èk sa » (Sacred Origins of Profound Things). An vré, bann domoun la komans fèt Noèl bann santèn zané apré la nésans Jézu.

7. Akoz bann vré krétien i fèt pa Noèl ?

⁷ In bonpe domoun i koné ke Noèl é son bann koutum (kom donn kado inn é lot é bann repa d’fèt) i sort dan bann relijion payin. Lavé in tan, dann péi Langletèr é dan detroi téritoir Lamérik, domoun lavé poin le droi fèt Noèl, parske sa té i sort dan bann relijion payin. Tout sak té i dézobéi, lété puni. Mé aprésa, bann domoun la rekomans fèt Noèl. Akoz bann vré krétien i fèt pa Noèl ? Parske zot la anvi kontant le keur Bondieu.

8, 9. Bann premié krétien té i fèt pa bann zanivèrsèr nésans. Akoz ?

⁸ Néna in bonpe domoun i fèt zot lanivèrsèr nésans. Èske bann vré krétien i fèt sa osi ? Bann zanivèrsèr nésans ke lé dan la Bib, lété fé par bann domoun  ke té i ador pa Jéova (Jenèz 40:20 ; Mark 6:21). Bann payin té i ansèrv bann fèt bann zanivèrsèr nésans pou onor bann fo dieu. Sé pousa ke pou bann premié krétien, « la fèt pou bann zanivèrsèr nésans lété in koutum payin » (The World Book Encyclopedia).

⁹ Bann Romin é bann Grèk té i kroi ke la nésans chak moun té i tonm pil le jour lanivèrsèr nésans in dieu. Zot té i kroi ke in léspri lété an kontak avèk le dieu, é ke, le léspri lété la pou la nésans le moun. É donk, pou ke le léspri i protèj a li, alor le moun té i doi fèt son lanivèrsèr nésans.

10. Bann vré krétien i fèt pa bann zanivèrsèr nésans. Pou kosa ?

¹⁰ Dapré ou, èske Jéova lé dakor avèk bann fèt ke na in lien èk bann fo relijion ? (Izai 65:11, 12). Non pa dutou. Sé pousa mèm, ke bann vré krétien i fèt pa bann zanivèrsèr nésans, ni okin fèt, ke na in lien èk bann fo relijion.

11. a) Akoz désèrtin i fé bann fèt payin ? b) Kosa i doi kont le plus pou ou ?

¹¹ In tralé d’moun i koné ke Noèl é dot fèt i sort dan bann relijion payin. Malgrésa, zot i kontinué fèt tousala. Zot i di a zot ke bann fèt la, sé in lokazion pou pas in moman èk zot fami. É ou mèm, kosa ou an pans ? Na rien d’mové si kèlkin i ve pas in pe d’tan avèk son fami. Sé Jéova ke la kré la fami, é li ve ke nou néna in bon lantant avèk bann domoun nout fami (Éfézien 3:14, 15). Mé i fo pa ke nou ésèy kontant banna, é alé fé bann fèt amayé ansanm bann fo relijion. Sak i kont le plus, sé rod moiyin pou èt proch  koté Jéova. Dayeur, lapot Pol la di : « Kontinué rod sak i kontant lo Sénieur » (Éfézien 5:10).

12. Pou kosa Jéova lé pa dakor avèk désèrtin fèt ?

¹² In bonpe domoun i pans ki sèrv pa rien konèt kèl koté in fèt i sort. Mé Jéova i pans pa komsa dutou. Li lé pa dakor avèk bann fèt ke lé amayé ansanm bann fo relijion ou ki mèt an lèr bann domoun oubien in péi. Par égzanp, dann péi Léjip, bann domoun lavé in bonpe fèt pou zot fo dieu. Kan bann Zisraélit la kit péi Léjip, zot la kopié in fèt ke lété fé par bann domoun dann péi la. Zot la di ke sa lété « in fèt pou Jéova ». Mé Jéova la korij a zot pou sak zot la fé (Égzod 32:2-10). Le profèt Izai la di « touch pa rien ke lé souyé » (lir Izai 52:11).

13. Le jour ou va désid arèt fé bann fèt payin, ou va poz a ou petèt bann késtion. Lékèl par égzanp ?

¹³ Le jour ou va désid arèt fé bann fèt payin, ou va poz a ou petèt in bonpe késtion. Par égzanp : « Kosa mi doi fé, si mon bann kolèg travay i demann a moin, akoz mi fèt pa Noèl avèk zot ? Kosa mi doi fé si in moun, i donn a moin in kado pou Noèl ? Kosa mi doi fé, si mon madam oubien mon mari, i ve ke mi fé in fèt payin ? Koman fé pou ke mon bann marmay lé pa chagriné parske zot i fé pa in fèt payin oubien zot lanivèrsèr ? »

14, 15. Si in moun i souèt a ou bonn fèt ou si i donn a ou in kado, kosa ou pe fé ?

¹⁴ Kan ou va désid kosa ou sar di ou kosa ou sar fé, i fo ke ou kalkul bien avan. Par égzanp, si kèlkin i di a ou bonn fèt, fé pa out zorèy kochon dann marmit  poi. Pa bezoin rod konpliké, ou pe di a li mèrsi. Mé nadfoi, désèrtin i ve konèt plus. Ou pe profit lokazion pou ésplik a zot, pou kosa ou fé pa bann fèt la. Rès toultan janti é réspèk a zot, é alé pa di a zot bann zafèr ki pouré fé mal a zot. La Bib i di : « Out bann kozman i doi èt toultan atiran, asézoné èk de sèl, de fason ke ou va konèt koman ou doi réponn chak moun » (Kolosien 4:6). Par égzanp, ou pe di ke ou ièm pas in bon moman avèk lé zot é donn a zot bann ti kado, mé ke ou atann pa bann fèt la pou fé sa.

¹⁵ É si in moun i donn a ou in kado pou in fèt payin ? La Bib i di pa kosa nou doi fé pou chak situasion ke nou viv, mé li di a nou gard in konsians klèr (1 Timoté 1:18, 19). Somanké, le moun ki donn a ou in kado, i koné pa ke ou fèt pa tousa. Oubien alor, li pouré di a ou : « Mi koné ke ou fèt pa tousa, mé ma la anvi donn a ou ti kado la. » Dan lé 2 ka, ou pe désid pran le kado ou non. Mé pou ninport kèl désizion ou sar prann, gard in konsians klèr. Nou ve pa fé rien ki pouré gat nout lamitié avèk Jéova.

16. Si out fami na anvi fé in fèt payin, kosa ou doi fé ?

¹⁶ Kosa ou fé si out fami i ve fé in fèt payin ? Pa bezoin rod ralé pousé èk zot. Banna na le droi fé sak zot i ve. Rès janti é réspèk zot fason d’voir lé choz, kom ou ve ke banna i réspèk out poin d’vu (lir Matieu 7:12). Mé asteur, kosa ou fé si out fami i ve ke ou pas in moman avèk zot, pou la fèt la ? Pou komansé, pri Jéova pou ke li èd a ou prann le bon désizion. Aprésa, kalkul bien le situasion ou lé dedan é alé fé rechèrch  desu. Oubli pa in nafèr : sak ou ve, sé kontant le keur Jéova.

17. Koman ou pe èd out marmay pou ke zot na poin linprésion ke zot i pèrd kékchoz kan zot i voi domoun fé bann fèt payin ?

¹⁷ Koman ou pe èd out marmay pou ke zot na poin linprésion ke zot i pèrd kékchoz kan zot i voi domoun fé bann fèt payin ? Tanzantan, ou pe fé inn ti zafèr éspésial pou zot. Ou pe osi donn a zot bann ti kado. In gayar kado ke ou pe fé a zot, sé donn a zot out tan é mont ke ou ièm a zot.

18. Pou kosa i fo asis bann rénion krétien ?

¹⁸ Pou kontant le keur Jéova, i fo kit bann fo relijion é rejèt lo bann fèt é lo bann koutum ke lé avèk. Mé i fo osi ador Bondieu kom li ve. Koman nou fé sa ? Sé par égzanp, kan nou pran labitud asis bann rénion krétien (lir Ébreu 10:24, 25). Bann rénion la, néna son linportans dan le fason ador Bondieu kom li ve (Psom 22:22 ; 122:1). É sa i donn a nou osi bann moiyin pou ankouraj a nou inn é lot (Romin 1:12).

19. Pou kosa lé inportan koz èk lé zot sak ou la aprann dan la Bib ?

¹⁹ Koz èk lé zot sak nou la aprann dan la Bib, néna osi son linportans dan le fason ador Bondieu kom li ve. Désèrtin, léspri lé pa trankil kan zot i voi ke néna in bonpe méchansté su la tèr. Ou koné petèt bann domoun komsa. Fé konèt a zot out gayar léspérans. Kan ou asis bann rénion krétien é kan ou koz èk lé zot bann vérité biblik, ou nora pu anvi rès anndan in fo relijion ni suiv son bann koutum. Lé sur : si ou choizi sèrv Jéova le bon fason, li va béni out bann zéfor é ou s’ra ereu (Malaki 3:10).