1-3. a) Kèl késtion bann domoun i poz a zot su la mor ? b) Kosa désèrtin relijion i di su la mor ?

 LA BIB i promèt ke in jour « nora pu la mor » (Révélasion 21:4). Dann chapit 5, nou la aprann ke la ranson i donn a nou le moiyin viv pou toultan. Mé ojourdui, bann domoun i mor ankor (Éklézias 9:5). Alor, in bonpe domoun i demann a zot : « Kosa nou devien kan nou mor ? »

² Kan kèlkin nou ièm i mor, nou ve konèt ankor plus la répons se késtion la. Nou demann a nou : « Ousa li lé ? Èske li voi a moin ? Èske li pe èd a moin ? Èske ma revoi a li in jour ? »

³ Pou bann késtion la, bann relijion i donn diféran répons. Désèrtin relijion i di ke bann domoun ke lé bon i sa va dann sièl, é sak lé mové i sa va dann lanfèr. Dot relijion i di ke, kan kèlkin i mor, li devien in léspri é li sar viv avèk son bann fami ke la finn mor. É dot relijion i di ke apré la mor, nou lé jujé é nou renèt avèk in kor diféran ou avèk le kor ninport kèl zanimo.

4. Kosa in bonpe relijion i di su la mor ?

⁴ Bann relijion i ansègn bann zafèr vréman diféran su la mor. Mé in bonpe i di ke, kan in moun i mor, son léspri i sort dan son kor pou kontinué viv. Mé èske sa lé vré ?

5, 6. Kosa nou devien kan nou mor ?

⁵ Jéova i koné kosa i éspas apré nout mor. Li di a nou ke, kan kèlkin i mor, li arèt viv. La mor lé le kontrèr la vi. Donk, kan kèlkin i mor, tout sak li resan é son bann souvnir i kontinué pa viv dan in not landroi a. Kan nou mor, nou voi pu rien, nou antan pu rien é nou pans pu rien.

⁶ Le roi Salomon la ékri ke bann mor « i koné pu rien ». Bann mor i pe pa émé ni détès lé zot. « Na poin travay, na poin projé, na poin konésans, na poin sajès dan la Tonm » (lir Éklézias 9:5, 6, 10). Dann Psom 146:4, la Bib i di ke, kan kèlkin i mor, « son bann pansé » i mor avèk li.

7. Kosa Jézu la di su la mor ?

⁷ Lazar lété in kamarad Jézu. Kan li lé mor, Jézu la di avèk son bann disip : « Lazar, nout kamarad, lapou dormi. » Mé li té ve pa di ke Lazar té i dor. Jus aprésa, li la di : « Lazar lé mor » (Jan 11:11-14). Donk, Jézu la di ke la mor lé kom le somèy. Li la pa di ke Lazar lété dann sièl oubien avèk son bann fami ke lété déja mor. Li la pa di ke Lazar lété dan in lanfèr d’fe. É li la pa di osi ke Lazar la renèt dan in not kor. An vré, lété komsi Lazar té i dor. Dot vèrsé la Bib i di ke la mor lé kom in gro somèy. La Bib i di ke, kan Étièn la été tué, li la « andor a li dan la mor » (Akt 7:60). Lapot Pol la ékri  osi ke sèrtin krétien « la andor a zot dan la mor » (1 Korintien 15:6).

8. Koman nou koné ke Jéova la pa kré bann zumin pou ke zot i mor ?

⁸ Kan Jéova la kré Adan é Èv, èske li té ve ke zot 2 té i mor in jour ? Non ! Li lavé kré banna pou ke zot i viv pou toultan é avèk in santé parfé. Li la mèm donn a zot lanvi viv pou toultan (Éklézias 3:11). Bann paran i ve pa voir zot zanfan konèt la viéyès é la mor. Lé parèy pou Jéova. Mé alor, si Jéova la kré a nou pou viv pou toultan, akoz nou mor ?

9. Pou kosa le komannman Jéova lavé donn Adan é Èv lété pa difisil pou suiv ?

⁹ Dann jardin Lédèn, Jéova lavé di avèk Adan : « Ou pe manj bann frui tout bann piédboi dann jardin — la kantité ou ve —, mé ou doi pa manj bann frui le piédboi la konésans sak lé bien é sak lé mové. Parske le jour ousa ou va manj sa, lé sur ke ou va mor » (Jenèz 2:9, 16, 17). Se komannman lété klèr, é lété pa difisil pou obéi. An plus, Jéova lété an droi pou di sak lété bien é sak lété mal pou Adan é Èv. Si banna lavé obéi Jéova, zot noré montré ke zot lavé réspé pou son lotorité é ke zot té ièm vréman tout sak li lavé donn a zot.

10, 11. a) Koman Satan la tronp Èv ? b) Sak Adan é Èv la fé lété grav. Akoz ?

¹⁰ Lé bien malereu, Adan é Èv la désid dézobéi Jéova. Satan la demann avèk Èv : « Èske Bondieu la vréman di ke zot i doi pa manj bann frui su tout bann piédboi dann jardin ? » Èv la réponn a li : « nou pe manj bann frui bann piédboi dann jardin. Mé konsèrnan bann frui le piédboi ke lé dann milieu le jardin, Bondieu la di : “Zot i doi pa manj sa, [...] sinonsa zot va mor” » (Jenèz 3:1-3).

¹¹ Alor Satan la di : « Lé sur ke zot i sar pa mor dutou. Parske Bondieu i koné ke, le jour mèm ousa zot va manj le frui le piédboi, [...] zot i sra kom Bondieu : zot va konèt sak lé bien é sak lé mové » (Jenèz 3:4-6). Satan té ve fé kroir Èv ke èl té i pe désid par li mèm sak lété bien é sak lété mové. É li la ramas manteur su sak té sar arivé si èl té dézobéi : li la di ansanm Èv ke èl té  sar pa mor. Alor Èv la pran le frui é èl la donn Adan. Adan é Èv té koné ke Jéova lavé di a zot de pa manjé frui la. Mé zot la désid dézobéi se komannman bien klèr é fasil pou suiv. Lété klèr : zot lavé poin réspé pou zot Papa ke i ièm a zot. É zot lavé okin rézon pou fé sa !

12. Kosa Jéova la resanti kan li la vu ke Adan é Èv lavé okin réspé pou li ?

¹² Jéova lété vréman kontraryé ke Adan é Èv lavé okin réspé pou li ! Alon prann in légzanp : Ou la fé tout out posib pou bien élèv out garson é out fiy. Mé out bann zanfan i rebèl a zot é i fé le kontrèr sak ou la demann a zot. Kosa ou resan ? Lé sur ke ou lé kontraryé.

13. Jéova la di avèk Adan : « Ou va artourn an pousièr. » Kosa li té ve dir par la ?

¹³ Kan zot la dézobéi Bondieu, Adan é Èv la pèrd le moiyin viv pou toultan. Jéova la di avèk Adan : « Ou lé fé èk la pousièr é ou va artourn an pousièr » (lir Jenèz 3:19). Nou konpran par la ke Adan té sar retourn an pousièr. I sré komsi li lavé jamé été kréé (Jenèz 2:7). Apré ke li la péché, li lé mor : li té égzis pu.

14. Pou kosa nou mor ?

¹⁴ Si Adan é Èv lavé  obéi Bondieu, zot i sré ankor vivan ojourdui. Mé kan zot la dézobéi, zot la péché, é anfin d’kont, zot lé mor. Le péché lé kom in maladi tré grav ke Adan é Èv, nout premié paran, la donn a nou. Nout tout lé né pécheur é sé pousa ke nou mor (Romin 5:12). Mé lé pa sak Bondieu té i ve pou bann zumin. Jamé li té i ve ke bann zumin i mor. Sé pousa mèm, la Bib i di ke la mor lé in « lènmi » (1 Korintien 15:26).

15. Pou kosa nou pe di ke konèt la vérité su la mor i libèr a nou ?

¹⁵ Kan nou koné sak i éspas apré la mor, sa i libèr a nou in tralé zafèr manteur. La Bib i di ke bann mor i resan okin douleur ni okin chagrin. Nou pe pa koz avèk zot é zot i pe pa koz avèk nou. Nou pe pa èd a zot é zot i pe pa èd a nou. Zot i pe pa fé a nou le mal é nou doi pa gingn kapkap devan zot. Pourtan, in bonpe relijion i di ke bann mor i viv dan in landroi é ke nou pe èd a zot kan nou donn larjan bann chèf la relijion (par égzanp pou ke banna i fé la mès pou bann mor). Mé kan nou koné la vérité su la mor, nou lès pu a nou bèrné par bann zafèr manteur la.

16. Kèl zafèr manteur in bonpe relijion i ansègn su bann mor ?

¹⁶ Satan i ansèrv bann fo relijion pou tronp a nou é fé kroir a nou ke bann mor i kontinué viv. Désèrtin relijion i di ke, kan in moun i mor, in léspri i sort dan son kor pou kontinué viv. Èske out relijion i aprann a ou sa ? Oubien li ansègn sak la Bib i di su bann mor ? Satan i fé kroir bann domoun bann zafèr manteur, pou ke zot i vir le do ansanm Jéova.

17. Akoz lansègnman su lanfèr i sali réputasion Jéova ?

 ¹⁷ Sak in bonpe relijion i ansègn, i chok vréman. Par égzanp, désèrtin relijion i di ke bann mové moun va brulé dann lanfèr pou toultan. Se kozman manteur la i sali réputasion Bondieu. Jéova va jamé pèrmèt ke bann zumin i souf komsa ! (Lir 1 Jan 4:8). Alon prann in légzanp : In moun i puni son zanfan é i mèt son min dann fe. Kosa ou va pansé de li ? Ou va trouv ke li na poin d’keur. É ou nora poin lanvi aprann konèt a li. Sé komsa ke Satan i ve ke nou voi Jéova !

18. Akoz i fo pa avoir peur bann mor ?

¹⁸ Désèrtin relijion i di ke bann zumin i devien bann zéspri apré zot mor. Zot i di ke nou doi réspèk bann zéspri é avoir peur d’zot, parske zot i pe èt bann kamarad puisan ou bann zènmi danjereu. In bonpe domoun i kroi zafèr manteur la. Zot la peur bann mor. Olèrk ador Jéova, zot i ador banna. Mé oubli pa : bann mor i resan pu rien. I fo pa avoir peur d’zot. Jéova lé nout Kréateur é li lé le vré Bondieu. Nou doi ador pèrsonn dot ke li (Révélasion 4:11).

19. Konèt la vérité su la mor i aport a nou bann bienfé. Kosa i lé ?

¹⁹ Kan nou koné la vérité su la mor, sa i libèr a nou bann zafèr manteur ke bann relijion i ansègn. É sa i èd a nou konprann bann gayar promès ke Jéova i fé pou nout lavnir.

20. Le chapit i vien apré i parl su kosa ?

²⁰ Na lontan d’sa, Job, in sèrviteur Bondieu, la demandé : « Si in moun i mor, èske li pe reviv ? » (Job 14:14). Dan la Bib, Jéova i donn a nou in répons ki atir vréman latansion. Nou va dékouv sa dann chapit i vien apré.