1, 2. Pou kosa la Bib lé in gayar kado ke Bondieu la donn a nou ?

IMAJINN : in kamarad i donn a ou in kado. Kosa ou resan ? Ou lé kontan parske li la pans a ou. Ou remèrsi a li. É ou lé présé rouv kado la.

² La Bib lé in kado Bondieu la donn a nou. Dan la Bib, nou aprann bann zafèr ke nou pe pa aprann ayeur. Par égzanp, li ansègn a nou ke Bondieu la kré le sièl, la tèr, le premié bonom é le premié madam. Li donn a nou bann konsèy ki èd a nou kan nou néna bann problèm. Li aprann a nou osi ke Bondieu néna lintansion chanj la tèr an paradi. É li ésplik koman Bondieu va fé sa. La Bib lé vréman in gayar kado !

3. Kan ou étudié la Bib, kosa ou va aprann ?

³ Kan ou étudié la Bib, ou va aprann ke Bondieu i ve ou devien son kamarad. É plus ou va aprann konèt a li, plus out lamitié avèk li i sra plu for.

4. Kosa ou trouv inkroiyab su la Bib ?

⁴ La Bib té tradui an 2 800 lang é plus. La bib la fini èt inprimé par miliar. Apepré tout domoun (9 moun su 10) i pe lir a li dan son lang. Chak semèn, néna plus in milion domoun i gingn in bib ! Vréman, la poin okin liv kom la Bib.

5. Pou kosa nou pe dir ke la Bib lé « inspiré par Bondieu » ?

 ⁵ La Bib lé « inspiré par Bondieu » (lir 2 Timoté 3:16) (regard la not n^o 2). Mé désèrtin i pouré pansé : « Sé bann zom ke la ékri la Bib. Alor pou kosa i di ke sé Bondieu la donn a nou liv la ? » La Bib i ésplik : « Sé parske zot lété pousé par léspri sin ke bann zom la kozé pou fé konèt le mésaj Bondieu » (2 Pièr 1:21). Lé kom kan in patron i demann son sekrétèr pou ékri in lèt. Sé le lèt kisa ? Sak le patron, mé pa sak le sekrétèr. Lé parèy, la Bib sé Bondieu la donn a nou. Mèm si Bondieu la ansèrv bann zom pou ékri liv la, sa i vien pa d’zot. Li la gid banna pou  ke zot i ékri son bann pansé. La Bib lé vréman « la parol Bondieu » (1 Tésalonisien 2:13).

6, 7. Pou kosa nou pe di ke sak lé ékri dan la Bib i akord bien ansanm ?

⁶ Pou ékri la Bib, la pran plus 1 600 zané. Bann zom ke la ékri la Bib, té viv pa mèm lépok. Désèrtin lavé in bonpe linstruksion é dot non. Anparmi zot, inn lété dokteur. Dot té travay la tèr, detroi té pèch poison, désèrtin té gardien mouton, lavé osi bann profèt, bann juj oubien bann roi. Mèm si in bonpe zom la ékri la Bib, tout sak néna dedan i akord bien ansanm : i di pa in nafèr dan in chapit é le kontrèr dan in not chapit *.

⁷ Bann premié chapit la Bib i ésplik koman bann problèm dan le monn la komansé. Bann dèrnié chapit i aprann a nou koman Bondieu va règ bann problèm la, é koman li va chanj la tèr an paradi. La Bib i rakont tout sak bann zumin la fé su bann milié d’zané. Li mont ke toultan, Bondieu i fé an sort ke sak li la désidé i éspas vréman.

8. Èske la Bib lé vré kan li koz su bann zafèr la sians ? Donn bann légzanp.

⁸ La Bib la pa été ékri pou ansègn la sians. Mé bann zafèr su la sians ke néna dan la Bib, lé toultan vré. É sa lé normal, parske sé in liv ke Bondieu la donn a nou. Par égzanp, dann liv Lévitik, néna bann loi, ke bann Zisraélit té doi suiv, pou pa  répann bann maladi partou. Pourtan, liv la lété ékri lontan avan ke té dékouv ke bann mikrob é bann virus i amèn bann maladi. La Bib i ansègn osi la vérité kan li di ke la Tèr lé pandiyé dann vid (Job 26:7). Na lontan d’sa, bann domoun té kroi ke la Tèr lété plat. Mé la Bib té finn di ke li lété ron (Izai 40:22).

9. Èske bann zom ke la ékri la Bib lété onèt ? Kosa sa i prouv ?

⁹ Tout sak la Bib i rakont su bann zévènman dann tan pasé, lé toultan vré. In bonpe liv su listoir néna bann zéreur parske sak la ékri sa, la pa di toultan la vérité. Par égzanp, zot i rakont pa tout bann gèr zot péi la pèrd. Parkont, bann zom la ékri la Bib lété onèt. Kan le peup Israèl té pèrd in batay, banna té kachièt pa rien. Zot té rakont osi zot bann fot. Par égzanp, dann liv Nonm, Moiz la di ke Bondieu la puni a li pou in fot grav (Nonm 20:2-12). Bann zom la ékri la Bib lété onèt, é sa i prouv ke sé in liv Bondieu la donn a nou. Donk, nou pe kroir sak la Bib i di.

10. Pou kosa bann konsèy ke néna dan la Bib lé util pou nou ?

¹⁰ Bann konsèy ke néna dan la Bib lé util pou nou. La Bib lé « inspiré par Bondieu é lé util pou ansénié, pou korijé, pou remèt droit sak i fo » (2 Timoté 3:16). Jéova i koné koman nou lé fé. Li konpran nout fason d’pansé é sak nou resan. Li koné a nou mieu ke nou mèm é li ve nou na in gran kontantman. Donk, li koné sak lé bon é sak lé mové pou nou.

11, 12. a) Dann Matieu chapit 5 juska 7, kèl bon konsèy Jézu la doné ? b) Kèl vérité biblik util nou trouv dan la Bib ?

¹¹ Dann Matieu chapit 5 juska 7, Jézu i donn a  nou bann bon konsèy. Li ésplik a nou koman èt ereu, koman avoir in bon lantant ansanm inn é lot, koman priyé é koman konsidèr larjan. Na 2 000 zané ke li la donn bann konsèy la, mé zot lé ankor osi inportan é util ojourdui.

¹² Dan la Bib, Jéova i donn a nou osi bann vérité biblik pou gid a nou (regard la not n^o 3). Bann vérité biblik pou gid a nou, i èd a nou viv plus ereu dan nout fami, èt travayeur é viv an pé avèk lé zot. Kik nou lé, ninport kèl landroi nou viv, ninport kèl traka nou néna, bann vérité biblik la, lé ankor util pou nou (lir Izai 48:17).

13. Dapré Izai, kosa té sar ariv Babilonn ?

¹³ In bonpe profési la Bib la finn déja réalizé (regard la not n^o 4). Par égzanp, Izai la anonsé ke la vil Babilonn sré détrui (Izai 13:19). É li la éspliké koman. La vil lété protéjé par bann gran port é par in gran rivièr. Mé le bann port té sar rès rouvèr é le gran rivièr noré prèske sèk. Larmé noré rant dan la vil san batay. Izai la mèm anonsé ke sé in mesieu ke té i apèl Sirus noré détrui Babilonn (lir Izai 44:27–45:2).

14, 15. Koman le profési Izai la réalizé ?

¹⁴ 200 zan apré ke le profési lété ékri, in larmé lé arivé pou atak Babilonn. Kisa té komann larmé la ? Sirus, le roi la Pèrs. Donk, le profési lété vré mèm. Mé èske larmé Sirus noré gingn rant dann Babilonn, kom le profési lavé anonsé ?

¹⁵ Dan la nuit ousa Babilonn lété ataké, bann  zabitan té pou fé la fèt. Zot té kroi a zot an sékurité parske zot vil lété protéjé par bann gran mur é par in gran rivièr. Mé an deor la vil, Sirus é son larmé lavé kreuz in kanal pou fé bès le nivo d’lo. Alor, bann solda la gingn travèrs le gran rivièr a pié. Mé kom la vil lété antouré avèk bann gran mur, koman banna  té sar rantré ? Kom le profési lavé anonsé, bann port la vil té gran rouvèr. Alor, larmé la gingn ranvèrs la vil san batay.

16. a) Kosa Izai la anonsé su Babilonn ? b) Èske la profési Izai la réalizé ?

¹⁶ Izai la osi anonsé ke in jour nora pu okin moun va abit Babilonn. Li la ékri : « Plu jamé li sra abité » (Izai 13:20). Èske sa la réalizé ? Oui. La vil Babilonn lé an ruinn. Bann ruinn la, lé an Irak, apepré 80 kilomèt dann sud Bagdad. Juskalèr na poin okin moun i abit la ba. Jéova la fé disparèt Babilonn « avèk balié la déstruksion » (Izai 14:22, 23) *.

17. Pou kosa nou pe kroir bann promès Bondieu ?

¹⁷ In ta profési la Bib la finn réalizé. Alor, nou pe kroir sak la Bib i anons pou lavnir. Nou pe èt sur ke  Jéova va tienbo son promès pou transform la tèr an paradi (lir Nonm 23:19). Nou pe éspèr gingn « la vi pou toultan ke Bondieu, ki pe pa ramas manteur, la promèt » (Tit 1:2) *.

18. Kosa Pol la di su la « parol Bondieu » ?

¹⁸ Nou la aprann ke na poin okin liv kom la Bib. Tout sak lé ékri anndanla i akord bien ansanm. Sak la Bib i di su la sians oubien su listoir, lé toultan vré. Li donn bann konsèy ke lé bien. É dedan néna bann profési ke la finn réalizé. Mé la Bib lé inkroiyab pou in not rézon ankor. Lapot Pol la ékri : « La parol Bondieu lé vivan é puisan. » Kosa i ve dir sa ? (Lir Ébreu 4:12).

19, 20. a) Koman la Bib i pe èd a ou konèt kisa ou lé vréman ? b) Koman ou pe fémont ke ou ièm vréman la Bib ?

¹⁹ La Bib i pe chanj out vi. Li pe èd a ou konèt kisa ou lé vréman. Li pe èd a ou mieu konprann out bann pansé é sak ou resan o fon out keur. Par égzanp, nou pans petèt ke nou ièm Bondieu. Mé pou prouv ke nou ièm a li, nou doi fé sak la Bib i di.

²⁰ La Bib lé vréman in liv ke Bondieu la donn a nou. Bondieu i demann a nou lir liv la, étudié a li é ièm a li. Fémont ke ou ièm kado la é kontinué étudié a li. Alor, ou va konprann kèl projé Bondieu néna pou bann zumin. Dann chapit apré, nou va koz de sa an détay.