1. Astèr ou koné in bonpe vérité dan la Bib, kèl késtion ou poz a ou petèt ?

ÉTUDIÉ liv la, la pèrmèt a ou aprann in bonpe vérité dan la Bib. Par égzanp, ou la dékouv la vérité su bann mor, léspoir la rézuréksion é le promès konsèrnan la vi pou toultan (Éklézias 9:5 ; Luk 23:43 ; Jan 5:28, 29 ; Révélasion 21:3, 4). Somanké ou asis bann rénion bann Témoin Jéova é  riskab ou pans ke banna i ador Bondieu le bon fason (Jan 13:35). An plus, surman ou la komans fé grandi in lamitié èk Jéova é ou ve sèrv a li. Mé daoir ou demann a ou : « Kosa mi doi fé pou sèrv Bondieu ? »

2. Pou kosa in Létiopien té i ve fé batiz a li ?

² Dann tan Jézu, in Létiopien té i demann a li, kosa li té i doi fé pou sèrv Bondieu. In pe d’tan apré la rézuréksion Jézu, inn parmi son bann disip, ke té i apèl Filip, la prèch èk mesieu la. Filip la prouv a li ke Jézu lété le Mési. Sak Létiopien la aprann, la si tèlman fé nèt bann santiman dan son keur, ke toutsuit li la di : « Regard ! Na d’lo tèrla ; kosa i défann a moin fé batiz a moin ? » (Akt 8:26-36).

3. a) Kèl lord Jézu la donn son bann disip ? b) Koman nou doi fé batiz a nou ?

³ La Bib i di klèrman : si ou ve sèrv Jéova, ou doi fé batiz a ou. Jézu la donn lord èk son bann disip : « Fé bann disip parmi banna, batiz a zot » (Matieu 28:19). Jézu la mont légzanp kan li la fé batiz a li. La pa seulman fé koul inn ti pe d’lo su son tèt : la plonj tout son kor antié dann lo (Matieu 3:16). Kan in krétien i fé batiz a li, tout son kor antié i doi èt plonjé dann lo.

4. Kan nou fé batiz a nou, kosa nou amont lé zot ?

⁴ Kan nou fé batiz a nou, nou amont lé zot ke nou ve vréman èt kamarad Bondieu, é sèrv a li (Psom 40:7, 8). Astèr, ou demann a ou petèt : « Kosa mi doi fé pou fé batiz a moin ? »

5. a) Avan le batèm, kosa ou doi fé ? b) Pou kosa bann rénion krétien lé inportan ?

⁵ Avan le batèm, ou doi aprann konèt Jéova é Jézu. Ou la finn komans fé sa dan out létud la Bib (lir Jan 17:3). Mé kontant pa ou rienk èk sa. La Bib i di ke ou doi èt « ranpli èk la konésans égzakt » la volonté Jéova (Kolosien 1:9). Bann rénion bann Témoin Jéova va èd a ou fé grandi out lamitié pou li. Sé pousa mèm lé inportan prann labitud asis bann rénion la (Ébreu 10:24, 25).

6. Avan ou gingn prann out batèm, kèl zansègnman biblik ou doi konèt ?

⁶ Jéova i inpoz pa ke ou koné tout su la Bib avan fé batiz a ou. Li la pa atann ke Létiopien té i koné in paké d’zafèr avan fé batiz a li (Akt 8:30, 31). Lé vré, jamé nou va fini aprann bann nouvo zafèr su Bondieu (Éklézias 3:11). Mé avan fé batiz a ou, ou doi konèt é èt dakor èk bann zansègnman inportan ke néna dan la Bib (Ébreu 5:12).

7. Koman out létud la Bib la èd a ou ?

⁷ La Bib i di ke, si nou la poin la foi, lé pa posib kontant le keur Bondieu (Ébreu 11:6). Sé pousa mèm, ou doi mèt out foi dan Bondieu avan fé batiz a ou. Kan désèrtin zabitan dan la vil Korint la antann sak bann disip Jézu la ansénié, aprésa zot « lé devnu kroiyan é la été batizé » (Akt 18:8). Lé parèy mèm, out létud la Bib la èd a ou mèt out foi dan bann promès Bondieu. Li la èd a ou osi mèt out foi dann sakrifis Jézu, ke i pe sov a nou le péché èk la mor (Jozué 23:14 ; Akt 4:12 ; 2 Timoté 3:16, 17).

8. Kosa va donn a ou lanvi fé konèt lé zot sak ou aprann ?

⁸ Plus ou va konèt bann zafèr su la Bib, plus ou va voir ke tousala lé util pou ou, é plus out foi va grandi. Alor, ou nora anvi fé konèt lé zot sak ou aprann (Jérémi 20:9 ; 2 Korintien 4:13).

9, 10. a) Dabor, èk kisa ou pe fé konèt sak ou aprann ? b) Si ou ve alé préché èk lasanblé lokal, kosa ou doi fé ?

⁹ Tout sak ou aprann, petèt ou nora lanvi fé konèt sa out fami, out bann kamarad, out bann voizin é out bann kolèg travay. Lé bien, mé, i fo toultan ou fé sa jantiman é èk douseur. Avèk le tan, ou voudra retrouv a ou èk lasanblé lokal pou alé préché. Dèk ou sra paré, alor koz sa avèk le Témoin ki ansègn a ou la Bib. Si li voi ke ou lé paré, é si ou mèt an pratik bann zansègnman la Bib dan out vi, alor, zot deu ansanm zot va alé voir deu zansien lasanblé lokal.

¹⁰ Pou kosa i fo alé voir banna ? Bann zansien va koz èk ou pou konèt si ou konpran é si ou kroi bann zansègnman inportan dan la Bib. Zot i voudra konèt osi si dan out vi tou lé jour, ou obéi sak la Bib i di, é si ou ve vréman devnir Témoin Jéova. La pa bezoin ou la peur koz èk bann zansien. Rapèl a ou : zot i pran soin tout bann domoun ke lé dann lasanblé lokal, é donk de ou osi (Akt 20:28 ; 1 Pièr 5:2, 3). Apré ke zot nora finn koz ansanm, banna va di a ou si ou pe retrouv a ou èk lasanblé lokal pou alé préché.

11. Si bann zansien i di a ou ke ou néna ankor bann chanjman pou fé, pou kosa lé vréman inportan ke ou fé a li ?

 ¹¹ Pou ke ou gingn alé préché èk lasanblé lokal, riskab bann zansien va ésplik a ou ke ou néna ankor bann chanjman pou fé dan out vi. Afèr lé vréman inportan fé bann chanjman la ? Parske, kan nou parl de Jéova èk lé zot, nou reprézant a li. Donk, nout fason d’viv i doi montré ke nou onor a li (1 Korintien 6:9, 10 ; Galat 5:19-21).

12. Pou kosa tout domoun la bezoin repanti a zot ?

¹² Avan prann batèm, ou doi fé ankor in nafèr. Lapot Pièr la di : « Donk repanti a zot é retourn a zot vèr Bondieu, pou ke zot péché lé éfasé » (Akt 3:19). Kosa i ve dir « Repanti a zot » ? Sa i ve dir ke nou doi regrèt vréman tout bann mové zafèr nou la fé. Par égzanp, si ou té i fé bann péché séksuèl, ou doi repanti a ou. É mèm si ou la ésèy toultan fé sak lé bien, ou doi kan mèm sa repanti a ou. An vré, nout tout, nou lé pécheur. Donk, nout tout, nou la bezoin demann pardon Bondieu (Romin 3:23 ; 5:12).

13. Kosa i ve dir « retourn a ou » ?

¹³ Èske i fo rienk regrété bann mové zafèr ou la fé ? Non. Pièr la di i fo osi « retourn a zot ». Sa i ve dir ke ou doi rejèt tout bann mové konportman é fé sak lé bien. Alon pran in légzanp : Ou sa va in landroi pou in premié foi. I ariv in moman, ou rann a ou kont ke ou la pa pran le bon chemin. Kosa ou  fé ? Ou pèz su le frin, ou arèt, ou « retourn a ou », sétadir ou fé demi tour, aprésa ou pran le bon chemin. Lé parèy kan ou lapou étudié la Bib, riskab ou va rann a ou kont ke ou doi fé bann chanjman dan out vi, oubien rejèt bann mové zafèr ke ou na labitud fé. I fo ke ou lé paré pou « retourn a ou », sétadir fé bann chanjman ki fo, é komans fé sak lé bien.

14. Kosa i ve dir « of son vi Jéova » ?

¹⁴ Avan prann batèm, ou doi fé in not zafèr inportan : ou doi of out vi Jéova. Kan ou of out vi Bondieu, ou fé in priyèr pou promèt a li ke ou va ador rienk li touseul, é ke fé son volonté i sra le zafèr le plus inportan dan out vi (Detéronom 6:15).

15, 16. Kosa i pous in moun of son vi Jéova ?

¹⁵ Promèt sèrv rienk Jéova sé kom promèt rès tout nout vi èk in moun ke nou ièm. Alon pran in légzanp : In mesieu èk in madam lé atiré par inn é lot. Plus le mesieu i aprann konèt le madam, plus li ièm a èl. É li ve maryé èk èl. Sé in gran désizion, mé parske li ièm a èl, li lé paré pou andos bann résponsabilité ke néna dann maryaj.

¹⁶ Plus ou va konèt Jéova, plus ou va èm a li é plus ou va fé out méyeur posib pou sèrv a li. Sa va pous a ou fé in priyèr pou promèt a li ke ou va sèrv a li. La Bib i di ke le moun i ve èt in disip Jézu i doi « renié a li » li mèm (Mark 8:34). Sa i ve dir ke obéi Jéova i doi èt le zafèr le plus inportan pou ou. An vré,  sak Jéova i ve, i doi pas avan out bann zanvi é out bann projé (lir 1 Pièr 4:2).

17. Akoz désèrtin i of pa zot vi Jéova ?

¹⁷ Désèrtin i of pa zot vi Jéova parske zot la peur ke zot i gingn pa tienbo zot promès pou sèrv a li. Zot i ve pa kontray a li. Oubien zot i pans ke si zot i of pa zot vi Bondieu, alor li va pa rann a zot résponsab sak zot i fé.

18. Kosa va èd a ou konbat out peur kontray Jéova ?

¹⁸ Lamour ou néna pou Jéova va èd a ou konbat out peur kontray a li. Kom ou ièm a li, ou va fé out méyeur posib pou tienbo out promès (Éklézias 5:4 ; Kolosien 1:10). Ou sar pa di a ou ke lé tro dur fé la volonté Jéova. Lapot Jan la ékri : « Ala kosa i ve dir émé Bondieu : sé obéi son bann komannman. Mé, son bann komannman lé pa in fardo » (1 Jan 5:3).

19. Ou doi pa avoir peur of out vi Jéova. Akoz ?

¹⁹ Ou la pa bezoin èt parfé pou of out vi Jéova. Jamé li sa demann a nou plus ke sak nou gingn fé (Psom 103:14). Li va èd a ou fé sak lé bien (Izai 41:10). Si ou mèt tout out konfians an li, « li va galiz out bann santié » (Provèrb 3:5, 6).

20. In foik ou la of out vi Jéova, kosa ou doi fé ?

²⁰ Èske ou lé paré pou of out vi Jéova ? In foik ou la finn of out vi Jéova, ala sak ou doi fé aprésa : ou doi fé batiz a ou.

21, 22. Koman ou pe « fé konèt lé zot ke ou na la foi » ?

 ²¹ Di ansanm le kordinateur le group bann zansien out lansanblé lokal ke ou la finn of out vi Jéova é ke ou ve prann out batèm. Li va demann bann zansien pou koz ansanm ou su bann zansègnman inportan dan la Bib. Si zot i pans ke ou lé paré, zot va di a ou ke ou pe fé  batiz a ou dèk nora in lasanblé bann Témoin Jéova. Dann lasanblé, in diskour va éspliké kosa i lé le batèm. Sak i fé le diskour, va poz deu késtion sinp èk bann domoun ki sar prann batèm. Kan ou va réponn bann késtion la, ou va « fé konèt lé zot ke ou na la foi » (Romin 10:10).

 ²² Aprésa, ou sra batizé. Tout out kor antié i sra plonjé dann lo. Out batèm va mont toulmonn ke ou la finn of out vi Jéova é ke asteur ou lé Témoin Jéova.

23. Kosa i ve dir èt batizé « o non Papa, le Garson é léspri sin » ?

²³ Jézu la di ke son bann disip i sré batizé « o non Papa, le Garson é léspri sin » (lir Matieu 28:19). Sa i ve dir i fo aksèpt lotorité Bondieu. I fo aksèpt osi le rol ke Jézu néna dann projé Bondieu. É i fo aksèpt le fason Bondieu i ansèrv son léspri sin pou fé son volonté (Psom 83:18 ; Matieu 28:18 ; Galat 5:22, 23 ; 2 Pièr 1:21).

24, 25. a) Kosa le batèm i ve dir ? b) Kèl késtion le dèrnié chapit va réponn ?

²⁴ Le batèm sé in nafèr ke lé vréman inportan. Kan lapou plonj a ou dann lo, sé komsi ou mor par rapor la vi ou té i mèn avan. Sa i mont ke ou rejèt se fason viv. É kan ou sort sou d’lo, sa i ve dir ke ou komans in nouvo vi, pou fé la volonté Bondieu. Sa i amont ke a partir d’la, ou va sèrv Jéova. Rapèl a ou : ou la pa of out vi ni pou in moun, ni pou in lorganizasion, ni pou fé in travay, mé pou Jéova !

²⁵ La promès ou la fé Jéova va èd a ou fé grandi in gayar lamitié ansanm li (Psom 25:14). Sa i ve pa dir ke nou sra sové rienk akoz nou lé batizé. Lapot Pol la ékri : « Kontinué travay jusko bout pou zot èt sové avèk la krint é réspé » (Filipien 2:12). Le batèm lé rienk le komansman. Mé alor, koman ou pe rès kamarad Jéova ? Le dèrnié chapit va réponn késtion la.