1. Kèl priyèr tout domoun i koné é ke nou sar koz desu ?

DOMOUN par milion i koné la priyèr ke i apèl le Notre Pèr. Jézu la utiliz priyèr la, pou aprann son bann disip koman priyé. Pou kèl zafèr li la priyé ? É pou kosa priyèr la lé inportan pou nou ?

2. Jézu la aprann a nou priyé pou 3 zafèr inportan. Kosa i lé ?

² Jézu la di : « Zot i doi donk priyé komsa : “Nout Papa dann sièl ke out non lé konsidéré kom sin. Ke out Roiyom i vien. Ke out volonté i réaliz su la tèr, kom dann sièl” » (lir Matieu 6:9-13). Pou kosa Jézu la aprann a nou priyé pou 3 zafèr la ? (Regard la not n^o 20).

3. Kosa nou doi konèt su le roiyom Bondieu ?

³ Nou la aprann ke le non Bondieu sé Jéova. Nou la aprann osi kosa i lé la volonté Bondieu pou bann zumin é pou la tèr. Mé kan Jézu la di : « Ke out roiyom i vien », kosa li té ve dir par la ? Dann chapit la, nou sar voir kosa i lé le roiyom Bondieu, kosa li sar fé é koman li va rann sin le non Bondieu.

4. Kosa i lé le roiyom Bondieu, é kisa i lé le Roi se roiyom la ?

⁴ Jéova la mèt an plas in gouvèrnman ke lé dann sièl. Dan la Bib, gouvèrnman la i apèl le roiyom Bondieu. Jéova la choizi Jézu pou èt Roi se roiyom la. Jézu lé « le Roi sak i gouvèrn é le Sénieur sak i dominn » (1 Timoté 6:15). Li néna pouvoir pou fé le  bien, é sa, plus ke ninport kèl chèf politik. É li lé plu for tout bann chèf politik réuni ansanm.

5. a) Ousa i lé le roiyom Bondieu ? b) Kosa le roiyom Bondieu va dirijé ?

⁵ Jézu la été résusité, é 40 jour aprésa, li la artourn dann sièl. Aprésa, Jéova la mèt a li kom Roi son roiyom (Akt 2:33). La Bib i mont ke le roiyom Bondieu lé in « roiyom dann sièl » (2 Timoté 4:18). Sé pousa ke li lé dann sièl. É sé depui dann sièl, ke li va dirij la tèr (Révélasion 11:15).

6, 7. Pou kosa Jézu lé plu for ke ninport kèl roi su la tèr ?

⁶ Jézu lé plu for ke ninport kèl roi su la tèr. An vré, la Bib i di ke a li touseul « i pe pa mor » (1 Timoté 6:16). Tout bann chèf politik i fini par konèt la mor, mé Jézu va jamé mor. Tout sak li sar fé pou nou va dur pou toultan.

⁷ In profési la Bib i di ke Jézu sra in Roi jus é ke li ièm a nou in bonpe : « Léspri Jéova va poz su li, léspri la sajès é lintélijans, léspri pou donn konsèy é pou donn la fors, léspri la konésans é la krint de Jéova. É la krint Jéova i sra in kontantman pou li. Li va pa juj in moun rienk dapré sak son zieu i voi li va pa korij in moun rienk dapré sak son zorèy va antann. Li va juj bann ti malereu avèk justis » (Izai 11:2-4). Èske ou ièmré avoir in roi kom li ?

8. Koman nou koné ke Jézu i sar pa gouvèrn touseul ?

⁸ Bondieu la choizi bann domoun pou èt roi dann sièl avèk Jézu. Lapot Pol la di avèk Timoté : « Si nou kontinué tienbo ansanm, nou va rénié osi avèk li » (2 Timoté 2:12). Kèl kantité d’moun sra roi avèk Jézu ?

9. a) Néna konbien roi an tou va rénié avèk Jézu ? b) Depuis kansa Bondieu la komans choizi bann roi ke té sar rénié avèk Jézu ?

 ⁹ Le chapit 7 dann liv la i mont ke lapot Jan la gingn in vizion. Li la vu le Roi Jézu dann sièl avèk 144 000 roi. Kisa i lé bann roi la ? Jan i fé konprann a nou ke banna néna « son non [le non Jézu] é le non son Papa ékri su zot fron ». É li rajout : « Banna i kontinué suiv Lanio [Jézu] ninport kèl landroi ousa li sa va. Zot la été achté parmi bann zumin » (lir Révélasion 14:1, 4). Bann 144 000 lé bann krétien fidèl ke Bondieu la choizi pou « gouvèrn la tèr » avèk Jézu. Kan zot i mor, zot lé résusité dann sièl (Révélasion 5:10). Sé depui lépok bann zapot ke Jéova la komans choizi bann krétien fidèl pou èt anparmi se group ke néna 144 000 Roi.

10. Jéova la trouv in moiyin pour ke Jézu é bann 144 000 i dirij bann zumin. Poukoi sa i prouv ke li ièm a nou ?

¹⁰ Jéova i ièm a nou tèlman ke li la trouv in moiyin pour ke désèrtin moun i devien bann roi avèk Jézu. Jézu i sra in bon dirijan. Li pe konprann a nou parske li la viv kom in umin su la tèr é ke li la soufèr. Pol la éspliké ke Jézu i resan la pitié pou nou. É li la di ke Jézu i pe konprann tout bann féblès nou néna, é ke li « la été tésté kom nou » dan tout kalité zafèr (Ébreu 4:15 ; 5:8). Bann 144 000 osi i pe konprann nout bann traka : a zot osi, kom nou, zot la luté kont zot bann défo é kom nou, zot la tonm malad. Alor, nou pe èt sur ke Jézu é bann 144 000 va konprann sak nou resan é nout bann traka.

11. Jézu la aprann son bann disip priyé pou ke la volonté Bondieu lé fé dann sièl. Pou kosa ?

¹¹ Jézu la aprann son bann disip priyé pou ke la volonté Bondieu lé fé dann sièl. Pou kosa ? Dann chapit 3, nou la aprann ke Satan le Diab la rebèl a li kont Jéova. Apré rébélion la, Jéova la lès Satan é lé zot zanj infidèl (bann démon) rès dann sièl pou in pe d’tan. Donk, toulmonn té fé pa la volonté Bondieu dann sièl. Dann chapit 10, nou va aprann dot zafèr ankor su Satan é bann démon.

12. Révélasion 12:10 i koz su 2 zévènman inportan. Kosa i lé ?

¹² Dapré la Bib, Jézu va devnir Roi é, in pe d’tan aprésa, li va fé la gèr kont Satan (lir Révélasion 12:7-10 *). Révélasion 12:10 i koz su 2 zévènman inportan : 1) Le roiyom Bondieu, ke lé dirijé par Jézu Kris, i komans gouvèrné. 2) La poursuiv Satan an deor le sièl é la jèt a li su la tèr. Bann zévènman la lé déja arivé. Nou va koz lad’su plu loin.

13. Kan la poursuiv Satan an deor le sièl, kosa la arivé ?

¹³ La Bib i ésplik ke, kan la poursuiv Satan é bann démon an deor le sièl, bann zanj fidèl lété vréman kontan. Li di : « mont ke zot lé kontan sièl, é a zot ki abit la ! » (Révélasion 12:12). Asteur, dann sièl, néna la pé é lunité parske toulmonn i fé la volonté Bondieu.

14. Depui la poursuiv Satan an deor le sièl, kosa i éspas su la tèr ?

¹⁴ Su la tèr, lé vréman pa parèy : bann domoun i gingn bann gro traka. Akoz ? « Parske le Diab la désann »  vèr la tèr é ke li lé dan « in gran kolèr, parske li koné ke i rès pa li bonpe d’tan » (Révélasion 12:12). Satan lé vréman an kolèr. La poursuiv a li an deor le sièl, é li koné ke i amuz pa, li sra détrui. Alor li fé tout son posib pou ke bann domoun néna bann problèm é i souf.

15. Kosa i lé la volonté Bondieu pou la tèr ?

¹⁵ La volonté Bondieu pou la tèr la pa chanjé. Jéova i ve ke bann domoun parfé i viv pou toultan dan in paradi su la tèr (Psom 37:29). Mé koman le Roiyom i sar fé an sort ke la volonté Bondieu i réaliz ?

16, 17. Kosa Danièl 2:44 i aprann a nou su le roiyom Bondieu ?

¹⁶ Danièl 2:44 i anons : « Dann tan bann roi la, Bondieu dann sièl va mèt an plas in roiyom ki sra jamé détrui. É se roiyom la sra jamé dirijé par okin not peup. Li va ékraz tout bann roiyom la é va détrui a zot, é li touseul va dur pou toultan. » Kosa profési la su le Roiyom Bondieu i aprann a nou ?

¹⁷ 1) Le roiyom Bondieu té doi komans gouvèrné « dann tan bann roi la ». Sa i ve dir ke, kan le roiyom Bondieu va komans rénié, nora dot gouvèrnman ki sra ankor an plas. 2) Le roiyom Bondieu va dur pou toultan é jamé in not gouvèrnman va ni ranplas a li. 3) Nora la gèr ant le roiyom Bondieu é bann gouvèrnman su tout la tèr. Le roiyom Bondieu va gingn la gèr. Alor tout la tèr sra dirijé par in seul gouvèrnman : le méyeur gouvèrnman ke i égzis pou bann zumin.

18. Koman i apèl la gèr ke nora ant le roiyom Bondieu é bann gouvèrnman bann zom ?

 ¹⁸ La gèr ant le roiyom Bondieu é tout bann gouvèrnman bann zom i apèl Armagédon (regard la not n^o 10). Kosa va arivé jus avan la gèr la ? Bann démon i sar tronp « bann roi su la tèr abité an antié, pou rasanm zot tout ansanm pou la gèr le gran jour Bondieu le Toupuisan » (Révélasion 16:14, 16). Tout bann gouvèrnman bann zom i sar fé la gèr kont le roiyom Bondieu.

19, 20. Pou kosa nou la bezoin le roiyom Bondieu ?

¹⁹ Pou kosa nou la gran bezoin le roiyom Bondieu ? Pou o moin 3 rézon. 1) Nou la bezoin le roiyom Bondieu parske nou lé pécheur, é akoz sa mèm, nou tonm malad é nou mor. Mé la Bib i di ke, kan le roiyom Bondieu va dirij la tèr, nou va viv pou toultan. Jan 3:16 i di : « Bondieu la tèlman émé le monn ke li la donn son seul Garson, pou ke tout sak i mèt la foi an li lé pa détrui mé i gingn la vi pou toultan. »

²⁰ 2) Nou la bezoin le roiyom Bondieu parske nou lé antouré avèk in bonpe domoun mové. Néna in bonpe domoun i ramas manteur é i tronp lé zot. Dot i fé bann péché séksuèl. Nou gingn pa défann a zot fé bann mové zafèr la. Mé kan va ariv Armagédon, Bondieu va détrui sak i ve pa chanj manir (lir Psom 37:10). 3) Nou la bezoin le roiyom Bondieu parske in bonpe gouvèrnman lé fèb, kruèl oubien malonèt. Zot i ankouraj pa bann domoun obéi Bondieu. La Bib i di ke lom i dominn lom pou fé a li le mal (Éklézias 8:9).

21. Koman le Roiyom va fé an sort ke la volonté Bondieu lé fé su la tèr ?

 ²¹ Apré Armagédon, le Roiyom va fé an sort ke la volonté Bondieu lé fé su la tèr. Par égzanp, li va détrui Satan é bann démon (Révélasion 20:1-3). Anfin d’kont, pu pèrsonn va tonm malad é pu pèrsonn va konèt la mor. Gras la ranson, tout bann domoun ke la rès fidèl Bondieu va viv pou toultan dann paradi (Révélasion 22:1-3) (regard la not n^o 21). Le Roiyom va rann sin le non Bondieu. Sa i ve dir ke, kan li va dirij la tèr, tout bann domoun va donn loneur le non Bondieu.

22. Jézu lé pa devnu Roi kan li té su la tèr ni jus apré ke li té résusité. Koman nou koné sa ?

²² Jézu la aprann son bann disip kosa i fo demandé dan la priyèr : « Ke out roiyom i vien. » Le roiyom Bondieu té sar ariv plu tar. Dabor, Jéova té i doi mèt an plas roiyom la é li té doi nom Jézu Roi. Kan Jézu la artourn dann sièl, èske li lé devnu Roi toutsuit ? Non. Li té doi atann. Koman nou koné sa ? In pe  d’tan apré la rézuréksion Jézu, Pièr é Pol la di ke le profési ékri dann Psom 110:1 té konsèrn Jézu. Dann profési la, Jéova lavé di avèk Jézu ke li doi « asiz a son droit » é atann « juskatank li plas son bann zènmi » sou son pié (Akt 2:32-35 ; Ébreu 10:12, 13). Konbien d’tan Jézu la atann ?

23. a) Kansa Jézu lé devnu Roi le roiyom Bondieu ? b) Kosa nou sar aprann dann chapit i vien apré ?

²³ In paké d’zané avan 1914, inn ti group bann krétien avèk in keur antié la étudié bann profési la Bib. É zot la konpri ke 1914 sré in lané inportan (regard la not n^o 22). Depui 1914, sak i éspas dan le monn i prouv ke banna lavé rézon. Sé lané la ke Jézu la komans rénié (Psom 110:2). In pe d’tan aprésa, Satan lété jeté su la tèr. I rès « pa li bonpe d’tan » (Révélasion 12:12). La Bib i apèl pèryod la « bann dèrnié jour ». Dann chapit i vien apré, nou va voir bann preuv ke nou lé antrèn viv pèryod la. Nou va aprann osi ke, dann pa lontan, gras le Roiyom, la volonté Bondieu sra fé su la tèr.