Èske ou la finn pèrd in moun ke ou ièm ? Kan sa i ariv, in bonpe d’moun i demann azot : « Kosa i éspas apré la mor ? Èske in jour mi va revoir sak ma la pèrd ? » Dann leson la é sak apré, ou va dékouv bann répons ankourajan ke néna dan la Bib.

1. Kosa i éspas kan nou mor ?

Jézu la konpar la mor èk in profon somèy. Poukosa i konpar la mor èk in somèy ? In moun ki dor bien mèm, i koné pa sak i éspas otour d’li. Lé parèy, in mor na poin okin douleur, li souf pa. La Bib i di : « Sak lé mor i koné pa rien » (lir Éklézias 9:5).

2. Kosa i aport anou konèt la vérité su la mor ?

Bonpe d’moun la peur la mor ; désèrtin la mèm peur bann mor. Mé sak la Bib i di su la mor i rasur anou. Jézu la di : « La vérité va libèr azot » (Jan 8:32). Prèske tout bann relijion i di ke nou néna in lam imortèl, ki kontinué viv apré la mor, mé sé pa sak la Bib i ansègn. Kom bann mor i koné pa rien, zot i souf pa. Zot i gingn pa non plu fé anou le mal. Donk la pa bezoin kalm banna, ador banna oubien pri pou banna.

Désèrtin i di ke zot i koz èk bann mor. Mé sa lé pa posib. Kom nou vièn voir, bann mor « i koné pa rien ». Sak i kroi koz èk bann mor, an vré, i koz èk bann démon, ki fé pas azot pou bann mor. Donk konèt la vérité su la mor i protèj anou kont bann démon. Jéova i ve pa ke nou ésèy koz èk bann mor, parske li koné ke lé danjereu pou nou, rant an kontak èk bann démon (lir Detéronom 18:10-12).

3. Kosa i lé la vérité su bann mor ?

I égzis in bonpe kroiyans su sak i éspas apré la mor. Mé pa tout bann kroiyans la, lé vré.

• Dan out lantouraj, kosa domoun i kroi su la mor ?

 4. La vérité su la mor i libèr anou

Konèt la vérité su la mor i libèr anou. Nou la pu peur bann mor. Lir Éklézias 9:10 é koz su késtion la :

• Èske bann mor i pe fé anou le mal ?

Konèt sak la Bib i ansègn i libèr anou osi. Nou koné ki fo pa kalm bann mor oubien ador azot. Lir Izai 8:19 é Révélasion 4:11 é koz su késtion la :

• Dapré ou, kosa Jéova i pans kan in moun i ador bann mor oubien i demann azot lèd ?

5. La vérité su la mor i rasur anou

In bonpe d’moun la aprann ke apré zot mor, zot i sra puni pou bann mové zafèr ke zot la fé. Mé lé rasuran konèt ke pèrsonn va soufèr apré la mor, mèm pa in moun ke la fé bonpe le mal. Lir Romin 6:7 é koz su késtion la :

• Si, kom la Bib i di, la mor i libèr in moun le péché, èske ou pans ke bann mor i souf, akoz bann fot ke zot la fé ?

Plus nou aprann konèt Jéova, plus nou lé sur ke li va jamé pèrmèt ke bann mor i souf. Lir Detéronom 32:4 é 1 Jan 4:8 é koz su bann késtion la :

• Si nou réfléchi su bann kalité, ke nou trouv dan bann vèrsé la, èske nou pe kroir ke Bondieu i fé souf sak lé mor ?

• Èske ou trouv ke la vérité su la mor i rékonfort ? Poukosa ?

 SAK NOU LA APRANN

Kan in moun i mor, li arèt viv. Bann mor i souf pa é i gingn pa fé le mal sak lé vivan.

Alon révizé

• Kosa i éspas kan nou mor ?

• Kosa i aport anou konèt la vérité su la mor ?

• Poukosa la vérité su la mor i rasur anou ?