LESON 42
Kosa la Bib i di pou sak lé sélibatèr é sak lé maryé ?
Dan désèrtin kultur, bann domoun i pans ke pou èt ereu, i fo èt maryé. Mé, néna bann domoun maryé ke lé malereu é bann sélibatèr ke lé ereu. An vré, la Bib i di ke èt sélibatèr é èt maryé, lé 2 lé in kado Bondieu.
1. Kèl lavantaj néna kan ou lé sélibatèr ?
Nou lir dan la Bib : « Sak i maryé i fé bien, mé sak i maryé pa va fé mieu » (lir 1 Korintien 7:32, 33, 38). Poukosa la Bib i di ke in sélibatèr i fé « mieu » ? Kom li na poin in konjoin, li lé plu lib. In légzanp, lé plu fasil pou li alé prèch la bonn nouvèl dan in not landroi oubien in not péi. É surtou, li na plus le tan pou rann for son lamitié avèk Jéova.
2. Kèl lavantaj néna kan ou lé maryé ?
Kom pou bann sélibatèr, bann domoun maryé na in bonpe bienfé. La Bib i di ke « deu i vo mieu ke inn » (Éklézias 4:9). É sa lé vré kan bann konjoin i aplik bann prinsip la Bib. In mesieu èk in madam ki désid maryé i promèt èm azot é réspèk azot. Donk zot i san azot plus an sékurité ke bann koup i viv ansanm é ke lé pa maryé. É maryaj i donn lokazion zot zanfan grandi dan in landroi ke lé sur.
3. Koman Jéova i konsidèr le maryaj ?
Kan Jéova la béni le premié maryaj, li la di : « Lom va kit son papa é son momon, é li va rès avèk son madam » (Jenèz 2:24). Jéova i ve ke in mari é in madam i ièm azot é i rès ansanm tank zot lé an vi. Li pèrmèt le divors kan inn ant lé 2 konjoin la tronp lot. Dann situasion la, Jéova i lès le konjoin inosan désid si li va divorsé oubien non a (Matieu 19:9). Jéova i otoriz pa bann krétien avoir pluzieur madam oubien pluzieur mesieu (1 Timoté 3:2).
ALON APRANN PLUS
Alon voir koman bann sélibatèr é bann moun maryé i pe trouv le boneur é kontant le keur Jéova.
4. Profit ke ou lé sélibatèr
Pou Jézu, èt sélibatèr lété in kado Bondieu (Matieu 19:11, 12). Lir Matieu 4:23 é koz su késtion la :
-
Koman Jézu la utiliz se kado la, pou sèrv son Papa é fé le bien otour d’li ?
Kom Jézu, in krétien i pe trouv la joi èt sélibatèr. Gard le VIDÉO é koz su le késtion ki vien apré.
-
Dan kèl gayar zaktivité bann krétien sélibatèr i pe donn azot a fon ?
Ou té koné sa ou ?
La Bib i di pa kèl laj in moun i pe maryé. Parkont li konsèy anou atann ke « la fleur la jeunès », la finn pasé. Sé in pèryod dan la vi ousa bann dézir séksuèl i pe tronp nout jujman (1 Korintien 7:36).
5. Choizi bien out konjoin
Choizi in konjoin i fé parti bann désizion plu zinportan dan la vi. Lir Matieu 19:4-6, 9 é koz su késtion la :
-
Poukosa in krétien i devré pran le tan réfléchi avan maryé ?
La Bib i di sak nou doi chèrché ché in konjoin. Le plu zinportan sé ke li ièm Jéova b. Lir 1 Korintien 7:39 é 2 Korintien 6:14 é koz su bann késtion la :
-
Poukosa nou devré maryé rienk avèk in sèrviteur Jéova ?
-
Si in krétien i désid maryé avèk in moun i sèrv pa Jéova, kosa Jéova va resanti ?
6. Voi le maryaj kom Jéova i voi
Dan in tan an Israèl, bann bonom té divors pou bann rézon égois. Lir Malaki 2:13, 14, 16 é koz su késtion la :
-
Poukosa Jéova i détès kan i divors pou rien ?
Gard le VIDÉO é koz su le késtion ki vien apré.
-
Si ou lé maryé èk in moun i ador pa Jéova, kosa ou pe fé pou réusi out maryaj ?
7. Réspèk sak Jéova i demann su le maryaj
I fo fé zéfor pou réspèk sak Jéova i demann su le maryaj c. Jéova i béni sak i obéi ali. Gard le VIDÉO.
Lir Ébreu 13:4 é koz su bann késtion la :
-
Èske bann rekomandasion Jéova su le maryaj lé rézonab ? Akoz ou di sa ?
Dan la plupar bann péi, néna bann loi pou anrejis bann maryaj é bann divors. Jéova i demann bann krétien obéi bann loi la. Lir Tit 3:1 é koz su késtion la :
-
Si ou lé maryé, èske ou la asur aou ke out maryaj lé bien anrejistré devan la loi ?
DOMOUN I POURÉ DEMANN AOU : « Poukosa i fo maryé ? Èske nou pe pa viv jus an ménaj ? »
-
Kosa ou noré réponn ?
SAK NOU LA APRANN
Èt sélibatèr é èt maryé lé bann kado Jéova. Lé 2 i donn la joi si nou suiv bann prinsip Jéova.
Alon révizé
-
Koman in sélibatèr i pe profit son situasion ?
-
Poukosa la Bib i di i fo maryé rienk avèk in sèrviteur Jéova ?
-
Kosa i lé le seul rézon biblik pou divorsé ?
GARD SA OSI
Sak i ve dir « maryé rienk èk in disip le Sénieur ».
« Questions des lecteurs » (La Tour de Garde, 1er juillet 2004)
Bann bon konsèy su bann frékantasion é le maryaj dan in vidéo an 2 parti.
Koman Jéova la béni in frèr ke la pran bann désizion èk kouraj ?
Kosa i fo réfléchi avan pans divors oubien séparasion ?
« Honore “ce que Dieu a uni” » (La Tour de Garde, décembre 2018)
a Le ti not no 4 i di bann rézon ke in koup maryé i pe sépar azot mèm si pèrsonn la pa tronp inn é lot.
b Dan bann kultur ousa bann paran i choizi le konjoin zot zanfan, bann bon paran va demann azot, si le futur konjoin i ièm Jéova. Sé pa larjan ou in bon plas travay ke i doi influans zot choi.
c Si ou viv èk in moun san èt maryé, sé ou ki doi désid si ou va kit ali oubien maryé èk li.