Bann jeun maryé i éspèr ke le boneur ke zot néna le jour zot maryaj, va dur pou toultan. É sa lé posib ! Bann krétien maryé depui lontan é ke la fé de zot mieu pou mèt an pratik bann konsèy la Bib i koné sa.

1. Kèl konsèy la Bib i donn pou le mari ?

Jéova la donn le mari le rol de chèf la fami (lir Éfézien 5:23). Li ve ke in mari i pran bann désizion ke lé bon pou son fami. La Bib i di bann mari : « Kontinué èm zot madam » (Éfézien 5:25). Kosa sa i ve dir ? In bon mari lé janti èk son madam, an privé é an publik. Li protèj son madam é li fé de son mieu pou fé atansion bann bezoin fizik é bann santiman son madam (1 Timoté 5:8). Plus inportan ankor, li èd son madam rès proch koté Jéova (Matieu 4:4). Par égzanp, li pri é li lir la Bib ansanm èl. In mari ki fémont son lamour pou son madam i gard in bon relasion avèk Jéova (lir 1 Pièr 3:7).

2. Kèl konsèy la Bib i donn pou le madam ?

La Parol Bondieu i di ke in madam « i doi avoir in gran réspé pou son mari » (Éfézien 5:33). Kosa sa i ve dir ? Èl i pe majinn bann kalité ke son mari néna é bann zéfor ke li fé pou pran soin d’èl é de zot zanfan. Èl i soutien son bann désizion, i koz èk jantiyès é i koz an bien su son mari, mèm si li ador pa Jéova.

3. Koman in mesieu é in madam i pe ranfors zot koup ?

La Bib i di pou in mesieu é in madam ke lé maryé : « Zot deu i sra in seul chèr » (Matieu 19:5). Sa i ve dir ke zot i doi sobat kont bann zabitud ki éloign azot inn é lot. Pousa zot i pas souvan le tan ansanm, é zot i di azot sak zot i pans é sak zot i resan, avèk franchiz é amour. Zot i pèrmèt pa rien ni pèrsonn, sof Jéova, èt plus inportan ke zot konjoin. É zot i fé surtou atansion pa avoir in lamitié tro proch avèk in not moun.

 ALON APRANN PLUS

4. Mari : èm out madam é pran soin d’èl

5. Madam : èm é réspèk out mari

La Bib i ankouraj in madam réspèk son mari, ke li ador Jéova ou pa. Lir 1 Pièr 3:1, 2 é koz su bann késtion la :

• Si out mari lé pa Témoin, ou éspèr petèt ke in jour li ador Jéova. Dapré ou, kosa va atir ali le plus ? Ke ou prèch èk li san arété, oubien ke ou néna in bon konportman é ke ou réspèk ali ? Poukosa ?

Bien souvan, in mari é son madam lé dakor su bann désizion ke zot i pran. Mé nadfoi,  in madam lé pa dakor èk son mari. Kan sa i ariv, kan li la finn partaj son poin d’vu avèk kalm é réspé, in madam va rekonèt ke sé son mari ke Jéova la donn le résponsabilité, désid sak lé méyeur pou la fami. Èl va fé tout pou soutien le désizion son mari. Èl va fé ansort ke néna in bon lanbians dan la kaz. Lir 1 Pièr 3:3-5 é koz su késtion la :

• Kosa Jéova i resan kan in madam i réspèk son mari ?

6. Surmont bann problèm dan le koup

 SAK NOU LA APRANN

In mari é son madam i pe èt ereu si zot i èm azot, si zot i réspèk azot é si zot i aplik bann prinsip la Bib.

Alon révizé

• Koman in mari i pe fé ansort ke son maryaj lé ereu ?

• Koman in madam i pe fé ansort ke son maryaj lé ereu ?

• Si ou lé maryé, kèl prinsip la Bib va èd aou rann plu for out koup ?