Bann Témoin Jéova i pratik zot relijion é i èd demoun lé pov dann plu 200 péi. Mé na rienk 35 péi ladan ki gingn ansort azot par zot mèm gras zot bann zofrann lokal. Mé dan se ka la, koman lé zot péi i fé alor ?

 Le Kolèj santral bann Témoin Jéova i réfléchi su bann bezoin spirituèl ke bann Témoin dann monn antié néna é su zot bann zaktivité osi. Bann frèr Kolèj santral i kalkul koman i pe ansèrv larjan ke néna le méyeur fason posib. Si in buro nasional i gingn in pe plus zofrann par rapor sak li la bezoin, dan se ka la sé dot péi ke va profit se ti moné ke lé anplus. Komsa la, nou suiv lègzanp bann premié krétien ke té i èd azot inn é lot « gras in par égal » (2 Korintien 8:14). Zot té utiliz sak zot lavé anplus pou èd lé zot krétien ke lavé moins.

 Kosa nout bann frèr ki profit se ti moné ke lé anplus i resan ? Par égzanp, an Tannzani, na plus la moitié demoun ki viv dann péi la, na mèm poin deu dolar par jour pou viv. Anfèt sé gras dispozision la ke la gingn refé la sal du roiyom Mafinga. Bann frèr lasanblé la la ékri : « Depu ke la refé la sal, in bonpe plus demoun i vien pou rénion. Nou di gran mèrsi lorganizasion Jéova èk nout bann frèr é seur pou zot gran keur, ke la pèrmèt anou gingn in gayar sal pou nout bann rénion. »

 Akoz le pandémi Kovid-19, désèrtin anparmi nout bann frèr Sri Lanka navé pu asé manjé. Sé sak Imara Fernando èk son ti garson, Enosh la konu. Mé gras bann zofrann lé zot péi, banna la gingn lèd zot lavé bezoin. Zot la ékri : « Nou di mèrsi bann frèr pou lamour ke zot la fémont pou nou dann malizé la. Nou lé vréman kontan fé parti se fami é nou kontinu pri Jéova pou ke li èd tout bann frèr dann bann dèrnié jour la. »

 Ninport kèl landroi ousa nout bann frèr é seur i viv, zot keur i pous azot partaj sak zot néna. Par égzanp, Enosh la fé ali inn ti boit zofrann pou gingn èd bann fami ke na poin. Guadalupe Álvarez osi néna gran keur. La ousa èl i abit dann Mèksik na poin bonpe demoun i gingn le minimom larjan pou viv é pou dot larjan i rant pa toultan. É kan mèm sa èl i donn sat èl i pe. Èl i ékri : « Mi di mèrsi Jéova pou son bonté èk son lamour fidèl. Mi koné ke va rajout mon bann zofrann su sat lé zot é ke sa va rann sèrvis mon bann frèr ke na poin. »

 Bann buro nasional ki partaj zot larjan lé bien kontan fé sa. Anthony Carvalho, in frèr komité buro nasional Brézil, i di komsa : « Pandan in bon bout tan nou lavé bezoin le ti larjan lé zot péi. Lé inkroiyab logmantasion nou la konu, gras se lèd la. Astèr ke nou gingn ansort anou, nou koné kontantman parske nou gingn èd lé zot. Nout bann frèr i voi la prédikasion in fason plu larj su tout la tèr é zot i konpran mieu koman zot i pe fé pou èd zot bann frèr. »

 Kèl plu méyeur manièr nou néna pou soutien nout bann frèr é seur ke na poin ? Lé pa kan nou anvoiy dirèk larjan pou buro nasional lé zot péi, mé sé pluto kan nou soutien laktivité ke lé fé su tout la tèr. Nou pe fé sa la sal du roiyom dann boit zofrann « Aktivité mondial » oubien su Intèrnèt, su le site donate.pr418.com. Nou lé rekonésan pou tout bann zofrann ke lé fé.